Somali pirates hijack Turkish ship 2026
समुद्री सुरक्षेच्या दृष्टीने अत्यंत संवेदनशील मानल्या जाणाऱ्या पूर्व आफ्रिकेतील सोमालियाच्या किनाऱ्याजवळ एक धक्कादायक आणि भीषण घटना घडली आहे. सोमाली समुद्रातील कुख्यात समुद्री चाच्यांनी (Somali Pirates) कॅमेरूनचा ध्वज असलेल्या ‘एम/व्ही लुतुफ’ (M/V LUTUF) या मालवाहू जहाजाचे अपहरण केले आहे. सर्वात चिंतेची बाब म्हणजे या जहाजावर मोठ्या प्रमाणात अत्याधुनिक तुर्की लष्करी शस्त्रसाठा, दळणवळण साधने आणि सॅटेलाइट उपकरणे लोड करण्यात आली होती. जहाजाच्या या अपहृत कर्मचाऱ्यांमध्ये ६ भारतीय नागरिकांचा समावेश असल्याने भारत सरकार आणि परराष्ट्र मंत्रालयाने यावर अतिशय बारकाईने लक्ष ठेवण्यास सुरुवात केली आहे.
‘पोलर मूव्हमेंट शिपिंग’ (Polar Movement Shipping) या कंपनीच्या मालकीचे हे विशाल जहाज मोगादिशूमधील तुर्कीच्या लष्करी प्रशिक्षण केंद्राकडे शस्त्रास्त्रांचा पुरवठा करण्यासाठी जात होते. परंतु, सोमवारी सोमालियाच्या ईशान्येकडील पुंटलँड (Puntland) प्रदेशातील ‘आयल’ (Eyl) जिल्ह्यातील मरायापासून अवघ्या ३.५ सागरी मैल अंतरावर चाच्यांनी जहाजावर अचानक हल्ला चढवला आणि संपूर्ण जहाजाचा ताबा घेतला. या घटनेमुळे आफ्रिकन शिंग (Horn of Africa) परिसरातील भू-राजकीय आणि सागरी सुरक्षेचा तणाव कमालीचा वाढला आहे.
अपहृत ‘एम/व्ही लुतुफ’ जहाजावर एकूण १० जणांचा ताफा तैनात होता. यामध्ये ६ भारतीय नागरिक, १ तुर्की नागरिक, १ जॉर्जियन नागरिक आणि २ सर्बियन सशस्त्र सुरक्षारक्षक यांचा समावेश आहे. या घटनेची माहिती मिळताच भारतीय सुरक्षा यंत्रणा आणि परराष्ट्र मंत्रालय अलर्ट मोडवर आले आहेत. आपल्या ६ नागरिकांची सुखरूप सुटका करण्यासाठी भारतीय नौदल आणि इतर आंतरराष्ट्रीय सागरी सुरक्षा भागीदारांशी सातत्याने संपर्क साधला जात आहे.
जागतिक घडामोडी संबंधित बातम्या वाचण्यासाठी येथे क्लिक करा : Strait Of Hormuz: होर्मुझ सामुद्रधुनीत अमेरिकेचा ‘गुप्त मार्ग’; इराणी सैन्याला चकवून दररोज लाखो बॅरल तेलाची जागतिक बाजारात निर्यात
या जहाजाची लांबी तब्बल ७६.४३ मीटर आणि रुंदी १२ मीटर इतकी आहे. जहाजाचे अपहरण करणारे आठ समुद्री डाकू हे त्याच कुख्यात आंतरराष्ट्रीय नेटवर्कचे सदस्य असल्याचे मानले जात आहे, ज्यांनी यापूर्वी २६ एप्रिल रोजी ‘एम/व्ही स्वार्ड’ (M/V Sward) नावाच्या दुसऱ्या मालवाहू जहाजाचे अपहरण केले होते. डाकू सध्या हे जहाज डांगोरोयो जिल्ह्यातील गरमल जवळील एका दुर्गम किनारी भागात घेऊन गेल्याचे समजते.
जहाजात तुर्की लष्कराचे अत्यंत महत्त्वाचे आणि संवेदनशील शस्त्रसाठे असल्याने तुर्कीच्या नौदलाने यावर तात्काळ कठोर पावले उचलली आहेत. तुर्कीच्या दोन युद्धनौकांनी तात्काळ त्या भागात धाव घेतली असून, तुर्कीची लढाऊ हेलिकॉप्टर्स आणि स्टेल्थ टेहळणी ड्रोन्स आकाशातून सतत परिस्थितीवर लक्ष ठेवून आहेत.
या दरम्यान मंगळवारी या जहाजाच्या जवळ दोन माणसे असलेली एक छोटी संशयित बोट आली होती. ही बोट जहाजाला सामान पुरवून किनाऱ्याकडे परत जात असताना एका मोठ्या हवाई हल्ल्याने ती उडवून देण्यात आली. या हवाई हल्ल्यात बोटीवरील ४ संशयित जागीच ठार झाले असून इतर २ जण गंभीर जखमी झाल्याची माहिती समोर आली आहे. हा हल्ला नेमका कोणी केला याबद्दल अद्याप अधिकृत माहिती मिळालेली नाही.
जागतिक घडामोडी संबंधित बातम्या वाचण्यासाठी येथे क्लिक करा : Natalie Harp: मेलानिया अन् डोनाल्ड ट्रम्प यांच्यातील दुराव्याचे कारण नॅटली हार्प? व्हाईट हाऊसमधील अंतर्गत वादाचा खळबळजनक खुलासा
केवळ ‘एम/व्ही लुतुफ’च नाही, तर या भागातील चाच्यांचा धुमाकूळ दिवसेंदिवस वाढताना दिसतोय. यापूर्वी येमेनच्या मुकाला बंदरातून निघालेल्या ‘एमटी असाना’ या टांझानियाच्या ध्वजांकित तेलवाहू जहाजाचे (Oil Tanker) सात सशस्त्र सोमाली चाच्यांनी अपहरण केले होते. सोमालियाच्या ईशान्य भागातील बारी प्रदेशात असलेल्या कलुला किनाऱ्याजवळ हे तेलवाहू जहाज अडवून जप्त करण्यात आले होते. पाठोपाठ घडणाऱ्या या घटनांमुळे संपूर्ण लाल समुद्र आणि अरबी समुद्राला जोडणाऱ्या या आंतरराष्ट्रीय सागरी व्यापारी मार्गावर भीतीचे वातावरण पसरले आहे.
या सर्व घटनांमुळे हिंद महासागर आणि एडनच्या आखातातील सागरी व्यापारावर मोठे सावट पसरले आहे. जागतिक व्यापारी जहाजांना या क्षेत्रात सुरक्षेची ग्वाही देण्यासाठी आंतरराष्ट्रीय नौदल टास्क फोर्स (International Maritime Coalition) आणि विविध देश आता एकत्र येऊन सोमालियाच्या किनाऱ्याजवळ विशेष बंदोबस्त वाढवत आहेत. भारतीय खलाशांना सुरक्षित बाहेर काढणे हे सध्या भारतासमोरील सर्वात मोठे आव्हान बनले आहे.
.png "Videos"){kind=small}
