रविवार, 4 ऑक्टोबर 2026
फोटो सौजन्य- सोशल मीडिया
78 Years Old ISRO Scientist Engineer Degree: वयाची ७८ वर्षे पूर्ण झाल्यानंतरही बहुतांश लोक विश्रांती किंवा आरामाची जीवनशैली निवडतात, परंतु तुवाराकवि चेंगल प्रसाद यांनी या वयात पुन्हा एकदा पुस्तकांना हात लावून सर्वांना थक्क केले आहे. भारतीय अंतराळ संशोधन संस्था (ISRO) सोबत तब्बल साडेतीन दशके काम करणारे प्रसाद आता पुन्हा एकदा विद्यार्थी बनले आहेत. त्यांनी ‘तेलंगणा इंजिनिअरिंग कॉमन एन्ट्रन्स टेस्ट’ (TG ECET) for Working Professionals परीक्षेत थेट तिसरा क्रमांक पटकावला आहे. आज आपण तुवाराकवि चेंगल प्रसाद यांच्या जीवनप्रवासाशी संबंधित काही खास गोष्टी जाणून घेणार आहोत.
प्रसाद यांनी अवघ्या २१ व्या वर्षी इस्रोमध्ये प्रवेश केला. सिव्हिल इंजिनिअरिंगमध्ये डिप्लोमा केल्यानंतर त्यांनी इस्रोच्या सिव्हिल कन्स्ट्रक्शन विंगमध्ये काम सुरू केले. ते इस्रोच्या सुरुवातीच्या कर्मचाऱ्यांपैकी एक असून त्यांनी सुमारे ३५ वर्षे या संस्थेसोबत काम केले. श्रीहरिकोटा येथील रॉकेट लॉन्चिंग, वेधशाळा आणि तांत्रिक इमारतींच्या उभारणीमध्ये त्यांचे मोठे योगदान आहे.
त्यांच्या करिअरची सर्वात मोठी जमेची बाजू म्हणजे त्यांना विक्रम साराभाई, डॉ. ए. पी. जे. अब्दुल कलाम आणि सतीश धवन यांसारख्या महान वैज्ञानिकांसोबत काम करण्याची संधी मिळाली. भारतीय अंतराळ कार्यक्रमाच्या सुरुवातीच्या पायाभरणीत त्यांनी महत्त्वाची भूमिका बजावली.
इस्रोमधून स्वेच्छानिवृत्ती घेतल्यानंतरही ते थांबले नाहीत. त्यांनी दिल्ली, नेपाळ आणि हैदराबादमधील कन्स्ट्रक्शन कंपन्यांसोबत काम केले आणि कोविड-१९ च्या लॉकडाऊनपर्यंत ते पूर्णपणे सक्रिय होते. यानंतर त्यांनी तंत्रज्ञानात रस निर्माण करत वेदांचा अभ्यासही सुरू केला.
जुन्या डिप्लोमाच्या आधारावर आता त्यांना इंजिनिअरिंगची अधिकृत पदवी मिळवायची आहे. यासाठी त्यांनी ‘TG ECET’ परीक्षा दिली, जी पात्र डिप्लोमा धारकांना इंजिनिअरिंगच्या दुसऱ्या वर्षात थेट प्रवेश मिळवून देते. या परीक्षेची तयारी करण्यासाठी त्यांनी सलग दोन महिने दररोज १२ तासांहून अधिक अभ्यास केला, ज्यामुळे त्यांना संपूर्ण तेलंगणामध्ये तिसरा क्रमांक मिळवता आला.
