Simple OneS इलेक्ट्रिक स्कूटर भारतात बंद! 190 किमी रेंजसह आलेली स्कूटर आता मार्केटमधून गायब; जाणून घ्या काय आहे कारण

सिंपल वनएसने स्पोर्टी इलेक्ट्रिक स्कूटर सेगमेंटमध्ये दमदार फीचर्स आणि रेंजसह आपली वेगळी ओळख निर्माण केली होती. पण आता कंपनीने हे मॉडेल बंद केल्याने एथर 450 सीरीजसारख्या स्कूटर्सना टक्कर देणारा पर्याय सिंपलच्या रेंजमध्ये उरलेला नाही.

• सिंपल वनएसची भारतातील विक्री बंद; स्कूटरची सुरुवातीची किंमत ₹1,77,999 होती.
• 3.7 kWh बॅटरी, 190 किमी IDC रेंज आणि 52 Nm पीक टॉर्क मिळत होता.
• वनएस बंद झाल्याने सिंपलच्या इलेक्ट्रिक स्कूटर रेंजमध्ये ₹30,000 ची मोठी किंमत दरी निर्माण झाली.

बंगळुरूस्थित सिंपल एनर्जीने आपली सिंपल वनएस इलेक्ट्रिक स्कूटर भारतीय मार्केटमधून शांतपणे बंद केली आहे. कंपनीने या मॉडेलची विक्री थांबवल्याने सिंपलच्या इलेक्ट्रिक स्कूटर रेंजमध्ये आता मोठी दरी निर्माण झाली आहे. वनएसची सुरुवातीची एक्स-शोरूम किंमत बंगळुरूमध्ये ₹1,77,999 होती.

सिंपल वनएसमध्ये 3.7 kWh बॅटरी पॅक देण्यात आला होता. कंपनीच्या दाव्यानुसार ही स्कूटर IDC सायकलमध्ये 190 किमीपर्यंत रेंज देत होती. यात मिड-माउंटेड इलेक्ट्रिक मोटर देण्यात आली असून ती 6.4 kW पॉवर आणि 52 Nm पीक टॉर्क तयार करत होती. स्कूटरचा दावा केलेला टॉप स्पीड 90 kmph होता. रायडिंगसाठी Eco X, Eco, Ride आणि Air असे 4 मोड देण्यात आले होते.

टीव्हीएससोबत बिझनेस करण्याची संधी! Paddock पार्टनरशिपसाठी कंपनीकडून उद्योजकांना आमंत्रण

फीचर्सच्या बाबतीतही वनएस फारशी मागे नव्हती. यात 7-इंच TFT कन्सोल मिळत होता. ब्लूटूथ कनेक्टिव्हिटी, टर्न-बाय-टर्न नेव्हिगेशन, कॉल आणि SMS अलर्ट, हिल होल्ड असिस्ट, रिव्हर्स मोड, Find My Scooter आणि OTA सॉफ्टवेअर अपडेट्स यांसारखी फीचर्स देण्यात आली होती. याशिवाय 35-लिटर अंडरसीट स्टोरेज आणि USB चार्जिंग पोर्टही मिळत होता.

राइडिंग हार्डवेअरमध्ये पुढे टेलिस्कोपिक फोर्क आणि मागे मोनोशॉक देण्यात आला होता. 12-इंच व्हील्सवर दोन्ही बाजूंना डिस्क ब्रेक्स आणि CBS ब्रेकिंग सिस्टीम मिळत होती. त्यामुळे शहरातील दैनंदिन वापरासोबत लांब पल्ल्याच्या राइडसाठीही ही स्कूटर चांगला आकर्षक पर्याय ठरत होती.

Honda QC3 vs TVS iQube 3.1 kWh: किंमत, रेंज आणि फीचर्समध्ये कोण किती पुढे? जाणून घ्या

वनएस बंद झाल्यानंतर सिंपलच्या रेंजमध्ये एंट्री-लेव्हल आणि स्पोर्ट स्कूटरमध्ये स्पष्ट अंतर दिसत आहे. सध्या सिंपल वेव्हची किंमत ₹1,09,999 ते ₹1,74,999 असून ती फॅमिली कस्टमर्सना लक्षात घेऊन तयार करण्यात आली आहे. दुसरीकडे सिंपल वनची किंमत ₹2,04,999 आहे. म्हणजेच दोन्ही मॉडेलमध्ये सुमारे ₹30,000 ची तफावत आहे.

विशेष म्हणजे वनएसची फीचर्स आणि रेंज पाहता ती एथर 450 सीरीजसारख्या स्पोर्टी इलेक्ट्रिक स्कूटरना थेट टक्कर देऊ शकत होती. आता हे मॉडेल बंद झाल्याने सिंपल एनर्जीला या सेगमेंटमध्ये आपली जागा पुन्हा मजबूत करण्यासाठी नव्या मॉडेलची गरज भासू शकते.