MSBSHSE SSC Exam 2027: दहावीच्या विद्यार्थ्यांसाठी महत्त्वाची बातमी! (फोटो सौजन्य- सोशलमीडिया)
Maharashtra SSC Application Form: दहावीच्या विद्यार्थ्यांसाठी महत्वाची बातमी समोर आली आहे. आतापासूनच बोर्ड परीक्षेची तयारी सुरू झाली आहे. महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२७ मध्ये होणाऱ्या दहावीच्या परीक्षेसाठी ऑनलाइन अर्ज भरण्याची प्रक्रिया सुरू केली आहे. त्यामुळे शाळांनी विद्यार्थ्यांची माहिती वेळेत जमा करून अर्जाची प्रक्रिया पूर्ण करणे गरजेचे आहे.
या परीक्षेला नियमित विद्यार्थ्यांसोबतच पुन्हा परीक्षा देणारे विद्यार्थी, खासगी पद्धतीने नोंदणी केलेले विद्यार्थी, श्रेणी सुधारण्यासाठी परीक्षा देणारे तसेच काही निवडक विषयांसह परीक्षेला बसणारे विद्यार्थीही अर्ज करू शकणार आहेत. म्हणजेच दहावीची परीक्षा देणाऱ्या विविध गटांसाठी ही प्रक्रिया लागू आहे. MSBSHSE SSC Exam 2027:
मंडळाने अर्जासाठी वेगवेगळे टप्पे निश्चित केले आहेत. शाळांना नियमित शुल्कासह विद्यार्थ्यांचे अर्ज ऑनलाइन पद्धतीने भरता येतील. अर्ज भरण्याची सुरुवात १९ ऑगस्ट २०२६ पासून झाली आहे. नियमित शुल्काच्या प्रक्रियेसाठी ३१ ऑक्टोबर २०२६ पर्यंतची मुदत देण्यात आली आहे. त्यानंतर विलंब शुल्कासह अर्ज करण्याची संधी १ ते १५ ऑक्टोबर या कालावधीत असल्याचे मंडळाच्या माहितीत नमूद करण्यात आले आहे. अतिविलंब शुल्काच्या टप्प्यात अर्जाची प्रक्रिया १६ ते ३० ऑक्टोबर २०२६ दरम्यान पूर्ण करता येणार आहे.
मुदतीच्या तारखांबाबत शाळांनी विशेष लक्ष देणं आवश्यक आहे. शेवटच्या दिवसापर्यंत थांबल्यास तांत्रिक अडचणी किंवा इतर कारणांमुळे अर्ज रखडण्याची शक्यता असते. त्यामुळे विद्यार्थ्यांची माहिती आधीच तपासून प्रक्रिया पूर्ण करणं अधिक सुरक्षित ठरेल.
विद्यार्थ्यांचा अर्ज भरताना केवळ विद्यार्थ्यांची माहिती पुरेशी नाही. शाळेच्या प्रोफाइलमध्ये संस्थेची माहिती, शाळेची मान्यता, उपलब्ध विषय आणि शिक्षकांशी संबंधित तपशील योग्य प्रकारे भरलेला असणं आवश्यक आहे. मंडळाकडे माहिती पाठवण्यापूर्वी शाळांनी या सर्व तपशीलांची पडताळणी करावी. चुकीची माहिती राहिल्यास पुढील प्रक्रियेत अडचण येऊ शकते. त्यामुळे अर्ज भरण्याआधी शाळेच्या स्तरावर आवश्यक ती तपासणी करण्यास मंडळाने महत्त्व दिलं आहे.
यंदाच्या अर्ज प्रक्रियेत विद्यार्थ्यांच्या APAAR ID कडेही लक्ष देण्यात आलं आहे. विद्यार्थ्याचा APAAR ID तयार झाला असल्यास अर्ज भरताना त्याची नोंद करावी लागणार आहे. तसेच शाळांनी UDISE Plus मधील संबंधित PEN ID च्या आधारे विद्यार्थ्यांची नोंदणी करायची आहे. यामुळे विद्यार्थ्यांची शैक्षणिक माहिती व्यवस्थित जोडली जाण्यास मदत होणार आहे. त्यामुळे पालक आणि विद्यार्थ्यांनीही शाळेकडे आपली माहिती अचूक आहे का, याची खात्री करून घेणं चांगलं राहील.
यंदाच्या अर्ज प्रक्रियेत विद्यार्थ्यांच्या फोटोला विशेष महत्त्व देण्यात आलं आहे. मागील वर्षी अनेक विद्यार्थ्यांच्या अर्जातील छायाचित्रांमध्ये त्रुटी आढळल्या होत्या. दहावीच्या गुणपत्रक आणि प्रमाणपत्रावर विद्यार्थ्याचा फोटो वापरला जाणार असल्याने यावेळी मंडळाने फोटोबाबत स्पष्ट नियम दिले आहेत. फोटो साधा, स्वच्छ आणि स्पष्ट असावा. पार्श्वभूमी शक्यतो पांढरी किंवा फिकट रंगाची असावी. विद्यार्थ्याचा चेहरा कॅमेऱ्याकडे सरळ असणं गरजेचं आहे. दोन्ही डोळे स्पष्ट दिसले पाहिजेत आणि चेहरा झाकलेला नसावा. शक्य असल्यास विद्यार्थ्याने शाळेचा गणवेश घातलेला फोटो वापरण्याच्या सूचनाही देण्यात आल्या आहेत.
फोटो JPEG स्वरूपात असावा आणि त्याची फाइल साधारण २५.५ KB ते ४० KB दरम्यान असणे आवश्यक आहे. त्यामुळे फोटो अपलोड करण्यापूर्वी त्याचा आकार आणि गुणवत्ता तपासणं महत्त्वाचं आहे.
दहावीची बोर्ड परीक्षा विद्यार्थ्यांच्या शैक्षणिक प्रवासातील महत्त्वाचा टप्पा असतो. परीक्षा अर्जातील एखादी छोटी चूक पुढे मोठी अडचण ठरू शकते. त्यामुळे नाव, जन्मतारीख, विषय, ओळख क्रमांक, फोटो आणि इतर माहिती काळजीपूर्वक तपासावी.
शाळांनीही विद्यार्थ्यांचे अर्ज भरल्यानंतर प्रत्येक तपशील पुन्हा एकदा पाहावा. वेळेत प्रक्रिया पूर्ण केल्यास शेवटच्या दिवसाची धावपळ टाळता येईल. आता अर्ज प्रक्रिया सुरू झाल्यामुळे विद्यार्थ्यांनीही अभ्यासासोबत या कागदोपत्री प्रक्रियेवर लक्ष ठेवणं गरजेचं आहे.
फेब्रुवारी-मार्च २०२७ मध्ये होणाऱ्या परीक्षेची पहिली पायरी आता सुरू झाली आहे. त्यामुळे विद्यार्थ्यांसाठी एकच गोष्ट महत्त्वाची अर्ज अचूक भरा, कागदपत्रे तपासा आणि बोर्डाच्या पुढील सूचनांकडे लक्ष ठेवा.
.png "Videos"){kind=small}
