London Heathrow flight cancellations today
ब्रिटनमधील (UK Flights) विमान वाहतूक यंत्रणेला एका मोठ्या तांत्रिक बिघाडाचा भीषण फटका बसला आहे. देशातील मुख्य हवाई वाहतूक नियंत्रण प्रणालीमध्ये अचानक उद्भवलेल्या तांत्रिक दोषामुळे ३०० हून अधिक विमान उड्डाणे रद्द करावी लागली असून शेकडो विमानांना तासन्तास विलंब झाला आहे. या अचानक आलेल्या संकटामुळे लंडनच्या हिथ्रो आणि गॅटविकसह संपूर्ण देशातील प्रमुख विमानतळांवर प्रवाशांचा मोठा गोंधळ पाहायला मिळाला. ब्रिटनच्या नॅशनल एअर ट्रॅफिक सर्व्हिसेसने (NATS) या गोंधळाबद्दल जाहीर माफी मागितली असून यंत्रणा पूर्ववत करण्यासाठी तातडीने युद्धपातळीवर प्रयत्न केले.
मिळालेल्या माहितीनुसार, मंगळवारी दुपारी १:४६ च्या सुमारास NATS च्या मुख्य उड्डाण प्रक्रिया प्रणालीमध्ये (Flight Processing System) अचानक तांत्रिक अडचण निर्माण झाली. यामुळे विमान उड्डाणांची माहिती आणि वाहतूक नियंत्रण प्रक्रियेत सतत व्यत्यय येऊ लागला. हवाई क्षेत्रातील प्रवाशांची आणि विमानांची सुरक्षितता धोक्यात येऊ नये, यासाठी प्रशासनाला तातडीने कडक हवाई वाहतूक निर्बंध लागू करावे लागले. अभियंत्यांनी सुमारे दोन तासांच्या शर्थीच्या प्रयत्नांनंतर ही तांत्रिक समस्या शोधून ती दुरुस्त केली असली, तरी त्याचा परिणाम पुढील अनेक तास टिकून राहिला आणि संपूर्ण उड्डाण वेळापत्रक कोलमडले.
या तांत्रिक बिघाडाचा सर्वात मोठा फटका ब्रिटनमधील सर्वात व्यस्त मानल्या जाणाऱ्या लंडनच्या हिथ्रो (Heathrow) आणि गॅटविक (Gatwick) विमानतळांना बसला. हिथ्रो येथे दररोज होणाऱ्या सरासरी १,३०० उड्डाणांपैकी ३५२ हून अधिक उड्डाणांच्या वेळापत्रकावर गंभीर परिणाम झाला. तर गॅटविक विमानतळावरील सुमारे ८५० पैकी २८१ उड्डाणे रखडली. याशिवाय मँचेस्टर विमानतळावरील ६५० पैकी २४९ उड्डाणे प्रभावित झाली, तर बर्मिंगहॅम येथे ३०० पैकी १०१ उड्डाणांना विलंब झाला किंवा ती रद्द करावी लागली. ल्युटन, स्टॅनस्टेड आणि स्कॉटलंडमधील एडिनबर्ग विमानतळांवरही हेच चित्र पाहायला मिळाले, जिथे हजारो प्रवासी आपल्या विमानाची वाट पाहत ताटकळत बसले होते.
जागतिक घडामोडी संबंधित बातम्या वाचण्यासाठी येथे क्लिक करा : Trump Putin Call : युक्रेन युद्धावर मोठा निर्णय? ट्रम्प-पुतिन यांच्यात ‘हॉटलाईन’वर 60 मिनिटे संवाद; रशियाचा युरोपबाबत मोठा खुलासा
ब्रिटनमधील या तांत्रिक समस्येचा फटका केवळ यूकेपुरता मर्यादित राहिला नाही, तर संपूर्ण युरोपमधील हवाई वाहतुकीवर याचा परिणाम दिसून आला. आयर्लंडमधील डब्लिन विमानतळासह ग्लासगो, एबरडीन आणि बेलफास्ट येथून उड्डाण करणाऱ्या विमानांना मोठे नियमन सहन करावे लागले. युरोपीय हवाई सुरक्षा संस्था ‘युरोकंट्रोल’ (Eurocontrol) नुसार, ब्रिटनच्या हवाई क्षेत्रात प्रवेश न मिळाल्याने अनेक आंतरराष्ट्रीय विमानांना त्यांच्या मूळ विमानतळांवरच थांबवून ठेवावे लागले. अनेक उड्डाणे ऐनवेळी डायव्हर्ट करावी लागल्यामुळे विमानतळांवर प्रचंड गर्दी झाली आणि प्रवाशांचे नियोजित प्रवासाचे प्लॅन्स पार विस्कळीत झाले.
जागतिक घडामोडी संबंधित बातम्या वाचण्यासाठी येथे क्लिक करा : US-Iran War : होर्मुझच्या सामुद्रधुनीत थरार; जॉर्डनवर 20 क्षेपणास्त्रांचा मारा करून इराणकडून अमेरिकेचा पाणबुडी ड्रोन जप्त
विमानांची उड्डाणे अचानक ठप्प झाल्याने आणि काही वैमानिकांनी प्रवाशांना तांत्रिक दोषाची माहिती दिल्यामुळे, हा एखादा मोठा सायबर हल्ला (Cyber Attack) असू शकतो, अशी भीती प्रवाशांमध्ये आणि सोशल मीडियावर पसरली होती. मात्र, NATS च्या प्रवक्त्याने या सर्व शक्यता आणि अफवा पूर्णपणे नाकारल्या आहेत. ही समस्या केवळ उड्डाण डेटा प्रक्रियेतील अंतर्गत तांत्रिक चुकीमुळे झाली होती आणि सायबर हल्ल्याचा कोणताही पुरावा मिळालेला नाही, असे स्पष्टीकरण संस्थेकडून देण्यात आले.
या तांत्रिक गोंधळामुळे ब्रिटिश एअरवेज (British Airways), इझीजेट (EasyJet) आणि रायनएअर (Ryanair) यांसारख्या प्रमुख विमान कंपन्यांना मोठा फटका बसला. डेटा विश्लेषण कंपनी ‘सिरियम’च्या आकडेवारीनुसार, हिथ्रो आणि गॅटविक दरम्यान चालणारी सुमारे ९० उड्डाणे थेट रद्द करण्यात आली. रायनएअर कंपनीने आपली ५० हून अधिक उड्डाणे रद्द झाल्याची माहिती दिली, ज्यामुळे ६५,००० पेक्षा जास्त प्रवाशांचा प्रवास रखडला. विमाने आणि वैमानिक वेगवेगळ्या ठिकाणी अडकून पडल्यामुळे पुढील २४ ते ४८ तास हवाई सेवा पूर्ववत होण्यास वेळ लागेल, असा इशारा विमान कंपन्यांनी दिला आहे.
.png "Videos"){kind=small}
