High-speed train derails in Britain 3 carriages overturn passengers describe horrific scene
दक्षिण इंग्लंडमधील (England) ईस्ट ससेक्स (East Sussex) प्रांतात एका प्रवासी ट्रेनचा भीषण अपघात झाल्याची धक्कादायक घटना समोर आली आहे. लंडन व्हिक्टोरिया स्टेशनवरून ईस्टबोर्नकडे (London Victoria to Eastbourne) जाणारी साउदर्न रेल्वेची हाय-स्पीड ट्रेन लेवेस शहराजवळ वेगाने जात असताना अचानक रुळावरून घसरली. या दुर्दैवी अपघातात ट्रेनचे ३ डबे थेट रुळावरून खाली उतरून एका बाजूला उलटले आणि उतारावरून घसरत बाजूच्या शेतात गेले. या अपघाताची माहिती मिळताच संपूर्ण ब्रिटनमध्ये खळबळ उडाली असून आपत्कालीन यंत्रणांनी तातडीने घटनास्थळी धाव घेतली.
हा अपघात गुरुवारी दुपारी सुमारे पावणेचार वाजण्याच्या सुमारास घडला. ट्रेनमध्ये सुमारे १५० प्रवासी प्रवास करत होते. अचानक झालेल्या भयानक हादऱ्यामुळे आणि आणीबाणीच्या ब्रेकमुळे (Emergency Brakes) डब्यांमधील प्रवाशांचे साहित्य इकडेतिकडे फेकले गेले आणि काचा फुटून अनेक प्रवासी रक्ताच्या थारोळ्यात पडले. सुदैवाने, या भीषण अपघातात कोणाचाही मृत्यू झाल्याची नोंद झालेली नाही, परंतु दोन प्रवाशांना अत्यंत गंभीर दुखापत झाली आहे.
अपघाताचे गांभीर्य लक्षात घेऊन ब्रिटीश ट्रान्सपोर्ट पोलीस (BTP), ईस्ट ससेक्स फायर अँड रेस्क्यू सर्व्हिस आणि रुग्णवाहिकांचे पथक तात्काळ घटनास्थळी दाखल झाले. परिसरात कडक बंदोबस्त तैनात करून दुर्घटनाग्रस्त डब्यांमध्ये अडकलेल्या प्रवाशांना बाहेर काढण्यासाठी तातडीने रेस्क्यू ऑपरेशन सुरू करण्यात आले. अग्निशामक दलाच्या जवानांनी खिडक्यांच्या काचा फोडून घाबरलेल्या व जखमी प्रवाशांची सुटका केली.
जागतिक घडामोडी संबंधित बातम्या वाचण्यासाठी येथे क्लिक करा : CENTCOM: सैनिक ‘USS Abraham Lincoln’ वरून समुद्रात उड्या मारून का करत आहेत आत्महत्या? पेंटागॉनने उघड केले सत्य
गंभीर जखमी झालेल्या प्रवाशांना तातडीने वैद्यकीय मदत पुरवण्यासाठी हवाई रुग्णवाहिका (Air Ambulances/Helicopters) आणि अनेक रुग्णवाहिका बोलावण्यात आल्या. जखमींना तात्काळ जवळच्या रुग्णालयात हलवण्यात आले आहे. रेल्वे लाईनवरील तिसऱ्या रुळामध्ये असणारा विद्युत प्रवाह (Electrified Rail) धोक्याचा ठरू नये म्हणून आधी पॉवर सप्लाय खंडित करण्यात आला आणि त्यानंतर सर्वांना सुरक्षितपणे बाहेर काढण्यात आले.
या अपघातातून बालंबाल बचावलेल्या रॉब ब्रॅडली (Rob Bradley) या प्रवाशाने अपघाताच्या वेळेसचा अत्यंत भयानक अनुभव कथन केला. रॉब हे आपल्या सहा वर्षांच्या मुलीसोबत चौथ्या डब्यातून प्रवास करत होते. त्यांनी सांगितले की, “ट्रेनचा वेग वाढताच ती अचानक जोरजोरात हेलकावे खाऊ लागली. काही सेकंदातच आमचा डबा वरच्या बाजूने उसळला आणि जोरात आपत्कालीन ब्रेक लागले. ब्रेक लागताच लोकांचे लॅपटॉप, बॅगा आणि एअरपॉड्स पुढे फेकले गेले.”
रॉब यांनी पुढे सांगितले की, ट्रेन थांबण्यापूर्वी रुळांवरून बऱ्याच अंतरापर्यंत घसरत गेली आणि मागच्या बाजूने प्रचंड धूर व धुळीचे लोट आत येऊ लागले. जेव्हा त्यांनी मागे वळून पाहिले तेव्हा मागचा भाग पूर्णपणे उघडा झाला होता आणि मागचा डबा उलटून थेट शेतात पडला होता. खिडक्यांच्या काचा फुटल्याने अनेक प्रवाशांच्या डोक्याला आणि अंगाला गंभीर दुखापती झाल्या होत्या.
जागतिक घडामोडी संबंधित बातम्या वाचण्यासाठी येथे क्लिक करा : Donald Trump: व्हाईट हाऊसने ट्रम्प यांच्या प्रकृतीबाबत खोटे सांगितले? हृदयरोगतज्ज्ञ डॉ. जोनाथन रायनर यांचा मोठा दावा
ब्रिटनमध्ये सध्या कडक उन्हाळ्याचे दिवस सुरू असून तापमानाचा पारा ३० अंश सेल्सिअसच्या पार गेला आहे. अतिउष्णतेमुळे रेल्वेचे लोखंडी रूळ प्रसरण पावतात (Rail Buckling) आणि वाकतात. प्राथमिक अंदाजानुसार, उष्णतेमुळे रुळांमध्ये निर्माण झालेला दोष या अपघातास कारणीभूत ठरला असण्याची शक्यता वर्तवली जात आहे. तथापि, ‘रेल अपघाती तपास शाखा’ (RAIB) या घटनेची तांत्रिक पाहणी करत असून अपघाताचे अचूक कारण शोधण्याचे काम सुरू आहे.
या भीषण अपघातामुळे ससेक्स आणि ब्राइटन मार्गावरील सर्व रेल्वे सेवा पूर्णपणे विस्कळीत झाल्या आहेत. नॅशनल रेलने प्रवाशांना या मार्गावरील प्रवास टाळण्याचा इशारा दिला आहे. ब्रिटनच्या परिवहन सचिव हायडी अलेक्सायंडर (Heidi Alexander) यांनी या दुर्घटनेबद्दल तीव्र दुःख व्यक्त केले असून बाधित प्रवाशांना सर्वतोपरी मदत करण्याचे आश्वासन दिले आहे.
.png "Videos"){kind=small}
