(फोटो सौजन्य - सोशल मीडिया)
आता आगामी सणासुदीचा काळ जसजसा जवळ येत आहे तसतशी सोन्याच्या दरातही तेजी पाहायला मिळणार आहे. आजचा आकडा हा मागील साडेतीन महिन्यांतील दरांमधील उच्चांक आकडा आहे. जागतिक स्तरावर सुरु असलेल्या घडामोडींचा परिणाम नेहमीच सोन्याच्या दरांवर दिसून येतो. त्याचबरोबर अमेरिकन डॉलरमधील चढ-उतार आणि मध्यवर्ती बँकांची खरेदी यांचाही मोठा परिणाम सोन्याच्या दरात दिसून येतो. आता भारतातील सणासुदीच्या काळात दागिन्यांना मिळणारी वाढती मागणी या तेजीला मोठा आधार देत आहे. यासगळ्याबाबत तज्ज्ञांनी आपलं मत व्यक्त केलं आहे.
काम ज्वेलरीचे संस्थापक आणि व्यवस्थापकीय संचालक कॉलिन शाह यांनी सोन्याच्या सध्याच्या कामगिरीबाबत बोलताना त्यांनी सध्याची परिस्थिती आणि कारणीभूत घटकांबाबत सांगितलं. सोन्याच्या किमती आणखी जोर धरणार असल्याचंही त्यांनी यावेळी स्पष्ट केलं.
सोन्याच्या सध्याच्या वर्तवणूकीबाबत बोलताना कॉलिन शाह म्हणाले, “सोन्याच्या दरातील तीव्र तेजी ही बदलत्या जागतिक आर्थिक परिस्थितीत सुरक्षित गुंतवणुकीचे साधन म्हणून सोन्याचे असलेले महत्त्व अधोरेखित करते. यापूर्वी सोन्याच्या दरातील तेजीला अडथळा ठरलेल्या काही घटकांमध्ये बदल झाल्याने सध्याच्या तेजीला मोठा वेग मिळाला आहे. आगामी काळात अमेरिकेतील महागाईची आकडेवारी, डॉलरची हालचाल आणि अमेरिकन फेडरल रिझर्व्हच्या व्याजदर धोरणाबाबतची स्पष्टता यांचा सोन्याच्या दराच्या दिशेवर प्रभाव राहणार आहे. मात्र, मध्यम कालावधीत सोन्याला भक्कम आधार मिळत राहण्याची अपेक्षा आहे.”
ग्राहकांच्या ओघाबाबत बोलताना त्यांनी पुढे स्पष्ट केलं की,“भारतात सोन्याच्या वाढलेल्या किमतींमुळे ग्राहक आपल्या खरेदीबाबत अधिक मूल्यकेंद्री आणि नियोजनबद्ध होण्याची शक्यता आहे. त्यामुळे ग्राहकांकडून दागिन्यांची खरेदी पूर्णपणे कमी होण्याऐवजी हलके, आकर्षक डिझाइन असलेले आणि अधिक मूल्य देणारे दागिने खरेदी करण्याला प्राधान्य मिळू शकते. आगामी सणासुदीचा आणि लग्नसराईचा काळ दागिन्यांच्या मागणीला आधार देत राहील. भारतीय संस्कृतीत सोने हे उत्सवाबरोबरच दीर्घकालीन संपत्ती जतन करण्याचे साधन म्हणूनही महत्त्वाचे आहे,” असे त्यांनी सांगितले.
मात्र, सोन्याच्या दरात झालेल्या मोठ्या वाढीनंतर अल्पावधीत दरात स्थिरता किंवा चढ-उतार पाहायला मिळू शकतात, विशेषतः बदलत्या भूराजकीय परिस्थितीच्या पार्श्वभूमीवर, असेही शाह यांनी नमूद केले.
.png "Videos"){kind=small}
