Smit Machchhar: रक्ताने माखलेल्या हातांनी वाचवले 174 जीव; कॅप्टन स्मित मच्छर यांना इस्रायल करणार सर्वोच्च नागरी सन्मान प्रदान

Smit Machchhar : फ्लायदुबईचे कॅप्टन स्मित मच्छर यांना विमानातील सर्व १७४ लोकांचे प्राण वाचवण्यात बजावलेल्या महत्त्वपूर्ण भूमिकेबद्दल इस्रायलच्या राष्ट्रपतींचा शौर्य पुरस्कार प्रदान करण्यात आला आहे.

• इस्रायलचा सर्वोच्च नागरी सन्मान
• कॉकपिटमधील थरार अन् शौर्य
• जागतिक पातळीवर कौतुक

आकाशात हजारो फूट उंचावर असताना जेव्हा काळाने समोरून घाला घातला, तेव्हा आपल्या प्राणांची तमा न बाळगता १७४ निष्पाप जीवांचे रक्षण करणाऱ्या एका भारतीय सुपुत्राच्या शौर्याची कथा आज जगभरात अभिमानाने सांगितली जात आहे. फ्लायदुबईच्या विमानात सह-वैमानिकाने कॉकपिटमध्येच विमान हायजॅक करून ते पाडण्याचा भयानक कट रचला होता. परंतु, मुख्य वैमानिक कॅप्टन स्मित मच्छर (Smit Machchhar) यांनी दाखवलेल्या प्रसंगावधान, धाडस आणि अद्भूत कौशल्यामुळे एक मोठा विमान अपघात टळला. या अभूतपूर्व शौर्याची दखल घेत इस्रायलचे राष्ट्राध्यक्ष आयझॅक हर्झोग यांनी कॅप्टन स्मित मच्छर यांना इस्रायलचा (Israel) सर्वोच्च नागरी सन्मान ‘प्रेसिडेंशियल अवॉर्ड फॉर सिव्हिलियन हिरोइझम’ (नागरी शौर्यासाठी राष्ट्रपती पुरस्कार) देण्याची अधिकृत घोषणा केली आहे.

कॉकपिटमध्ये घडलेला तो थरार 

हे दुर्दैवी आणि अंगावर काटा आणणारे नाट्य हवेत उड्डाण करत असलेल्या फ्लायदुबई विमानामध्ये घडले. विमानाचे सह-वैमानिक हमाम अल-हम्मामी याने अचानक कॉकपिटमध्येच मुख्य वैमानिक कॅप्टन स्मित मच्छर यांच्यावर कुऱ्हाडीने प्राणघातक हल्ला केला. विमान हायजॅक करून ते नष्ट करण्याचा त्याचा डाव होता. अचानक झालेल्या या हल्ल्यात कॅप्टन मच्छर गंभीर जखमी झाले आणि प्रचंड रक्तस्त्राव सुरू झाला. मात्र, या अत्यंत कठीण आणि जीवघेण्या प्रसंगातही कॅप्टन मच्छर यांनी आपले मनोधैर्य खचू दिले नाही. स्वतःच्या वेदनांकडे दुर्लक्ष करत त्यांनी कॉकपिटचा सुरक्षा दरवाजा उघडण्यात यश मिळवले. दरवाजा उघडताच विमानात उपस्थित असलेल्या इतर प्रवाशांनी आणि कर्तव्यावर नसलेल्या कर्मचाऱ्यांनी तात्काळ कॉकपिटमध्ये प्रवेश केला आणि हल्लेखोर सह-वैमानिकाला पकडून त्याच्या मुसक्या आवळल्या.

जागतिक घडामोडी संबंधित बातम्या वाचण्यासाठी येथे क्लिक करा : US PERM Suspended: इन्फोसिस, TCS, विप्रोसह दिग्गज आयटी कंपन्यांवर अमेरिकेची मोठी कारवाई; भारतीयांची ग्रीन कार्ड प्रक्रिया रोखली

#BREAKING: Israeli President @Isaac_Herzog has announced that Braveheart Indian pilot Captain Smit Machchhar will be conferred with Israel’s Presidential Award for Civilian Heroism. https://t.co/2mVsUTyocM — Aditya Raj Kaul (@AdityaRajKaul) October 8, 2026

credit – social media and Twitter

भारतीय वैमानिकाचे अफाट शौर्य

कॉकपिटमध्ये झालेल्या या प्रचंड झटापटीमुळे विमानाचे नियंत्रण काही काळासाठी सुटले होते आणि अवघ्या दोन मिनिटांत विमान तब्बल १६,००० फूट वेगाने खाली आले. हायजॅकिंग आणि अपघाताचा इशारा मिळताच विमानाच्या क्रू मेंबर्सनी अत्यंत कौशल्याने विमानाची दिशा बदलली आणि सौदी अरेबियातील तबुक विमानतळावर तातडीने आपत्कालीन लँडिंग (Emergency Landing) केले. कॅप्टन स्मित मच्छर यांच्या तत्परतेमुळे विमानातील सर्व १७४ प्रवासी आणि क्रू मेंबर्स पूर्णपणे सुखरूप बचावले.

जागतिक घडामोडी संबंधित बातम्या वाचण्यासाठी येथे क्लिक करा : US-Iran War: पेट्रोलच्या किमती आणि निवडणुकांचे गणित; ट्रम्प यांनी इराणवरील हल्ल्याचा निर्णय बदलला? ‘अशा’ एका पोस्टमुळे खळबळ

इस्रायलच्या राष्ट्राध्यक्षांची घोषणा आणि जागतिक सन्मान

इस्रायलचे राष्ट्राध्यक्ष आयझॅक हर्झोग यांनी या घटनेतील वीरांचा गौरव करताना कॅप्टन स्मित मच्छर यांच्या योगदानाचा विशेष उल्लेख केला. ते म्हणाले, “कॅप्टन स्मित मच्छर यांनी जखमी अवस्थेतही जे अद्भूत शौर्य दाखवले ते कौतुकास्पद आहे. त्यांनी दाखवलेली निष्ठा आणि कर्तव्याची जाणीव अतुलनीय आहे. त्यांनी केवळ १७४ लोकांचे प्राण वाचवले नाहीत, तर एक मोठा दहशतवादी हल्ला अयशस्वी केला.” कॅप्टन मच्छर सध्या संयुक्त अरब अमिराती (UAE) मधील रुग्णालयात उपचार घेत असून, त्यांची प्रकृती सुधारल्यानंतर त्यांना इस्रायलचा हा सर्वोच्च पुरस्कार देऊन त्यांचा यथोचित गौरव केला जाईल, असे हर्झोग यांनी स्पष्ट केले.

केवळ इस्रायलच नव्हे, तर अमेरिकेनेही भारतीय कॅप्टनच्या या वीरतेची दखल घेतली आहे. न्यू जर्सीचे काँग्रेस सदस्य जोश गॉटहाइमर यांनी अमेरिकन काँग्रेसमध्ये स्मित मच्छर यांच्या सन्मानाचा ठराव मांडला आहे. अमेरिकेचे माजी अध्यक्ष ट्रम्प यांनीही कॅप्टन मच्छर यांच्या धाडसाचे कौतुक करत त्यांना ‘खरा नायक’ म्हणून संबोधित केले आहे. संपूर्ण जगभरातून आज या भारतीय वैमानिकावर कौतुकाचा वर्षाव होत आहे.