गुरुवार, 22 ऑक्टोबर 2026
'या' देशाच्या जीडीपीपेक्षाही अधिक आहे, भारतातील 'या' तीन कुटुंबांची संपत्ती!
देशातील मोठ्या उद्योगपती घराण्यांमध्ये अंबानी, बजाज आणि बिर्ला कुटुंबांची गणना केली जाते. भारतात 1 अब्ज डॉलरपेक्षा जास्त संपत्ती असलेली सुमारे 124 कुटुंबे उद्योग जगतात राज्य करत आहेत. यापैकी अंबानी, बजाज आणि कुमार मंगलम बिर्ला कुटुंबाच्या व्यवसायाची एकूण संपत्ती 38.26 लाख कोटी रुपयांवर पोहोचली आहे. विशेष म्हणजे हा आकडा सिंगापूर या देशाच्या जीडीपीपेक्षा अधिक आहे.
10 उद्योगपती घराण्यांचे व्यवसाय मूल्य 60 लाख कोटी रुपये
उपलब्ध अधिकृत माहितीनुसार, देशातील 10 सर्वात मोठ्या उद्योगपती कुटुंबांच्या व्यवसायांचे एकूण मूल्य अंदाजे 60 लाख कोटी रुपये (715 अब्ज डॉलर) इतके आहे. या यादीत केवळ अशाच व्यवसायांचा समावेश करण्यात आला आहे. ज्यांचे व्यवसायांचे एकूण मार्केट कॅप हे 2,700 कोटी रुपयांपेक्षा अधिक आहे. विशेष म्हणजे या १० कुटुंबांच्या यादीमध्ये अंबानी कुटुंब हे सर्वोच्च स्थानी आहे.
हेही वाचा : टाटांच्या ‘या’ कंपनीमुळे गुंतवणूकदार मालामाल; 1 लाखाचे झाले तब्बल 45 लाख रुपये!
‘ही’ तीन घराणे सर्वाधिक मौल्यवान कुटुंबे
हुरुन इंडियाच्या रिपोर्टनुसार, सर्वाधिक मूल्य असलेल्या उद्योगपती घराण्यांमध्ये अंबानी, बजाज आणि बिर्ला या तीन कुटुंबांचे व्यावसायिक मूल्य देशात सर्वाधिक झाले आहे. अंबानी कुटुंबातर्फे चालवल्या जाणाऱ्या रिलायन्स इंडस्ट्रीजचे बाजारमूल्य २५.७५ लाख कोटी रुपयांवर पोहोचले आहे. दुसरीकडे, बजाज परिवाराच्या बजाज समूहाचा व्यवसाय अंदाजे 7.13 लाख कोटी रुपयांवर गेला आहे. तर आदित्य बिर्ला समूहाचे मार्केट कॅप अंदाजे 5.39 लाख कोटी रुपये आहे.
औद्योगिक उत्पादने बनवणाऱ्या कंपन्या अधिक
या यादीत सज्जन जिंदाल कुटुंब चौथ्या क्रमांकावर आहे. त्यांची एकूण संपत्ती 4.71 लाख कोटी रुपये आहे. यानंतर 4.31 लाख कोटी रुपयांच्या संपत्तीसह नाडर कुटुंबाचा पाचवा क्रमांक लागतो. महिंद्रा फॅमिली 3.45 लाख कोटी रुपयांच्या संपत्तीसह यादीत 6 व्या क्रमांकावर आहे. या यादीमध्ये समाविष्ट असलेल्या कंपन्यांपैकी 28 कंपन्या सर्वाधिक औद्योगिक उत्पादने तयार करतात. यानंतर ऑटो क्षेत्रातील 23 आणि फार्मा क्षेत्रातील 22 कंपन्यांचा समावेश आहे.
अनेक कुटुंबांचा व्यवसाय पुढील पिढीकडे
विशेष म्हणजे महत्वाच्या उद्योगपती घराण्यांमधील बहुतांश व्यवसाय हे दुसऱ्या किंवा तिसऱ्या पिढीच्या हाती आले आहे. केवळ अदानी कुटुंबाच्या व्यवसायाचे नेतृत्व सध्या पहिल्या पिढीच्या हातात आहे. त्यांच्या व्यवसायाने 15.4 लाख कोटी रुपयांची संपत्ती मिळवली आहे. सीरम इन्स्टिट्यूट ऑफ इंडिया चालवणाऱ्या पूनावाला कुटुंबाचे मूल्यांकन अंदाजे 2.37 लाख कोटी रुपये आहे.
