Yemen Houthi war : येमेनमध्ये मोठा युद्धघोष! सरकारने हुथी विद्रोहींविरोधात पुकारले अंतिम युद्ध; भूभाग मुक्त करण्याची घेतली शपथ

Yemen Houthi war : येमेनमध्ये हौथींविरुद्ध लष्करी कारवाई जाहीर करण्यात आली आहे. सौदी अरामकोवर क्षेपणास्त्र-ड्रोन हल्ला केल्याचा दावा हौथींनी केला असून, रियाधने हा दावा फेटाळला आहे.

• येमेन अध्यक्षांची मोठी घोषणा
• अरामको हल्ल्याचा फेटाळलेला दावा
• ताइझ आघाडीवर संघर्षाचा भडका

मध्य पूर्वेतील अत्यंत संवेदनशील मानल्या जाणाऱ्या येमेनमध्ये राजकीय आणि लष्करी घडामोडींना अचानक वेग आला आहे. येमेनचे आंतरराष्ट्रीय स्तरावर मान्यताप्राप्त अध्यक्ष रशाद मोहम्मद अल-अलिमी यांनी हुथी विद्रोही (Yemen Houthi war) गटांच्या तावडीतून देशाचे उर्वरित भाग पूर्णपणे मुक्त करण्यासाठी एका व्यापक लष्करी कारवाईची घोषणा केली आहे. देश सध्या आपल्या इतिहासातील अत्यंत नाजूक आणि निर्णायक टप्प्यावर उभा असल्याचे स्पष्ट करत अध्यक्षांनी थेट सैन्याला रणनीतिक आदेश दिले आहेत. दीर्घकाळ शांततेचा मार्ग अवलंबून देशाने मोठे बलिदान दिले, मात्र आता नागरिकांचे मूलभूत हक्क, सुरक्षा आणि प्रतिष्ठा पुन्हा मिळवून देण्यासाठी ही लष्करी कारवाई अनिवार्य झाली असल्याचे त्यांनी नमूद केले.

या महत्त्वपूर्ण सैनिकी मोहिमेची घोषणा करताना अध्यक्ष अल-अलिमी यांनी स्पष्ट केले की, ही सैनिकी कारवाई केवळ आणि केवल हुथी या सशस्त्र विद्रोही गटाविरुद्ध आहे. सना, होदेदा आणि सादा या शहरांमधील सामान्य नागरिक हे या युद्धाचे लक्ष्य अजिबात नाहीत. अध्यक्षांनी हुथींच्या ताब्यातील भागांत राहणाऱ्या सामान्य जनतेला आवाहन केले आहे की, त्यांनी हुथींच्या लष्करी तळांपासून आणि गर्दीच्या ठिकाणांपासून दूर राहावे, तसेच आपल्या निष्पाप मुलांना या संघर्षात बळी पडण्यापासून वाचवावे. या कठीण प्रसंगात येमेनचे बंधू देश आणि आंतरराष्ट्रीय मित्रांनी एकत्र येऊन देशाच्या पाठीशी ठामपणे उभे राहावे, असे आवाहन त्यांनी केले.

सौदी अरेबियासोबतची युती आणि अरामको हल्ल्याचा वाद

आपल्या भाषणात अध्यक्ष अल-अलिमी यांनी सौदी अरेबियासोबतच्या संबंधांवर विशेष भर दिला. येमेन सौदी अरेबियाला आपल्या सामायिक सुरक्षेचा आणि उज्ज्वल भविष्याचा सर्वात विश्वासू आणि खरा भागीदार मानतो, असे सांगत त्यांनी रियाधने दिलेल्या सातत्यपूर्ण पाठिंब्याबद्दल मनःपूर्वक कृतज्ञता व्यक्त केली. मात्र, या लष्करी मोहिमेच्या घोषणेनंतर लागलीच हुथी विद्रोही गटाने एका मोठ्या लष्करी कारवाईचा दावा करत आंतरराष्ट्रीय स्तरावर खळबळ उडवून दिली.

