कॅनडात विमान कोसळून अपघात; वैमानिकांसह तीन जणांचा मृत्यू, दोघे मुंबईचे रहिवासी

कॅनडामध्ये विमान कोसळून (Plan Crashed in Canada) दोन प्रशिक्षणार्थी वैमानिकांसह तीन जणांचा मृत्यू झाला. दोन्ही प्रशिक्षणार्थी वैमानिक मुंबईचे रहिवासी आहेत. अभय गडरु आणि यश विजय रामुगडे अशी त्यांची नावं आहेत.

ओटावा : कॅनडामध्ये विमान कोसळून (Plan Crashed in Canada) दोन प्रशिक्षणार्थी वैमानिकांसह तीन जणांचा मृत्यू झाला. दोन्ही प्रशिक्षणार्थी वैमानिक मुंबईचे रहिवासी आहेत. अभय गडरु आणि यश विजय रामुगडे अशी त्यांची नावं आहेत.

ब्रिटिश कोलंबिया प्रांतात येणाऱ्या व्हँकूअरपासून 100 किमीवर विमानाला अपघात झाला. अपघातग्रस्त विमान आकाराने लहान आहे. विमानतळाजवळ असलेल्या मॉटेलच्या (हायवेवरील हॉटेल) परिसरात हा अपघात झाला. अपघातात तीन जणांचा मृत्यू झाला. त्यात दोन भारतीयांचा समावेश आहे. हे दोघे प्रशिक्षणार्थी वैमानिक होते. अपघाताची माहिती दोघांच्या कुटुंबियांना देण्यात आली आहे.

दरम्यान, कॅनडाच्या ट्रान्सपोर्टेशन सेफ्टी बोर्डाने अपघाताचे कारण शोधण्यासाठी तपासकर्त्यांची नियुक्ती केली आहे. अपघाताचं नेमकं कारण अद्याप समजू शकलेले नाही. अपघातग्रस्त विमान वजनानं हलकं होतं. ते झाडाझुडूपांमध्ये कोसळलं.

अपघाताची माहिती मिळताच अधिकारी घटनास्थळी

अपघातानंतर कॅनडाच्या परिवहन सुरक्षा बोर्डाचे अधिकारी घटनास्थळी पोहोचले. त्यांच्याकडून अपघाताच्या कारणांचा शोध सुरू आहे. परिसरातील कोणालाही इजा झालेली नाही. घटनास्थळी दोन एअर अॅम्ब्युलन्स पाठवण्यात आल्या होत्या.