White House : कोण आहेत स्टीफन मिलर? निवडणूक हरल्यानंतर ट्रम्प यांनी का बनवले व्हाईट हाऊसचे चीफ ऑफ स्टाफ

White House : मध्यावधी निवडणुकांमधील पराभवानंतर, डोनाल्ड ट्रम्प यांनी स्टीफन मिलर यांची व्हाईट हाऊसचे नवे चीफ ऑफ स्टाफ म्हणून नियुक्ती केली. मिलर कोण आहेत आणि ते चर्चेत का आहेत, हे जाणून घ्या.'

• स्टीफन मिलर नवीन चीफ ऑफ स्टाफ
• कठोर स्थलांतर धोरणाचे शिल्पकार
• डेमोक्रॅट्सकडून तीव्र टीका

अमेरिकेच्या राजकारणात (White House) सध्या एका मोठ्या राजकीय घडामोडीमुळे खळबळ उडाली आहे. देशातील मध्यावधी निवडणुकांमध्ये रिपब्लिकन पक्षाला अपेक्षेप्रमाणे कामगिरी करता आलेली नाही, ज्यानंतर राष्ट्राध्यक्ष डोनाल्ड ट्रम्प यांनी आपल्या प्रशासनात मोठा फेरबदल केला आहे. ट्रम्प यांनी त्यांचे सर्वात विश्वासू, जुने आणि आक्रमक सल्लागार मानले गेलेले स्टीफन मिलर यांची व्हाईट हाऊसचे नवीन चीफ ऑफ स्टाफ म्हणून नियुक्ती केली आहे. मिलर हे आगामी ९ नोव्हेंबरपासून ही महत्त्वाची जबाबदारी हाती घेणार असून ते सुझी वाइल्स यांची जागा घेणार आहेत, ज्यांनी अलीकडेच आपल्या पदाचा राजीनामा दिला आहे.

 स्टीफन मिलर कोण आहेत आणि त्यांचे महत्त्व काय?

अवघ्या ४१ वर्षांचे स्टीफन मिलर हे २०१६ मधील पहिल्या राष्ट्रपती पदाच्या निवडणुकीपासून डोनाल्ड ट्रम्प यांचे अत्यंत विश्वासू रणनीतिकार आणि भाषणकार राहिले आहेत. ट्रम्प यांच्या प्रशासनात त्यांनी यापूर्वीही धोरणात्मक बाबींवर डेप्युटी चीफ ऑफ स्टाफ आणि राष्ट्रीय सुरक्षा सल्लागार म्हणून काम पाहिले आहे. अमेरिकेच्या राजकारणात स्थलांतर (Immigration) संबंधीची अत्यंत कडक आणि कठोर धोरणे आखण्यामागे मिलर यांचाच सर्वात मोठा वाटा राहिला आहे. ट्रम्प यांच्या मते, मिलर हे सुरुवातीपासून त्यांच्या प्रत्येक अजेंड्याशी एकनिष्ठ राहिले आहेत आणि त्यांना राजकारणाची अत्यंत बारीक जाण आहे.

जागतिक घडामोडी संबंधित बातम्या वाचण्यासाठी येथे क्लिक करा : National Cancer Awareness Day : ‘उपचारापेक्षा प्रतिबंध उत्तम’ हा या दिवसाचा मूळ मंत्र; जाणून घ्या महत्त्व आणि इतिहास

सुझी वाइल्स यांच्या राजीनाम्याचे कारण आणि राजकीय घडामोडी

ट्रम्प यांच्या दुसऱ्या कार्यकाळाची सुरुवात यशस्वीरीत्या पार पाडण्यात आणि प्रशासनात शिस्त आणण्यात आतापर्यंत चीफ ऑफ स्टाफ असलेल्या सुझी वाइल्स यांनी महत्त्वाची भूमिका बजावली होती. व्हाईट हाऊसचे हे सर्वोच्च पद भूषवणाऱ्या त्या पहिल्या महिला होत्या. मात्र, गेल्या काही महिन्यांपासून त्या त्यांच्या प्रकृतीच्या समस्येशी लढा देत होत्या. मार्च २०२६ मध्ये त्यांना स्तनाचा कर्करोग (Breast Cancer) झाल्याचे उघड झाले होते. जरी त्यांनी उपचारांनंतर स्वतःला कर्करोगमुक्त घोषित केले असले, तरी आता ट्रम्प यांनी त्यांना प्रशासकीय रचनेतून बदलून पक्षाच्या राजकीय संघटनेच्या जबाबदारीवर सोपवले आहे आणि त्यांच्या जागी स्टीफन मिलर यांना आणले आहे.

जागतिक घडामोडी संबंधित बातम्या वाचण्यासाठी येथे क्लिक करा : World Medical Physics Day: मेरी क्युरी यांच्या जन्मदिवशीच का साजरा केला जातो वैद्यकीय भौतिकशास्त्र दिन? वाचा रंजक माहिती

विरोधकांचा कडा विरोध आणि ‘अमेरिका फर्स्ट’चा आक्रमक पवित्रा

मध्यावधी निवडणुकांमध्ये मतदारांनी वर्तवलेला असंतोष आणि पक्षाचा पराभव पाहता, ट्रम्प आपली धोरणे मवाळ करतील अशी अपेक्षा विरोधकांना होती. परंतु, स्टीफन मिलर यांच्यासारख्या अतिशय कडक आणि उजव्या विचारसरणीच्या नेत्याला चीफ of स्टाफ बनवून ट्रम्प यांनी आपण आपल्या ‘अमेरिका फर्स्ट’ या धोरणावरून मागे हटणार नसल्याचे स्पष्ट संदेश दिला आहे.

या नियुक्तीवर डेमोक्रॅटिक पक्षाच्या नेत्यांनी कडाडून टीका केली आहे. काँग्रेसमन रॉबर्ट गार्सिया आणि भारतीय-अमेरिकन काँग्रेसमन रो खन्ना यांच्यासह कॅलिफोर्नियाचे गव्हर्नर गॅविन न्यूसम यांनीही या पदोन्नतीचा निषेध केला आहे. त्यांच्या मते, निवडणुकीच्या निकालांमधून जनतेचा कौल समजून घेण्याऐवजी ट्रम्प प्रशासनाने स्थलांतरित समुदायांविरोधात अधिक आक्रमक आणि ध्रुवीकरणाचे पाऊल उचलले आहे. येत्या काळात व्हाईट हाऊसचे हे निर्णय अमेरिकेच्या राजकारणात आणखी मोठी उलथापालथ घडवून आणण्याची शक्यता वर्तवली जात आहे.