Fastag Annual Pass: कसा मिळेल नवा पास, किती होईल बचत? जाणून घ्या सर्वकाही

15 ऑगस्ट 2025 पासून फास्टटॅगचा नवा वार्षिक पास सुरु होणार आहे. आता हा पास तुम्ही खरेदी करू शकणार आहात. चला याबद्दल अधिक माहिती जाणून घेऊयात.

टोल प्लाझावरील वाहनाच्या लांबच लांब रांगा कमी करण्यासाठी केंद्र सरकारने एक महत्वाचा निर्णय घेतला. तो म्हणजे फास्टटॅग अनिवार्य करण्याचा निर्णय. यामुळे देशाने डिजिटल पेमेंटकडे एक पाऊल टाकले. यानंतर आता केंद्र सरकारने काही दिवसांपूर्वीच फास्टटॅगचा वार्षिक पास आणणार असे जाहीर केले.

येत्या 15 ऑगस्टपासून फास्टॅगचा वार्षिक पास सुरू होणार आहे. केंद्रीय मंत्री नितीन गडकरी यांनी काही महिन्यांपूर्वी याची घोषणा केली होती. फास्टॅग वार्षिक पास हा रस्ते वाहतूक आणि महामार्ग मंत्रालयाने सुरू केलेली प्रीपेड टोल पेमेंट योजना आहे. ही योजना कार, जीप आणि व्हॅन सारख्या नॉन कमर्शियल आणि खाजगी वाहनांसाठी सुरू केली जात आहे, जेणेकरून टोल पेमेंटचा खर्च कमी करता येईल.

जर तुम्हाला तुमच्या कारसाठी वार्षिक फास्टॅग पास घ्यायचा असेल, तर आज आपण या पासशी संबंधित प्रत्येक प्रश्नाचे उत्तर जाणून घेणार आहोत. जसे की त्याची किंमत किती असेल? ते किती दिवस चालेल? तुम्ही किती टोल ओलांडू शकाल? तुम्ही ते कसे खरेदी कराल? ते एकापेक्षा जास्त कार्ससाठी वापरले जाऊ शकते का? ते कोणत्या एक्सप्रेसवे आणि महामार्गांवर चालेल? इत्यादी

वार्षिक पास कसे खरेदी कराल?

हा पास खरेदी करण्यासाठी, गुगल प्ले स्टोअर किंवा Apple App स्टोअर वरून राजमार्गयात्रा ॲप डाउनलोड करा. या ॲपमध्ये तुम्हाला फास्टॅग पास खरेदी करण्याचा किंवा रिन्यू करण्याचा पर्याय मिळेल. येथे आवश्यक माहिती देऊन आणि चार्जेस भरल्यानंतर पास सक्रिय केला जाऊ शकतो. या पाससाठी नवीन फास्टॅग खरेदी करण्याची आवश्यकता नाही. हा पास सध्याच्या फास्टॅगवर देखील ॲक्टिव्ह केला जाऊ शकतो.

2 वाहनासाठी हा पास वापरला जाऊ शकतो का?

नाही! तुम्ही हा पास फक्त एकाच वाहनासाठी वापरू शकता. ज्या वाहनाची नोंदणी FASTag शी जोडलेली आहे त्यावरच हा पास काम करेल. जर पास दुसऱ्या वाहनावर वापरला तर तो ब्लॉक होऊ शकतो. नवीन नियमांनुसार, FASTag वाहनाच्या विंडशील्डवर योग्यरित्या बसवावा लागेल. जर असे केले नाही तर ते ब्लॅक लिस्ट केले जाऊ शकते.

पासची फी आणि मर्यादा?

FASTag खरेदी करण्यासाठी आकारण्यात येणारा चार्ज 3000 रुपये आहे. एकदा खरेदी केल्यानंतर, हा पास एक वर्ष किंवा 200 ट्रिपसाठी व्हॅलिड असेल. टोल मर्यादा किंवा वेळ संपल्यानंतर, तो पुन्हा रिन्यू करावा लागेल. चांगली गोष्ट म्हणजे या पाससह, तुमच्या टोल चार्जेसची सरासरी किंमत 15 रुपये होईल, जी आतापर्यंत 50 रुपये होती.

FASTag पास कुठे काम करेल?

FASTag वार्षिक पास फक्त केंद्र सरकारच्या महामार्ग आणि एक्सप्रेसवेवरच काम करेल. म्हणजेच, ज्यांची देखभाल राष्ट्रीय महामार्ग प्राधिकरण (NHAI) करते. लक्षात ठेवा, हा पास राज्य सरकारच्या महामार्ग आणि एक्सप्रेसवेवर लागू होणार नाही. येथून जाण्यासाठी तुम्हाला पूर्वीप्रमाणेच टोल शुल्क भरावे लागेल.

200 फेऱ्या कशा मोजल्या जातील?

टोलवरील प्रत्येक क्रॉसिंग एक ट्रिप म्हणून मोजली जाईल. जर एखादा टोल बंद असेल, तर तिथून येणे आणि जाणे एक ट्रिप म्हणून गणले जाईल. अशा प्रकारे, 200 फेऱ्या पूर्ण झाल्यानंतर पासची वैधता संपेल. यानंतर, पास पुन्हा रिन्यू करावा लागेल.

हा पास कोणासाठी फायदेशीर असेल?

वर्षभरात टोल रोडवर 2,500 ते 3,000 किलोमीटर प्रवास करणाऱ्या प्रवाशांसाठी हा पास खूप फायदेशीर ठरेल. यामुळे टोलवरील रांग कमी तर होईलच. शिवाय टोल चार्जेसवरील वादातही घट होईल. टोलवरील गर्दी कमी करणे, प्रवाशांना सुविधा देणे आणि कामकाज सुधारणे हा या पासचा उद्देश आहे.