Oil Imports : ‘परवानगीची गरज नाही’ ; रशियन तेल खरेदीवरून भारतानं अमेरिकेला दिलं स्पष्ट उत्तर

India US Relation : सध्या मध्यपूर्वेतील तणावामुळे जगभरात तेलाचा पुरवठा कमी पडत आहे. यामुळे भारतही अडचणीत आला आहे. याच पार्श्वभूमीवर अमेरिका-भारतात वाद निर्माण झाला आहे.

• भारताने अमेरिकेला सुनावले खडे बोल
• रशियाकडून तेल खरेदीसाठी कोणाच्या परवानगीची गरज नाही
• जाणून घ्या काय म्हटले होते अमेरिकेने?

नवी दिल्ली : रशियाकडून तेल आयातीसाठी सवलत दिल्याच्या अमेरिकेच्या दाव्याला भारताने जोरदार प्रत्युत्तर दिले आहे. शनिवारी, केंद्र सरकारने अमेरिकेला खडे बोल सुनावत सांगितलो की, रशियाकडून तेल खरेदीसाठी भारताला कोणाच्याही परवानगीची आवश्यकता नाही. भारताने असेही म्हटले आहे की, रशियाकडून तेल आयात करत राहू. इराणवरील अमेरिका आणि इस्रायलच्या हल्ल्यांमुळे जागतिक ऊर्जाक्षेत्र विस्कळीत झाले आहे, ज्यामुळे जगभरात तेलाच्या किमती वाढल्या आहेत. होमुझच्या सामुद्रधुनीतून जहाजे जाण्यापासून रोखण्याच्या इराणच्या धमकीनंतर कच्च्या तेलाच्या किमतींवर परिणाम झाला आहे.

सरकारने एका निवेदनात म्हटले आहे की, भारत तेल खरेदीसाठी अल्पकालीन सवलतींवर अवलंबून नाही. ‘भारत कधीही रशियन तेल खरेदी करण्यासाठी कोणत्याही देशाच्या परवानगीवर अवलंबून राहिलेले नाही. भारत यापुढेही रशियन तेल आयात करत राहील आणि रशिया भारताचा सर्वांत मोठा कच्च्या तेलाचा पुरवठादार राहील.

Fuel Prices: ‘रशियाचा फायदा नाही, जगाचं हित!’ ट्रम्प यांनी भारताला रशियन तेलाच्या खरेदीसाठी दिली सूट; सवलतीमागे मोठे राजकारण

काय म्हणाला होता अमेरिका ?

अमेरिकेचे परराष्ट्र मंत्री स्कॉट बेसेंट यांनी या निर्णयाचे समर्थन करताना सांगितले की, “जागतिक बाजारात तेलाची उपलब्धता कायम राखणे ही आमची प्राथमिकता आहे. भारतीय रिफायनरीजना ही सूट केवळ समुद्रात असलेल्या चालू व्यवहारांपुरतीच मर्यादित असेल, जेणेकरून रशियाला कोणताही नवीन मोठा आर्थिक फायदा होणार नाही, परंतु जागतिक पुरवठा साखळी कोलमडणार नाही.” यामुळे भारताला आपले ऊर्जा स्रोत टिकवून ठेवण्यासाठी ३० दिवसांचा महत्त्वाचा वेळ मिळाला आहे.

होर्मुझची नाकेबंदी आणि भारतापुढील आव्हान

जगातील एकूण तेल व्यापारापैकी २० टक्के व्यापार होर्मुझच्या सामुद्रधुनीतून होतो. भारत आपल्या गरजेच्या ८८ टक्के कच्चे तेल आणि ५० टक्के नैसर्गिक वायू आयात करतो, ज्याचा मोठा हिस्सा याच मार्गावरून येतो. इराणने हा मार्ग रोखल्यामुळे भारतासमोर मोठे संकट उभे राहिले होते. या संकटकाळात अमेरिकेने भारताच्या अल्पकालीन आणि दीर्घकालीन गरजा पूर्ण करण्यासाठी जवळून काम करण्याचे आश्वासन दिले आहे.

LPG च्या किमतीत ६० रुपये वाढ

इराण युद्धामुळे निर्माण झालेल्या आपत्कालीन परिस्थितीला तोंड देण्यासाठी भारताकडे २५ कोटी बॅरलपेक्षा जास्त कच्चे तेल आणि पेट्रोलियम उत्पादनांचा साठा आहे. तथापि, भारताने शनिवारी स्वयंपाकासाठी वापरल्या जाणाऱ्या घरगुती एलपीजी सिलिंडरच्या किमतीत ६० रुपयांची वाढ केली. व्यावसायिक सिलिंडरच्या किमतीतही वाढ झाली. जागतिक स्तरावर, शुक्रवारी कच्च्या तेलाच्या किमती ८.५ टक्क्यांनी वाढल्या आणि या आठवड्यात जवळजवळ ३० टक्क्यांनी वाढल्या आहेत.