फोटो सौजन्य - Social Media
जर यश मिळवायचे हवे तर कष्टावाचून पर्याय नाही. एका क्षेत्रात कष्ट करूनही यश मिळाले नाही तर कदाचित तुमच्या कष्ट करण्याच्या पद्धतीत चूक होत असेल किंवा तुम्ही चुकीच्या ठिकाणी कष्ट करत आहात. योग्य कष्ट करण्याची पद्धत आणि योग्य ठिकाण आपल्याला यशाच्या पायरीशी आणून सोडते. जर यशप्राप्ती नक्की कशी केली जाते? याबद्दल जाणून घ्यायचे आहे तर अनेक यशस्वी व्यक्तींविषयी अभ्यास करणे गरजेचे आहे. त्यापैकीच एक आहेत केशव विष्णू पेंढारकर!
विष्णू इंडरस्ट्रीअल केमिकल कंपनी (VICCO)चे मालक म्हणून त्यांची ओळख आहे. एका मध्यम वर्गीय कुटुंबात जन्म घेत हजारो-कोटींची कंपनी उभी करण्यामागचा केशव पेंढारकर यांचा प्रवास खूप खडतर होता. या प्रवासात अनेकदा ते पडले,परंतु त्यांच्या प्रत्येक पडण्यातून ते सावरायला शिकले आणि विकोचे विशाल साम्राज्य उभे केले.
महाराष्ट्रासाठी अभिमानाची बाब म्हणजे केशव पेंढारकर मराठी भाषिक असून त्यांचा जन्म नागपूरमध्ये एका लोअर मिडल क्लास कुटुंबात झाला. विशेष म्हणजे घरी हलाखीची परिस्थिती असल्यामुळे त्यांना लहानपणापासूनच कमवण्याच्या वाटेवर यावे लागले. त्यांनी कुणाची गुलामी न पत्कारता, घरीच स्वतःचे किराणा मालकाचे दुकान सुरु केले. परंतु, यात काही जास्त यश मिळाला नाही म्हणून ते मायानगरी मुंबईकडे रवाना झाले. मुंबईत त्यांनी व्यापाराचे सगळे कौशल्य अवगत केले. व्यापाराच्या कठोर अभ्यासानंतर स्वतःची कंपनी सुरु करण्याचा निश्चय केला. पॉन्ड्स, नीविया, अफगान स्नोसारख्या कॉस्मेटिक कंपनीचा आदर्श घेऊन राहत्या घरीच विष्णू इंडरस्ट्रीअल केमिकल कंपनीची सुरुवात केली.
पेंढारकरांनी स्वयंपाक घराला मॅन्युफॅक्चरिंग युनिट बनवला आणि संपूर्ण घराला विकोचा गोदाम! अशा प्रकारे लोकांना भारतीय प्राचीन आयुर्वेद पद्धतीने कॉस्मेटिक वस्तू बनवून देण्याच्या प्रवासाला सुरुवात झाली. १९५५ साली, विकोचा वार्षिक टर्नओवर तब्बल १० लाख इतका झाला. सुरुवातीला प्रत्येकाच्या दारी जाऊन विकावा लागलेला ‘विको’ आज भारतातील प्रत्येक घरात पोहचलेला आहे.
