16-year-old Kairan Quazi’s leap SpaceX to Citadel
Kairan Quazi Resignation: जगातील सर्वांत प्रभावशाली अब्जाधीशांपैकी एक असलेले एलोन मस्क हे नेहमीच चर्चेत राहतात. त्यांच्या अंतराळ संशोधन कंपनी स्पेसएक्स (SpaceX) मध्ये नुकताच एक महत्वाचा बदल झाला आहे. केवळ १४ व्या वर्षी या जागतिक कंपनीत अभियंता म्हणून कामाला लागलेला कैरान (करण) काझी याने नुकताच स्पेसएक्समधून राजीनामा दिला. आश्चर्याची बाब म्हणजे या प्रतिभावान मुलाच्या राजीनाम्यावर प्रतिक्रिया देताना एलोन मस्क म्हणाले “मी त्यांच्याबद्दल पहिल्यांदाच ऐकले!” ही प्रतिक्रिया जगभरात चर्चेचा विषय ठरली आहे. कारण काझीचे वय, त्याचे कौशल्य आणि स्पेसएक्ससारख्या भव्य कंपनीत त्याचे कार्य हे अद्भुतच म्हणावे लागेल.
काझी हा केवळ १६ वर्षांचा अभियंता आहे. पण त्याची कर्तृत्वकथा वयाला हरवणारी आहे. कॅलिफोर्नियातील सांता क्लारा विद्यापीठाच्या १७० वर्षांच्या इतिहासात सर्वांत तरुण पदवीधर होण्याचा मान त्याने मिळवला आहे. संगणक शास्त्र आणि अभियांत्रिकीची पदवी अवघ्या १४ व्या वर्षी पूर्ण करून त्याने विक्रम घडवला. या वयात जेव्हा बहुतांश मुलं अजून शालेय पातळीवर असतात, तेव्हा काझीने स्पेसएक्समध्ये थेट सॉफ्टवेअर अभियंता म्हणून काम सुरू केले. त्याने स्टारलिंक प्रकल्पावर काम केले, ज्याचा उद्देश जागतिक स्तरावर उपग्रहांच्या मदतीने उच्च दर्जाचे इंटरनेट पोहोचवणे हा होता.
जागतिक घडामोडी संबंधित बातम्या वाचण्यासाठी येथे क्लिक करा : International Weird Music Day : ‘विचित्र’ की अद्वितीय? 24 ऑगस्टलाच जगात का साजरा करतात ‘हा’ संगीताचा वेगळा उत्सव
दोन वर्षांच्या कारकिर्दीनंतर काझीने नवा मार्ग निवडला. त्याने एरोस्पेस सोडून क्वांटिटेटिव्ह फायनान्स (Quantitative Finance) क्षेत्राकडे पाऊल टाकले. आता तो न्यूयॉर्कमधील सिटाडेल सिक्युरिटीज (Citadel Securities) या जागतिक स्तरावरील अग्रगण्य वित्तीय कंपनीत डेव्हलपर म्हणून काम करणार आहे.
काझीने बिझनेस इनसाइडरला दिलेल्या मुलाखतीत सांगितले –
“स्पेसएक्समध्ये दोन वर्षांचा अनुभव घेतल्यानंतर मला वाटलं की आता नवीन आव्हानांचा सामना करण्याची वेळ आली आहे. क्वांट फायनान्समध्ये एआय संशोधन अतिशय वेगाने होते. इथे काही दिवसांत मोजता येणारा ठोस परिणाम पाहायला मिळतो, जे aerospace मध्ये वर्षानुवर्षे लागू शकते.”
२०२३ मध्ये काझी चर्चेत आला होता कारण लिंक्डइनने त्याचे खाते बंद केले होते. कारण काय? – त्याचे वय!
लिंक्डइनला वाटले की तो या व्यावसायिक प्लॅटफॉर्मसाठी खूप लहान आहे. यावर काझीने जोरदार टीका केली आणि त्याला “आदिम विचारसरणी” असे संबोधले. त्याने इंस्टाग्रामवर याचा स्क्रीनशॉट शेअर करून समाजमाध्यमांवर खळबळ उडवली.
लोकांच्या मनात अपेक्षा होती की काझीच्या राजीनाम्यावर एलोन मस्क त्याच्या कामगिरीचे कौतुक करतील. पण मस्क यांनी एक्सवर दिलेल्या छोट्याशा प्रतिक्रियेत लिहिले
“मी त्यांच्याबद्दल पहिल्यांदाच ऐकले!”
ही प्रतिक्रिया पाहून अनेकांना धक्का बसला. कारण स्पेसएक्ससारख्या मोठ्या कंपनीत एवढ्या लहान वयात सामील होणे हीच एक विलक्षण उपलब्धी आहे. परंतु मस्क यांच्या या शब्दांमुळे असेही दिसते की इतक्या प्रचंड आकाराच्या संस्थेत प्रत्येक लहान टीम मेंबरपर्यंत मुख्य कार्यकारी अधिकाऱ्याची पोहोच नसते.
जागतिक घडामोडी संबंधित बातम्या वाचण्यासाठी येथे क्लिक करा : Bom Jesus : 500 वर्षांपूर्वीचे रहस्य उलगडलं; नामिबियाच्या वाळवंटात ‘बॉम जीझस’ जहाजाचा अब्जावधींचा खजिना सापडला
काझीचा हा प्रवास केवळ सुरुवात आहे. लहान वयात घेतलेला धाडसी निर्णय, तंत्रज्ञानातील प्रावीण्य आणि आता जागतिक वित्तीय जगतात प्रवेश – हे सगळं पाहता पुढील काही वर्षांत तो विज्ञान-तंत्रज्ञानाच्या जगात नक्कीच मोठे स्थान निर्माण करेल. जगात जेव्हा १६ वर्षांच्या वयात तरुण सोशल मीडियावर वेळ घालवतात, तेव्हा काझी मात्र इतिहास घडवत आहे.
.png "Videos"){kind=small}
