जगभरात चाललेल्या युद्धजन्य परिस्थितीमुळे निर्यातीत अडथळे येत असतानाही, ह्युंदाई मोटर इंडिया लिमिटेडने (HMIL) २०२६ मधील ऑगस्ट महिन्यात देशांतर्गत बाजारात आतापर्यंतची सर्वाधिक ५४,३9६ वाहने विकून नवा विक्रम प्रस्थापित केला आहे. गेल्या वर्षी याच कालावधीत ४४,०१० युनिट्सची विक्री झाली होती, ज्याच्या तुलनेत यावर्षी २३.६ टक्क्यांची वाढ नोंदवली गेली आहे. या महिन्यात निर्यातीसह एकूण विक्री ६५,७९६ युनिट्सवर पोहोचली असून, यामध्ये वार्षिक आधारावर ८.८ टक्क्यांची वाढ झाली आहे.
कंपनीच्या निर्यातीच्या तुलनेत स्थानिक व्यवसाय म्हणजेच देशांतर्गत विक्रीने खूपच सरस कामगिरी केली आहे. भारतीय बाजारात कंपनीने दुहेरी अंकी वाढ नोंदवली असून, या यशामागे कंपनीचे वैविध्यपूर्ण उत्पादन पोर्टफोलिओ मुख्य कारण असल्याचे कंपनीने म्हटले आहे. यात विशेषतः ‘क्रेटा’ कार आघाडीवर असून तिची लोकप्रियता अगदी कायम आहे. क्रेटाचे नवीन जनरेशन मॉडेल २०२७ मध्ये अंतर्गत आणि बाह्य बदलांसह लाँच होणार आहे, तर ‘व्हेन्यू’ नवीन अवतारात नुकतीच बाजारात आली आहे. याशिवाय, चालू आर्थिक वर्षाच्या चौथ्या तिमाहीत उच्च व्हॉल्यूम विक्रीचे लक्ष्य डोळ्यांसमोर ठेवून ह्युंदाई एक नवीन स्थानिक पातळीवर उत्पादित केलेली कॉम्पॅक्ट इलेक्ट्रिक एसयूव्ही बाजारात आणण्याच्या तयारीत आहे. उर्वरित विक्रीत गेल्या महिन्यात ११,४०० युनिट्सची निर्यात नोंदवली गेली.
दरम्यान, पश्चिम आशियातील सुरू असलेला संघर्ष परिस्थितीमुळे निर्माण झालेल्या लॉजिस्टिक समस्यांमुळे कंपनीच्या निर्यातीवर काही प्रमाणात ताण आला होता. यामुळे परदेशी बाजारपेठेत वाहने पाठवण्याच्या क्षमतेवर परिणाम झाला खरा. मात्र, परिस्थिती सुधारल्यास निर्यातीची स्थिती सुधारेल अशी अपेक्षा ह्युंदाईने व्यक्त केली आहे. याबाबत बोलताना ह्युंदाई मोटर इंडियाचे एमडी आणि सीईओ तरुण गर्ग म्हणाले,
“आम्ही आर्थिक वर्ष २०२७ मध्ये मजबूत वाढीचा वेग कायम ठेवला आहे, ज्यामध्ये एप्रिल-ऑगस्ट या कालावधीत देशांतर्गत विक्री १२.६ टक्क्यांनी वाढली आहे. ऑगस्ट महिन्यातील आमची ५४,३९६ युनिट्सची देशांतर्गत विक्री हा कोणत्याही ऑगस्ट महिन्यातील आतापर्यंतचा उच्चांक आहे, जो ह्युंदाईच्या अष्टपैलू उत्पादन पोर्टफोलिओची लोकप्रियता दर्शवतो. पश्चिम आशियातील संघर्ष आणि भू-राजकीय परिस्थितीमुळे ऑगस्टमध्ये एकूण निर्यातीवर परिणाम झाला असला, तरी भू-राजकीय परिस्थिती सुधारल्यास आगामी महिन्यांत निर्यातीची मागणी मजबूत राहील असा आम्हाला विश्वास आहे.”
ब्रँडच्या या विक्री कामगिरीमुळे आर्थिक वर्ष २०२७ च्या पहिल्या पाच महिन्यांत ह्युंदाईचा सकारात्मक प्रवास अधिक मजबूत झाला आहे. एप्रिल ते ऑगस्ट २०२६ या कालावधीतील देशांतर्गत विक्रीत वार्षिक १२.६ टक्क्यांची वाढ झाली आहे. तसेच कंपनीने २०३० पर्यंत पारंपारिक इंजिन तसेच इलेक्ट्रिक वाहनांचे नवे मॉडेल आणि अपडेट्स आणण्याची व्यापक योजना आखली आहे.
.png "Videos"){kind=small}