जागतिक घडामोडी संबंधित बातम्या वाचण्यासाठी येथे क्लिक करा : Russia Plague Scare : रशियात न्यूमोनिक प्लेगची भीती? प्रयोगशाळेत कर्मचाऱ्याचा मृत्यू, 200 जण क्वारंटाईन

हुथींचे लष्करी प्रवक्ते याह्या सारी यांनी प्रसिद्ध केलेल्या निवेदनानुसार, त्यांच्या सैन्याने सौदी अरेबियाची राजधानी रियाध येथील नामांकित ‘अरामको’ तेल सुविधेवर बॅलिस्टिक क्षेपणास्त्रे आणि स्फोटक ड्रोन्सच्या साहाय्याने मोठा हल्ला चढवला. या हल्ल्यामुळे अरामको सुविधेमध्ये मोठी आग लागली आणि लक्ष्य यशस्वीरीत्या भेदण्यात आले, असा दावा हुथींच्या ‘अल मसिराह’ या वाहिनीवरून करण्यात आला. सौदीच्या विमानांनी सना व येमेनच्या इतर भागांवर केलेल्या हवाई हल्ल्यांना प्रत्युत्तर म्हणून ही कारवाई केल्याचे त्यांनी सांगितले. आंतरराष्ट्रीय वृत्तसंस्थांनीही रियाधच्या दक्षिणेला धुराचे लोट आणि ज्वाला दिसल्याचे प्राथमिक वृत्त दिले होते.

सौदी अरेबियाचा पलटवार: ‘बनावट विजयाचा बनाव’

हुथींच्या या दाव्यानंतर तात्काळ सौदी अरेबियाच्या नेतृत्वाखालील लष्करी आघाडीने आपली भूमिका स्पष्ट केली. सौदी आघाडीचे प्रवक्ते मेजर जनरल तुर्की अल-मलिकी यांनी हुथींचा हा दावा पूर्णपणे दिशाभूल करणारा आणि खोटा असल्याचे सांगत धुडकावून लावला. रणांगणावर आणि विशेषतः ताइझ आघाडीवर हुथी सैन्याचे झालेले प्रचंड नुकसान झाकण्यासाठी आणि स्वतःच्या समर्थकांमध्ये ‘बनावट विजय’ दाखवण्यासाठी हा रचलेला कट असल्याचे मलिकी यांनी सांगितले.

सौदी सैन्याने स्पष्ट केले की, हुथी सध्या अंतर्गत पातळीवर मोठ्या जनक्षोभाचा सामना करत आहेत. वाढता असंतोष आणि लष्करी आघाड्यांवर अपयशाची मालिका सुरू असल्याने जगाचे लक्ष भलतीकडे वळवण्यासाठी असे बिनबुडाचे दावे केले जात आहेत. येमेनी सरकारी सैन्याने दिलेल्या माहितीनुसार, तैझ आणि तुर अल-बहाह या रणनीतिक आघाड्यांवर त्यांनी हुथी-समर्थित दलांविरुद्ध एकाच वेळी ९७ पेक्षा जास्त यशस्वी लष्करी कारवाया केल्या आहेत, ज्यामध्ये हुथींचा मोठा दारूगोळा नष्ट झाला असून अनेक विद्रोही मारले गेले आहेत.

जागतिक घडामोडी संबंधित बातम्या वाचण्यासाठी येथे क्लिक करा : War Alert : ताजिक-अफगाण सीमेवर रशियाकडून अति-आधुनिक शस्त्रास्त्रांची तैनाती; आज मॉस्कोमध्ये महत्त्वाची आंतरराष्ट्रीय बैठक

ताइझमधील वाढता संघर्ष आणि मानवी संकटाची मालिका

येमेनचा सामरिकदृष्ट्या अत्यंत महत्त्वाचा मानला जाणारा ताइझ प्रदेश सध्या संघर्षाचे मुख्य केंद्र बनला आहे. हा भाग सध्या दोन हिश्शांमध्ये विभागला गेला असून, एका बाजूला हुथींचे नियंत्रण आहे तर दुसऱ्या बाजूला आंतरराष्ट्रीय स्तरावर मान्यताप्राप्त सरकारी सैन्याचा ताबा आहे. या भागात ताबा मिळवण्यासाठी दोन्ही बाजूंकडून चकमकी तीव्र झाल्या आहेत. येमेनी दलांनी सना आणि सादा या हुथींच्या बालेकिल्ल्यांवरही हल्ले तीव्र केले आहेत.

हा ताजा संघर्ष केवळ येमेनपुरता मर्यादित नसून त्याचा थेट परिणाम तांबड्या समुद्रातील (Red Sea) आंतरराष्ट्रीय सागरी मार्गावर आणि जागतिक ऊर्जा वाहतुकीवर होण्याची भीती व्यक्त केली जात आहे. दोन्ही बाजूंमधील शस्त्रसंधी संपुष्टात आल्यामुळे आणि लष्करी कारवाईची धार वाढल्यामुळे येमेनमध्ये पुन्हा एकदा गंभीर मानवी संकट उभे राहिले आहे. हजारो नागरिकांचे विस्थापन सुरू झाले असून, अन्नधान्य आणि वैद्यकीय पुरवठ्याची मोठी टंचाई निर्माण झाली आहे.