इस्रायल-हमास युद्धाचे पडसाद! तुर्की संसदेने कोका-कोला आणि नेस्लेवर बंदी घातली, जाणून घ्या कारण

तुर्कीच्या संसदेने कथित इस्रायली आक्रमणाचे समर्थन करणाऱ्या कंपन्यांच्या उत्पादनांवर बहिष्कार टाकण्याचा निर्णय घेतला आहे. त्या कंपन्यांचा माल फेकून दिला जाईल, असे संसदेचे अध्यक्ष नोमन कुर्तुलमुस यांनी सांगितले.

इस्रायल-हमास युद्धादरम्यान, तुर्कीच्या संसदेने कथित ‘इस्रायली आक्रमणाला’ समर्थन देणाऱ्या आपल्या रेस्टॉरंटमधील अशा अनेक उत्पादनांच्या वापरावर बहिष्कार टाकला आहे. तुर्की संसदेचे अध्यक्ष नोमान कुर्तुलमुस यांनी म्हटले आहे की, संसद इस्रायलच्या आक्रमणाला पाठिंबा देणारी उत्पादने वापरणार नाही. “तुर्की ग्रँड नॅशनल असेंब्लीमध्ये, आम्ही इस्त्रायली आक्रमणास समर्थन करणार्‍या कंपन्यांची कोणतीही उत्पादने वापरणार नाही,” ते तुर्कीच्या उत्तर प्रांत ओर्डू येथे एका कार्यक्रमात बोलत होते.

टीआरटी न्यूजनुसार, नोमान कुर्तुलमुस यांनी म्हटले आहे की, आतापासून आम्ही त्या कंपन्यांकडून काहीही खरेदी करणार नाही आणि आम्ही जे खरेदी केले आहे ते फेकून देऊ. मात्र, संसद रेस्टॉरंटमधून कोणत्या कंपनीच्या उत्पादनांवर बंदी घालण्यात आली आहे, याची माहिती नोमानने दिलेली नाही. रॉयटर्सच्या म्हणण्यानुसार, तुर्कीच्या संसदेने कोका-कोला आणि नेस्लेच्या उत्पादनांवर बहिष्कार टाकला आहे. वृत्तसंस्थेने सूत्राच्या हवाल्याने म्हटले आहे की कोका-कोला आणि नेस्ले यांना संसद रेस्टॉरंटच्या मेनूमधून काढून टाकण्यात आले आहे.

इस्रायल-हमास युद्धात तुर्कीची भूमिका

गाझावरील इस्रायली हल्ल्यांबाबत तुर्कस्तानने प्रश्न उपस्थित केले आहेत आणि त्यासोबतच इस्रायलला मिळणाऱ्या पाश्चात्य समर्थनाचाही निषेध केला आहे. इस्रायल-हमास युद्धादरम्यान तुर्कीने इस्रायलमधून आपले राजदूत परत बोलावले होते. राजदूताच्या परतण्याबाबत तुर्कीच्या परराष्ट्र मंत्रालयाने म्हटले होते की, गाझामधील मानवतावादी शोकांतिका लक्षात घेऊन आम्ही आमच्या राजदूतांना परत बोलावले होते. परराष्ट्र मंत्रालयाने सांगितले की, आम्ही सल्लामसलत करण्यासाठी इस्रायलमधून आमचे राजदूत परत घेतले आहेत.