ओमान समुद्रात कच्च्या तेलाची गळती; 10 लाख लिटर तेल गेले वाया
मस्कत : ओमानच्या किनाऱ्याजवळ एका तेलवाहू टँकरला अपघात झाल्यानंतर समुद्रात मोठ्या प्रमाणात कच्चे तेल पसरले आहे. ‘कॅरोलिन बेझेंगी’ या टँकरमधून सुमारे ८ लाख ते १० लाख बॅरल रशियन कच्च्या तेलाची गळती झाल्याचे वृत्त आहे. उपग्रह छायाचित्रांनुसार, समुद्रात पसरलेल्या तेलाचा विस्तार २ हजार चौरस किलोमीटरपर्यंत पोहोचला आहे. त्यामुळे ओमानच्या समुद्री परिसंस्थेला मोठा धोका निर्माण झाला आहे.
रशियातील ‘कॅरोलिन बेझेंगी’ मध्ये नोवोरोसिस्क बंदरातून आणलेले कच्चे तेल होते. हा टँकर ओमानजवळील काबिलियाह बेटाच्या परिसरात अडकला होता. त्यानंतर त्यातून तेलाची गळती सुरू झाली. सुरुवातीला मर्यादित क्षेत्रात असलेला तेलाचा थर हळूहळू वाढत गेला. तेलाची गळती झालेला परिसर समुद्री जीवांसाठी अत्यंत महत्त्वाचा मानला जातो. या भागात हंपबॅक व्हेल, समुद्री कासव आणि विविध प्रजातींचे समुद्री पक्षी आढळतात. समुद्राच्या पृष्ठभागावर पसरलेला तेलाचा थर या जीवांच्या अधिवासावर तसेच त्यांच्या अन्नसाखळीवर गंभीर परिणाम करू शकतो.
दरम्यान, तेल किनाऱ्यापर्यंत पोहोचल्यास वाळू आणि इतर किनारी परिसंस्थेलाही मोठे नुकसान होण्याची शक्यता आहे. सुमारे ४० किलोमीटर लांबीच्या किनारपट्टीवर त्याचा परिणाम होण्याची भीती व्यक्त करण्यात येत आहे. तसेच मसिराह बेटापर्यंतही तेल पोहोचण्याचा धोका आहे.
युद्धविरामाच्या काळात इस्रायलचे घातक हल्ले
लेबनॉनमध्ये सुरू असलेल्या नाजूक युद्धविरामाच्या पार्श्वभूमीवर दक्षिण लेबनॉनमध्ये झालेल्या इस्रायली हवाई हल्ल्यांमुळे पुन्हा एकदा तणाव वाढला आहे. शनिवारी झालेल्या हल्ल्यांमध्ये अनेक नागरिकांचा मृत्यू झाला असून अनेक जण जखमी झाले आहेत. या हल्ल्यांनंतर हिजबुल्लाने इस्रायलला थेट इशारा देत “योग्य प्रत्युत्तर” दिले जाईल, असे म्हटले आहे. त्यामुळे युद्धविराम किती काळ टिकणार, याबाबत पुन्हा प्रश्न निर्माण झाले आहेत.
युद्धविराम आणि चर्चेवर संकट
इस्रायल आणि लेबनॉन यांच्यातील युद्धविरामाच्या पार्श्वभूमीवर दक्षिण लेबनॉनमधून इस्रायली सैन्याची माघार आणि हिजबुल्लाच्या शस्त्रसज्जतेचा मुद्दा चर्चेच्या केंद्रस्थानी आहे. इस्रायलची भूमिका अशी आहे की हिजबुल्लाचे शस्त्रसज्जीकरण थांबणे आवश्यक आहे, तर हिजबुल्ला इस्रायली सैन्याच्या लेबनॉनमधून माघारीची मागणी करत आहे.
.png "Videos"){kind=small}
