अरेरे, काय चाललंय Nepal मध्ये, आता शाळेची बस दरीत कोसळून विद्यार्थ्यांसह पाच जणांचा मृत्यू
नेपाळमधील अधिकाऱ्यांनी दिलेल्या माहितीनुसार, ही बस कालिका इंग्लिश बोर्डिंग स्कूलची होती. कास्की जिल्हा पोलीस कार्यालयाचे प्रमुख पोलीस अधीक्षक नवीन कार्की यांनी या अपघातात पाच जणांचा मृत्यू झाल्याची पुष्टी केली. अपघाताच्या वेळी बसमध्ये १७ विद्यार्थी, एक अन्य प्रवासी आणि चालक असे एकूण १९ जण होते. अपघाताचे नेमके कारण अद्याप स्पष्ट झालेले नाही.
कास्कीचे मुख्य जिल्हाधिकारी कुमान सिंह गुरुंग यांनी दिलेल्या माहितीनुसार, बसमधील बहुतांश विद्यार्थी दहावीच्या वर्गातील होते. ते शिकवणी वर्गासाठी जात असताना हा अपघात झाला.
नेपाळमध्ये गेल्या काही वर्षांत रस्ते अपघातांची संख्या वाढली आहे. देशात वाहनांची संख्याही सातत्याने वाढत आहे. अधिकृत आकडेवारीनुसार, २०२४-२५ या आर्थिक वर्षात नेपाळमध्ये ७,६६९ रस्ते अपघातांची नोंद झाली. या अपघातांत १,९०० जणांचा मृत्यू झाला, तर २७८ अपघात गंभीर स्वरूपाचे होते.
जागतिक बँकेच्या अभ्यासानुसार, नेपाळमध्ये रस्ते अपघातांमुळे होणाऱ्या दुखापतींचा आर्थिक खर्च २००७ नंतर तिपटीने वाढला आहे. हा खर्च देशाच्या सकल राष्ट्रीय उत्पन्नाच्या (जीएनपी) १.५ टक्क्यांपर्यंत पोहोचला आहे. या अपघातांचा सर्वाधिक फटका गरीब आणि दुर्बल घटकांना बसत असल्याचेही अभ्यासात नमूद करण्यात आले आहे.
वाढत्या अपघातांना आळा घालण्यासाठी नेपाळ सरकारने प्रतिनिधी सभेत ‘रोड सेफ्टी बिल’ सादर केले आहे. रस्ते सुरक्षेशी संबंधित विविध यंत्रणांमध्ये समन्वय वाढवणे, अपघात रोखणे, देखरेख व्यवस्था मजबूत करणे आणि अपघातांमुळे होणारी जीवितहानी व आर्थिक नुकसान कमी करणे हा या विधेयकाचा उद्देश आहे.
या विधेयकात सुरक्षित रस्ते, वाहनांची सुरक्षा, वेग नियंत्रण, रस्ते वापरणाऱ्यांची सुरक्षितता, अपघातानंतर बचावकार्य व उपचार, विमा आणि नुकसानभरपाई यांसारख्या बाबींचा समावेश आहे.
.png "Videos"){kind=small}
