‘तू फेक रिपोर्टर आहेस...’, पत्रकाराने असा कोणता प्रश्न विचारला ज्यामुळे ट्रम्प संतापले, किम जोंग उनशी काय संबंध?
१६ वर्षीय लाइफगार्ड रायडर विल्यम्स याच्या सन्मानार्थ व्हाइट हाऊसमध्ये कार्यक्रम आयोजित करण्यात आला होता. कॅलिफोर्नियातील समुद्रकिनाऱ्यावर धोकादायक लाटांमध्ये एका १० वर्षीय भारतीय वंशाच्या मुलाचा जीव वाचवल्याबद्दल विल्यम्सचा सन्मान करण्यात आला. या कार्यक्रमात CNNच्या रिपोर्टर क्रिस्टन होम्स यांनी ट्रम्प यांना प्रश्न विचारले. सुरुवातीला त्यांनी ट्रम्प यांच्या कार्यकारी सहाय्यकाशी संबंधित प्रश्न विचारला. त्यानंतर उत्तर कोरियाबाबत प्रश्न उपस्थित करण्यात आला.
Trump News : ट्रम्प यांचा निर्णय ;दक्षिण कोरिया सोबतचा लष्करी सराव कमी करा !
ट्रम्प किम जोंग उन यांच्यासोबतच्या संबंधांबाबत बोलत असताना होम्स यांनी अमेरिका आणि दक्षिण कोरियाच्या संयुक्त लष्करी सरावांमध्ये कपात करण्याची मागणी किम यांनी केली होती का? असा सवाल केला. प्रश्न पूर्ण होण्यापूर्वीच ट्रम्प यांनी रिपोर्टरला थांबवण्याचा प्रयत्न केला.
ट्रम्प यांनी रिपोर्टरला, ‘गप्प बस’ असे सांगत तिच्यावर कार्यक्रमाच्या पार्श्वभूमीवर गैरवर्तन केल्याचा आरोप केला. रिपोर्टरने प्रश्न विचारणे सुरूच ठेवल्यानंतर ट्रम्प यांनी तिच्या माध्यम संस्थेचे नाव विचारले. CNNचे नाव समोर आल्यानंतर ट्रम्प यांनी पुन्हा ‘फेक न्यूज’ असा आरोप केला. तसेच रिपोर्टरला ‘फेक रिपोर्टर’ म्हणत तिच्यावर टीका केली.
या संपूर्ण वादाच्या पार्श्वभूमीवर ट्रम्प यांनी किम जोंग उन यांच्याशी आपले संबंध चांगले असल्याचे सांगितले. किम यांनी नेहमीच आपल्याशी आदराने वागणूक दिली असून, ‘मी त्यांना समजतो आणि ते मला समजतात’, असा दावा ट्रम्प यांनी केला. ट्रम्प यांच्या म्हणण्यानुसार, किम यांच्यासोबतच्या त्यांच्या संबंधांमुळे कोरियन द्वीपकल्प अधिक सुरक्षित करण्यास मदत झाली आहे.
याआधी ट्रम्प यांनी दक्षिण कोरियासोबत होणाऱ्या संयुक्त लष्करी सरावांमध्ये मोठी कपात करण्याची घोषणा केली होती. हे लष्करी सराव खर्चिक असल्याचे सांगत अमेरिकेवर त्याचा मोठा आर्थिक भार पडत असल्याचे ट्रम्प यांनी म्हटले. या निर्णयामागे किम जोंग उन यांच्याशी असलेले चांगले संबंध हेही एक कारण असल्याचे ट्रम्प यांनी स्पष्ट केले.
डोनाल्ड ट्रम्प आणि किम जोंग उन यांच्यात यापूर्वीही अनेकदा चर्चा झाली आहे. जून २०१९ मध्ये ट्रम्प यांनी उत्तर कोरियाच्या सीमाभागातील पानमुनजोम येथे किम यांची भेट घेतली होती. उत्तर कोरियाच्या भूमीवर पाऊल ठेवणारे ते पहिले विद्यमान अमेरिकन राष्ट्राध्यक्ष ठरले होते. ट्रम्प यांच्या ताज्या वक्तव्यामुळे अमेरिका-उत्तर कोरिया संबंध, दक्षिण कोरियासोबतचे लष्करी सहकार्य आणि पत्रकारांशी ट्रम्प यांचा आक्रमक संवाद पुन्हा चर्चेत आला आहे.
Tupac Murder Trial : 30 वर्षांनी टुपॅक हत्या प्रकरणाचा खटला सुरू!
.png "Videos"){kind=small}
