NEET UG 2026 Counselling च्या राउंड २ चे वेळापत्रक जाहीर; ‘या’ तारखेपासून रजिस्ट्रेशन सुरू

NEET UG 2026 Counselling : नीट यूजी २०२६ काउन्सिलिंग राउंड २ चे वेळापत्रक जाहीर करण्यात आले आहे. ऑल इंडिया कोटा आणि स्टेट काउन्सिलिंग ३ सप्टेंबरपासून सुरू होणार आहे. तर राउंड २ चा सीट अलॉटमेंट निकाल ११ सप्टेंबर रोजी जाहीर केला जाईल.

NEET UG 2026 Counselling :  मेडिकल कौन्सिलिंग कमिटीने (MCC) नीट यूजी २०२६ काउन्सिलिंगच्या राउंड २ चे वेळापत्रक जाहीर केले आहे. ऑल इंडिया कोटा (AIQ), डीम्ड युनिव्हर्सिटी आणि सेंट्रल युनिव्हर्सिटीच्या जागांसाठी दुसऱ्या राउंडची प्रक्रिया ३ सप्टेंबर २०२६ पासून सुरू होणार आहे. या दिवशी नोंदणी शुल्क, पेमेंट आणि चॉइस फिलिंगची प्रक्रिया देखील सुरू होईल. राउंड २ चा सीट अलॉटमेंट निकाल ११ सप्टेंबर रोजी जाहीर केला जाईल. या राउंडमध्ये जागा मिळालेल्या विद्यार्थ्यांना निर्धारित वेळेत संबंधित संस्थेत रिपोर्ट करून प्रवेश प्रक्रिया पूर्ण करावी लागेल.

३ सप्टेंबरपासून नोंदणी आणि शुल्क भरणा

एआयक्यू, डीम्ड आणि सेंट्रल युनिव्हर्सिटीसाठी राउंड २ चे रजिस्ट्रेशन आणि फीस पेमेंट ३ ते ८ सप्टेंबर दरम्यान करता येईल. ८ सप्टेंबर रोजी संध्याकाळी ६:०० वाजेपर्यंत शुल्क भरण्याची सुविधा उपलब्ध असेल. तसेच चॉइस फिलिंगची संधी ३ ते ९ सप्टेंबरपर्यंत मिळेल. उमेदवार ८ सप्टेंबर रोजी दुपारी ४ वाजल्यापासून ९ सप्टेंबर रोजी सकाळी १० वाजेपर्यंत स्वतःची पसंती लॉक करू शकतील. त्यानंतर एमसीसी ९ आणि १० सप्टेंबर रोजी सीट अलॉटमेंटची प्रक्रिया पूर्ण करेल. ११ सप्टेंबर रोजी राउंड २ चा निकाल जाहीर केला जाईल.

राउंड २ चे संपूर्ण वेळापत्रक एका दृष्टीक्षेपात

टेंटेटिव्ह सीट मॅट्रिक्स: १ आणि २ सप्टेंबर २०२६

रजिस्ट्रेशन आणि फी पेमेंट: ३ ते ८ सप्टेंबर

चॉइस फिलिंग: ३ ते ९ सप्टेंबर

चॉइस लॉकिंग: ८ सप्टेंबर संध्याकाळी ४ ते ९ सप्टेंबर सकाळी १० वाजेपर्यंत

सीट अलॉटमेंट प्रक्रिया: ९ आणि १० सप्टेंबर

राउंड २ सीट अलॉटमेंट निकाल: ११ सप्टेंबर

रिपोर्टिंग आणि जॉइनिंग: १२ ते १८ सप्टेंबर

जॉईन केलेल्या उमेदवारांचे पडताळणी (व्हेरिफिकेशन): १९ सप्टेंबर

SBI PO Prelims Result 2026: एसबीआय पीओ पूर्व परीक्षा निकाल जाहीर, जाणून घ्या पुढील टप्पे आणि मेन्सचे वेटेज!

राज्य काउन्सिलिंगचे (स्टेट काउन्सिलिंग) वेळापत्रक देखील जाहीर

एमसीसीने एआयक्यू सोबतच स्टेट काउन्सिलिंग राउंड २ ची टाइमलाइन देखील जारी केली आहे. राज्य पातळीवरील काउन्सिलिंगची प्रक्रिया ७ सप्टेंबर ते ११ सप्टेंबर दरम्यान चालेल. यामध्ये संबंधित राज्याची काउन्सिलिंग अथॉरिटी विद्यार्थ्यांचे प्रवेश आणि इतर प्रक्रिया पूर्ण करेल. एआयक्यू आणि स्टेट काउन्सिलिंग या दोन्हीच्या अंतर्गत मिळालेल्या जागेवर विद्यार्थ्यांना १८ सप्टेंबरपर्यंत जॉईन करावे लागेल. १९ सप्टेंबर रोजी संबंधित अथॉरिटीकडून जॉईन केलेल्या उमेदवारांच्या रेकॉर्डचे व्हेरीफिकेशन केले जाईल. विद्यार्थ्यांनी आपल्या राज्याच्या काउन्सिलिंग अथॉरिटीच्या सूचनांकडे देखील लक्ष ठेवावे.

कोणत्या उमेदवारांना राउंड २ मध्ये संधी मिळेल?

ज्या उमेदवारांना राउंड १ मध्ये कोणतीही जागा मिळाली नाही, ते निर्धारित नियमांनुसार राउंड २ मध्ये सहभागी होऊ शकतात. याशिवाय, ज्यांनी ‘फ्लॉट’ (Float) चा पर्याय निवडला आहे, असे उमेदवार राउंड १ मध्ये जागा मिळूनही राउंड २ मध्ये सीट अपग्रेडेशनसाठी सहभागी होऊ शकतात. ज्या उमेदवारांनी ‘फ्रीझ’ पर्याय निवडला आहे, त्यांची राउंड १ ची सीट कायम राहील, परंतु त्यांना राउंड २ मध्ये सीट अपग्रेडेशनसाठी ग्राह्य धरले जाणार नाही.

Kerala Bhageerathi Amma: पंतप्रधानांनीही केला होता गौरव, जिद्द अशी की १०५ व्या वर्षी मिळवले गणितात १०० पैकी १०० गुण

राउंड १ मध्ये सीट मिळून अपग्रेडेशनच्या राउंड २ मध्ये जाणाऱ्या उमेदवारांना ऑनलाइन प्रक्रिया पूर्ण करून आवश्यक कागदपत्रे जमा करावी लागतील. यावर्षीच्या व्यवस्थेनुसार, फ्लॉट उमेदवारांच्या कागदपत्रांच्या पडताळणीसाठी अलॉट केलेल्या कॉलेजमध्ये प्रत्यक्ष जाण्याची गरज नाही, संबंधित संस्था ऑनलाइन माध्यमातून कागदपत्रांची तपासणी करेल.