फोटो सौजन्य सोशल मीडिया
तब्बल दहा वर्षांनंतर नायजेरियात इबोलाचा रुग्ण आढळल्याने आरोग्य यंत्रणेत खळबळ उडाली आहे. संक्रमित महिला अलीकडेच युगांडामार्गे नायजेरियात दाखल झाली होती. सध्या तिला विलगीकरणात ठेवण्यात आले असून उपचार सुरू आहेत. तिच्या संपर्कात आलेल्या ४४ जणांची ओळख पटवण्यात आली आहे. त्यामुळे संसर्गाचा पुढील प्रसार रोखण्यासाठी नायजेरिया सरकारने तातडीच्या उपाययोजना सुरू केल्या आहेत.
Breaking News : समुद्रात निसर्गाचा चमत्कार ;ओमानच्या किनाऱ्यावर दुर्मिळ गुलाबी डॉल्फिनचे दर्शन
नायजेरियाच्या आरोग्य मंत्रालयाने दिलेल्या माहितीनुसार, संक्रमित महिला ५ ऑक्टोबर रोजी नायजेरियात दाखल झाली होती. त्यानंतर ७ ऑक्टोबरपासून तिच्यामध्ये आजाराची लक्षणे दिसू लागली. सुरुवातीला मलेरियासारखी लक्षणे जाणवत असल्याने ११ ऑक्टोबर रोजी तिला अबुजा येथील खासगी रुग्णालयात दाखल करण्यात आले.
पुढील तपासण्यांमध्ये इबोला विषाणूची लागण झाल्याचे स्पष्ट झाले. २० ऑक्टोबर रोजी प्रयोगशाळेने संसर्गाची पुष्टी केली. सध्या संबंधित महिलेला स्वतंत्र विलगीकरण कक्षात ठेवण्यात आले असून वैद्यकीय उपचार दिले जात आहेत.
रुग्णाची पुष्टी होताच नायजेरियाच्या आरोग्य विभागाने संपर्क शोध मोहीम सुरू केली. आतापर्यंत ४४ जणांची ओळख पटवण्यात आली असून त्यांच्यावर नियमित लक्ष ठेवले जात आहे. यामध्ये रुग्णालयातील आरोग्य कर्मचारी आणि महिलेच्या संपर्कात आलेल्या इतर व्यक्तींचा समावेश आहे. तसेच महिलेने प्रवास केलेल्या विमानातील प्रवाशांचाही शोध घेतला जात आहे. संशयित व्यक्तींमध्ये लक्षणे आढळल्यास तातडीने तपासणी आणि विलगीकरण करण्याच्या सूचना देण्यात आल्या आहेत.
नायजेरियातील हा संसर्ग बुंडिबुग्यो (Bundibugyo) प्रकारातील इबोला विषाणूमुळे झाला आहे. काँगोच्या लोकशाही प्रजासत्ताकात मे २०२६ मध्ये या विषाणूचा उद्रेक सुरू झाला होता. त्यानंतर आफ्रिकेतील इतर देशांमध्येही संसर्गाची प्रकरणे समोर आली. केनियामध्येही या उद्रेकाशी संबंधित नऊ रुग्ण आढळल्याचे वृत्त आहे. जागतिक आरोग्य संघटना आणि आफ्रिका रोग नियंत्रण केंद्र नायजेरियाच्या आरोग्य यंत्रणेला मदत करत आहेत. दरम्यान, युगांडाने आपल्या देशात सध्या सक्रिय इबोला रुग्ण नसल्याचे स्पष्ट केले आहे. त्यामुळे संक्रमित महिलेचा संसर्ग नेमका कुठे झाला, याचा तपास सुरू आहे.
इबोला हा गंभीर संसर्गजन्य आजार असून संक्रमित व्यक्तीच्या रक्ताच्या किंवा शरीरातील इतर द्रवांच्या थेट संपर्कातून त्याचा प्रसार होऊ शकतो. त्यामुळे रुग्णांची लवकर ओळख, विलगीकरण आणि संपर्कातील व्यक्तींवर देखरेख ठेवणे महत्त्वाचे ठरणार आहे. नायजेरियातील आरोग्य यंत्रणेसमोर आता या संसर्गाला सुरुवातीलाच रोखण्याचे मोठे आव्हान आहे.
.png "Videos"){kind=small}
