India-Argentina Trade: संकटात ‘हा’ देश ठरला खरा मित्र; भारतासाठी वाढवला LPG गॅस पुरवठा

मध्य पूर्वेतील सुरू असलेल्या संघर्षामुळे निर्माण झालेल्या तुटवड्याच्या पार्श्वभूमीवर अर्जेंटिनाने भारताला आपला एलपीजी पुरवठा वाढवला आहे. अर्जेंटिनाने २०२६ च्या पहिल्या तीन महिन्यांत भारताला ५०,००० टन एलपीजी पाठवला.

• अर्जेंटिनाकडून भारताला मोठा दिलासा
• अर्जेंटिना भारताच्या LPG बाजारात वाढवतोय हिस्सा
• अर्जेंटिनाकडून भारताला ५०,००० टन गॅस पुरवठा

 

India-Argentina Trade: मध्य पूर्वेतील सुरू असलेल्या संघर्षामुळे निर्माण झालेल्या तुटवड्याच्या पार्श्वभूमीवर अर्जेंटिनाने भारताला आपला एलपीजी पुरवठा वाढवला आहे. अर्जेंटिनाने २०२६ च्या पहिल्या तीन महिन्यांत भारताला ५०,००० टन एलपीजी पाठवला, जो २०२५ मध्ये पुरवलेल्या २२,००० टनांपेक्षा दुप्पट आहे. युद्ध सुरू होण्यापूर्वी बाहिया ब्लान्का बंदरातून अंदाजे ३९,००० एलपीजी टन पाठविण्यात आला होता. ५ मार्च रोजी आणखी ११,००० टनांचा माल पाठविण्यात आला.

हे देखील वाचा: India GDP Growth: मध्यपूर्वेतील संघर्षाच्या पार्श्वभूमीवर मूडीजचा आतापर्यंतचा सर्वात मोठा इशारा; भारताचा जीडीपी ४ % ने घटणार?

सरकारी आकडेवारीनुसार, जानेवारी २०२६ मध्ये अर्जेंटिनाचे नैसर्गिक वायूवर चालणारे एलपीजी उत्पादन २५९,००० टन होते. वार्षिक उत्पादन २०२४ मधील २.६ दशलक्ष टनांवरून २०२५ मध्ये २.६३ दशलक्ष टनांपर्यंत वाढले. विशेष म्हणजे, २०२४ पूर्वी भारताला अर्जेंटिनाकडून एलपीजीची कोणतीही निर्यात झाली नव्हती. अर्जेंटिनाकडून बाजारातील हिस्सा वाढवण्याची तयारी करत असल्याचेही दिसून येत आहे. मिळालेल्या अहवालानुसार, हा दक्षिण अमेरिकन देश आता भारताच्या एलपीजी बाजारात आपला हिस्सा वाढवण्याची तयारी करत आहे.

अर्जेंटिना २०२६ मध्ये आपल्या बाहिया ब्लान्का येथील प्रक्रिया प्रकल्पात एक नवीन नैसर्गिक वायू द्रव अंशांकन युनिट कार्यान्वित करण्याची योजना आखत आहे, त्यामुळे प्रक्रिया केलेले उत्पादन वाढेल आणि निर्यात बाजारासाठी अतिरिक्त साठा तयार होईल. अर्जेंटिना दक्षिण अमेरिकेत भारतासाठी एक प्रमुख आर्थिक भागीदार म्हणून उदयास येत आहे. जानेवारी ते नोव्हेंबर २०२५ दरम्यान द्विपक्षीय व्यापार ३६.७७% ने वाढून ६.३४ अब्ज डॉलरवर पोहोचला. भारत हा अर्जेंटिनाचा पाचवा सर्वांत मोठा व्यापारी भागीदार आणि निर्यातीचे ठिकाण आहे.

हे देखील वाचा: LPG Gas Cylinder: गॅस सिलिंडरबाबत सरकारचा महत्त्वाचा निर्णय; आता फक्त ‘इतकाच’ गॅस मिळणार, दरांमध्येही एक महत्त्वपूर्ण बदल जाहीर

अर्जेटिना भारताला खाद्यतेलाचा, विशेषतः सोयाबीन तेलाचा, एक प्रमुख पुरवठादार आहे. इतर प्रमुख आयातीमध्ये सूर्यफूल तेल, प्रक्रिया केलेले चामडे, धान्य, अवशिष्ट रसायने आणि कडधान्ये यांचा समावेश आहे. भारतात निर्माण झालेल्या LPG तुटवड्यामुळे भारत- अर्जेटिना व्यापाराला वेग आल्याचे दिसून येत आहे. ज्यामुळे दोन्ही देशातील व्यापार संबंध अधिक मजबूत होत आहेत.