FASTag Rules in Mumbai: 1 एप्रिलपासून FASTagचे नवे नियम! ‘या’ वाहनांना मिळणार टोलमधून खास सूट

FASTag Rules in Mumbai: मुंबईतील टोल नाक्यांवर FASTag वापरण्यास प्राधान्य देण्यात आले आहे. १ एप्रिल २०२५ पासून FASTag असलेल्या वाहनांना टोल भरण्यासाठी अधिक सुविधा मिळणार असून, वाहनांच्या रांगा आणि प्रतीक्षा वेळ कमी करण्यावर भर आहे.

• मुंबईच्या टोल नाक्यांवर FASTagला प्राधान्य
• FASTag नसल्यास दुप्पट टोल लागू होऊ शकतो
• प्रवासापूर्वी FASTagची शिल्लक तपासा

FASTag Rules Mumbai: मुंबईत गाडी चालवणाऱ्या वाहनधारकांसाठी फास्टॅग आता अधिक महत्त्वाचा ठरणार आहे. टोल नाक्यावर पैसे भरण्यासाठी लागणारा वेळ कमी व्हावा आणि वाहनांच्या लांबच लांब रांगा टाळता याव्यात, यासाठी फास्टॅगचा वापर वाढवण्यावर भर दिला जात आहे. महाराष्ट्र राज्य रस्ते विकास महामंडळाकडून याबाबत महत्त्वाची माहिती देण्यात आली होती. १ एप्रिल २०२५ पासून मुंबईतील टोल नाक्यांवर फास्टॅगला प्राधान्य देण्यात येत आहे. त्यामुळे मुंबईतून किंवा मुंबईकडे प्रवास करणाऱ्या वाहनचालकांनी आपल्या गाडीला फास्टॅग लावलेला आहे की नाही, तसेच त्यामध्ये पुरेशी रक्कम आहे की नाही, हे आधीच तपासून घेणे गरजेचे आहे.

फास्टॅग नसताना टोल नाक्यावर पोहोचलात तर तुमच्या खिशाला जास्त फटका बसू शकतो. अशा वाहनांकडून नियमित शुल्काच्या तुलनेत दुप्पट टोल घेतला जाऊ शकतो. विशेष म्हणजे हा अतिरिक्त टोल रोख रक्कम, कार्ड किंवा UPIच्या माध्यमातून भरता येतो. FASTag Rules in Mumbai:

कोणत्या वाहनांना आहे सवलत?

फास्टॅगच्या या नियमातून काही वाहनांना सूट देण्यात आली आहे. स्कूल बस, हलकी मोटार वाहने आणि राज्य परिवहन मंडळाच्या बस यांचा त्यामध्ये समावेश आहे. मुंबईत येण्यासाठी असलेल्या मुलुंड पश्चिम, मुलुंड पूर्व, ऐरोली, दहिसर आणि वाशी या प्रमुख टोल ठिकाणी संबंधित वाहनांना फास्टॅगच्या नियमातून सवलत मिळते.

मात्र मुंबई-पुणे एक्सप्रेसवे, जुना मुंबई-पुणे महामार्ग आणि मुंबई-नागपूर समृद्धी महामार्गासारख्या महत्त्वाच्या मार्गांवर फास्टॅगची अंमलबजावणी अधिक कडकपणे केली जात आहे.

फास्टॅग कुठून घ्यायचा?

अजूनही तुमच्या वाहनावर फास्टॅग नसेल तर तो मिळवणे फार अवघड नाही. विविध बँका तसेच ऑनलाइन प्लॅटफॉर्मच्या माध्यमातून फास्टॅग घेता येतो. पेटीएम, अमेझॉन किंवा संबंधित बँकेच्या वेबसाइट आणि अॅपवरून त्यासाठी अर्ज करता येतो.

फास्टॅग घेतल्यानंतर त्यामध्ये पैसे ठेवणेही सोपे आहे. फोनपे, गुगलपे, अमेझॉनपे यांसारख्या डिजिटल पेमेंट अॅपच्या मदतीने फास्टॅगमध्ये रक्कम भरता येते. त्यामुळे प्रवास सुरू करण्यापूर्वी बॅलन्स पाहून घेणे चांगले.

फास्टॅग असूनही दुप्पट टोल कसा लागू शकतो?

फास्टॅग गाडीला लावलेला आहे म्हणजे प्रत्येक वेळी टोल आपोआप भरला जाईलच असे नाही. काही कारणामुळे फास्टॅग ब्लॅकलिस्ट झालेला असेल तर अडचण निर्माण होऊ शकते.

उदाहरणार्थ, फास्टॅगमध्ये पैसे नसल्यामुळे तो ब्लॅकलिस्ट झाला आणि नंतर तुम्ही त्यात पैसे भरले, तरी त्याची माहिती लगेच अपडेट होईलच असे नाही. काही वेळा नवीन बॅलन्स सिस्टममध्ये दिसण्यासाठी वेळ लागू शकतो.

अशा वेळी टोल नाक्यावर पोहोचल्यावर फास्टॅगमधून शुल्क वजा होऊ शकत नाही. परिणामी वाहनचालकाला दुप्पट टोल भरावा लागू शकतो. म्हणून लांबचा प्रवास सुरू करण्याआधी फास्टॅगचा बॅलन्स आणि त्याची स्थिती एकदा तपासणे नेहमीच फायदेशीर ठरेल. काही अडचण दिसत असेल तर टोल नाक्यावर पोहोचण्यापूर्वीच ती सोडवणे चांगले. थोडी काळजी घेतली तर अनावश्यक खर्च आणि टोलवरील त्रास दोन्ही टाळता येऊ शकतात.