सोमवार, 5 ऑक्टोबर 2026
Russia Plague Scare : रशियात न्यूमोनिक प्लेगची भीती? प्रयोगशाळेत कर्मचाऱ्याचा मृत्यू, २०० जण क्वारंटाईन ( फोटो सौजन्य : सोशल मीडिया )
जागतिक स्तरावर विविध साथीच्या रोगांची भीती अजूनही ताजी असतानाच आता रशियातून एका मोठ्या आरोग्यविषयक चिंतेची बातमी समोर येत आहे. रशियाच्या (Russia Plague Scare) सायबेरियन प्रदेशातील अत्यंत संवेदनशील मानल्या जाणाऱ्या एका प्लेग-विरोधी संशोधन संस्थेत कर्मचाऱ्याचा अचानक मृत्यू झाल्याने संपूर्ण परिसरात आणि वैद्यकीय विश्वात खळबळ उडाली आहे. या दुर्दैवी घटनेनंतर न्यूमोनिक प्लेग किंवा इतर एखाद्या अत्यंत धोकादायक संसर्गाची लागण झाली असावी अशी तीव्र शंका व्यक्त केली जात आहे. खबरदारीचा उपाय म्हणून प्रशासनाने तातडीने पावले उचलत सुमारे २०० कर्मचाऱ्यांना विलगीकरणात (Quarantine) ठेवले आहे.
सरकारी वृत्तसंस्था TASS आणि रशियन आरोग्य देखरेख संस्था ‘रोस्पोट्रेबनादझोर’ (Rospotrebnadzor) यांनी दिलेल्या माहितीनुसार, ही संपूर्ण घटना इर्कुत्स्क शहराजवळील शेलेखोव्ह येथे असलेल्या प्लेग-विरोधी संशोधन संस्थेत घडली. ही संस्था अत्यंत संसर्गजन्य, प्राणघातक आणि धोकादायक मानल्या जाणाऱ्या रोगांवर संशोधन करण्यासाठी ओळखली जाते. प्रयोगशाळेत काम करणाऱ्या या कर्मचाऱ्याला अचानक तीव्र स्वरूपाचा न्यूमोनिया झाला होता. संशोधन संस्थेतच उपचार सुरू असताना त्याची प्रकृती झपाट्याने खालावली आणि अखेर त्याचा मृत्यू झाला. न्यूमोनियामागील नेमके कारण अद्याप अस्पष्ट असल्याने आरोग्य यंत्रणा अधिक सतर्क झाली आहे.
जागतिक घडामोडी संबंधित बातम्या वाचण्यासाठी येथे क्लिक करा : Trump SIF: AI महासंग्रामाला सुरुवात! एआय वर्चस्वासाठी ट्रम्प यांनी स्थापन केली ‘सुपर इंटेलिजन्स फोर्स’; झाला ‘हा’ मोठा करार
या घटनेची माहिती पसरताच स्थानिक रहिवाशांमध्ये भीतीचे वातावरण निर्माण झाले असून लॉकडाऊन लागण्याची शक्यता वर्तवली जात आहे. परिस्थितीचे गांभीर्य ओळखून स्थानिक साथीविरोधी परिषदेची तातडीची उच्चस्तरीय बैठक बोलावण्यात आली. इर्कुत्स्कचे राज्यपाल इगोर कोबझेव्ह यांनी बैठकीनंतर जनतेला संयम बाळगण्याचे आवाहन केले. “परिसरात एका अत्यंत धोकादायक संसर्गाची संशयित घटना समोर आल्याने आम्ही तातडीने बैठक घेतली आहे, परंतु नागरिकांनी घाबरून जाण्याचे किंवा अफवा पसरवण्याचे कोणतेही कारण नाही. परिस्थिती पूर्णपणे प्रशासनाच्या नियंत्रणात आहे,” असे त्यांनी स्पष्ट केले.
संशोधन केंद्राच्या आसपासच्या औद्योगिक क्षेत्रांमध्येही आता कडक खबरदारीचे उपाय राबवले जात आहेत. शेलेखोव्ह येथील प्रसिद्ध इर्कुत्स्क ॲल्युमिनियम प्लांटच्या प्रशासनाने आपल्या सर्व कामगारांना कामावर असताना चेहऱ्यावर मास्क वापरणे अनिवार्य केले आहे. ॲल्युमिनियम प्लांटचे प्रमुख आर्टेम फोमिनिख यांनी सांगितले की, सोशल मीडिया आणि स्थानिक पातळीवर या घटनेबाबत अनेक परस्परविरोधी बातम्या पसरत आहेत. नागरिकांनी केवळ अधिकृत वक्तव्यांवरच विश्वास ठेवावा आणि शांतता राखावी.
जागतिक घडामोडी संबंधित बातम्या वाचण्यासाठी येथे क्लिक करा : Flydubai FZ1073 : तेल अवीवमध्ये विमान पाडण्याचा होता कट; जाणून घ्या फ्लायदुबई विमानाच्या 30 सेकंदांच्या थराराची संपूर्ण कहाणी
दरम्यान, रशियाच्या सार्वजनिक आरोग्य विभागाचे माजी प्रमुख आणि ज्येष्ठ तज्ञ गेनाडी ओनिशचेन्को यांनी यावर आपले मत व्यक्त केले आहे. त्यांच्या मते, सायबेरियात आढळलेला हा प्रकार प्लेग असण्याची शक्यता फार कमी आहे. अगदी प्रयोगशाळेतील चाचण्यांमध्ये प्लेगची पुष्टी झाली तरीही, सध्याची आरोग्य यंत्रणा पाहता हा आजार मोठ्या प्रमाणावर पसरण्याचा धोका नगण्य आहे. आतापर्यंत मृत कर्मचाऱ्याच्या संपर्कात आलेल्या सर्व २०० व्यक्तींच्या प्राथमिक चाचण्यांचे अहवाल सुदैवाने नकारात्मक (Negative) आले असून कोणामध्येही आजाराची लक्षणे दिसलेली नाहीत. तरीही पूर्ण खबरदारी म्हणून त्यांना काही दिवस डॉक्टरांच्या कडक देखरेखीखाली ठेवले जाणार आहे.
