(फोटो सौजन्य - सोशल मीडिया)
एसबीआयचे अध्यक्ष सी. एस. शेट्टी यांनी याबाबत सांगताना स्पष्ट केलं की, बँक एनएसई आयपीओमध्ये सहभागी होईल आणि आपला ०.६५ टक्के हिस्सा विकणार आहे. शेट्टी म्हणाले, “आम्ही या निर्गुंतवणुकीत सहभागी होत आहोत. एसबीआय ०.६५ टक्के आणि एसबीआय कॅपिटल मार्केट्स ०.३५ टक्के हिस्सा विकण्याचा प्रस्ताव देत आहे. दोघांचाही हिस्सा आहे, त्यामुळे एसबीआय समूहाच्या स्तरावर हा हिस्सा सुमारे १ टक्का असेल. पण इतर भागधारक सामील झाल्यास हा हिस्सा कमी होऊ शकतो.” सध्या, एनएसईमध्ये एसबीआयचा ३.२३ टक्के आणि एसबीआय कॅपिटल मार्केट्सचा ४.३३ टक्के इतका हिस्सा आहे.
शेट्टी यांनी स्पष्ट केले की, भविष्यात इतर उपकंपन्यांमधील आपला हिस्सा विकण्याची कोणतीही योजना नाही. गेल्या महिन्यात, एसबीआयने आपला परदेशी भागीदार अमुंडीसोबत मिळून एसबीआय म्युच्युअल फंडामधील आपला सुमारे १० टक्के हिस्सा विकला होता. देशातील सर्वात मोठ्या म्युच्युअल फंड कंपनीचा ₹९,८०० कोटींचा पब्लिक इश्यू यशस्वी झाला आहे ज्याला ४२ पट अधिक प्रतिसाद मिळाला. या व्यवहारानंतर, एसबीआय म्युच्युअल फंडामधील एसबीआयचा हिस्सा ६१.७६ टक्क्यांवरून ५५.४६ टक्क्यांवर आला, तर अमुंडीचा हिस्सा ३.७ टक्क्यांनी कमी होऊन ३२.५६ टक्क्यांवर आला आहे.
शेट्टी म्हणाले की, गृहकर्ज क्षेत्रातील मजबूत मागणीमुळे, एसबीआयचा गृहकर्ज पोर्टफोलिओ चालू तिमाहीत ₹१० लाख कोटींचा महत्त्वपूर्ण टप्पा ओलांडू शकतो. त्यांनी पुढे स्पष्ट केलं की, “या तिमाहीत १० लाख कोटी रुपयांचा टप्पा गाठण्याची आशा आहे.” देशातील सर्वात मोठ्या कर्जदात्या बँकेने गेल्या आर्थिक वर्षातच ९ लाख कोटी रुपयांच्या गृहकर्ज पोर्टफोलिओचा टप्पा ओलांडला होता. शेट्टी यांच्या मते, गृहकर्ज क्षेत्रात एसबीआयचा बाजारहिस्सा सुमारे २८ टक्के आहे. बँकेने देशभरातील ग्राहकांना गृहकर्ज अधिक सरळ सोपे करण्यावर लक्ष केंद्रित केले आहे.
(Disclaimer: येथे दिलेली माहिती शेअर बाजाराबद्दल आहे, गुंतवणुकीचा सल्ला नाही. नवराष्ट्र गुंतवणुकीचा सल्ला देत नाही. शेअर बाजारात गुंतवणूक करणे हे बाजारातील जोखमीच्या अधीन आहे, त्यामुळे गुंतवणूक करण्यापूर्वी कृपया प्रमाणित गुंतवणूक सल्लागाराचा सल्ला घ्या.)
.png "Videos"){kind=small}
