पुण्यात MPSC विद्यार्थ्यांचा एल्गार! पेपरफुटीप्रकरणी सरकार आणि आयोगाविरोधात नेते आक्रमक

Pune MPSC student protest 2026 : पुण्यातील MPSC विद्यार्थ्यांच्या आक्रोश मोर्चामध्ये खासदार सुप्रिया सुळे आणि आमदार रोहित पवार यांनी सहभाग घेतला. या मोर्चामध्ये पेपरफुटीच्या निषेधार्थ विद्यार्थ्यांनी सरकारविरोधात आक्रमक भूमिका घेतली आहे.

Pune MPSC student protest 2026 : पुण्यामध्ये स्पर्धा परीक्षा करणाऱ्या विद्यार्थ्यांच्या विविध प्रलंबित मागण्या आणि वाढत्या पेपरफुटीच्या घटनांविरोधात MPSC विद्यार्थ्यांचा आक्रोश मोर्चा अत्यंत आक्रमक रूप धारण करून रस्त्यावर उतरला आहे. ओंकारेश्वर मंदिरापासून जिल्हाधिकारी कार्यालयापर्यंत काढण्यात आलेल्या या भव्य मोर्चामध्ये हजारो स्पर्धा परीक्षा विद्यार्थी सहभागी झाले असून, संपूर्ण परिसरात सरकारविरोधी जोरदार घोषणाबाजी सुरू आहे. विद्यार्थ्यांच्या या आंदोलनाला आता राजकीय नेत्यांचाही मोठा पाठिंबा मिळत असून, खासदार सुप्रिया सुळे आणि आमदार रोहित पवार यांनी प्रत्यक्ष उपस्थित राहून विद्यार्थ्यांच्या भूमिकेला बळ दिले आहे.

खासदार सुप्रिया सुळे यांनी आंदोलनात सहभागी होत विद्यार्थ्यांशी थेट संवाद साधला आणि त्यांच्या मागण्यांवर राज्य सरकारने तातडीने योग्य निर्णय घ्यावा, अशी आक्रमक भूमिका मांडली. दरम्यान, आमदार रोहित पवार यांनी काळा शर्ट परिधान करत थेट सरकार आणि MPSC अध्यक्षांचा तीव्र निषेध नोंदवला. “पैसे खाण्याच्या नादात गरीब आणि होतकरू मुलांच्या भविष्याशी खेळले जात आहे. वीस-वीस तास अभ्यास करणारे विद्यार्थी मेहनत करत असताना, ५० ते ६० लाख रुपये देऊन इतर व्यक्ती अधिकारी होत असतील, तर हे महाराष्ट्राला मान्य नाही,” असा संताप त्यांनी व्यक्त केला.

महत्त्वाची अपडेट! NEET PG 2026 परीक्षेची थेट फायनल आन्सर की येणार; निकालासाठी ‘या’ अधिकृत वेबसाइटवर ठेवा नजर

आमदार रोहित पवारांची भूमिका

यावेळी बोलताना रोहित पवार यांनी MPSC चा अध्यक्ष आणि सचिव बदलण्याची जोरदार मागणी केली असून, प्रशासनात स्वच्छ प्रतिमेच्या अधिकाऱ्यांची नियुक्ती करण्याची गरज असल्याचे स्पष्ट केले. भ्रष्टाचाराच्या मुद्यावर बोलताना त्यांनी सोशल मीडियावर पोस्ट करत म्हटले की, MPSC च्या उत्पादन शुल्क परीक्षेत मार्किंग पॅटर्न लीक प्रकरणात चक्क आयोगाचाच सहसचिव दर्जाचा अधिकारी दोषी असल्याचे समोर आले आहे, जी अत्यंत धक्कादायक बाब आहे. विद्यार्थ्यांनी रात्रंदिवस अभ्यास करायचा आणि दुसरीकडे आयोगानेच पेपर विकायचे, हा प्रकार बिलकूल खपवून घेतला जाणार नाही, असा इशारा त्यांनी दिला आहे.

Engineering recruitment 2026 : संरक्षण मंत्रालयांतर्गत नोकरीची संधी! प्रकल्प अभियंता पदांसाठी भरती; त्वरित अर्ज करा!

आंदोलनाला पोलिसांचा बंदोबस्त

वाढत्या आंदोलनामुळे संबंधित परिसरात मोठी गर्दी जमली असून, अनुचित प्रकार टाळण्यासाठी पोलिसांकडून तगडा बंदोबस्त तैनात करण्यात आला आहे. पेपरफुटी प्रकरणांवर आणि विद्यार्थ्यांच्या मागण्यांवर आता राज्य सरकार नेमकी काय पावले उचलणार, याकडे संपूर्ण महाराष्ट्रातील लाखो स्पर्धा परीक्षा देणाऱ्या विद्यार्थ्यांचे लक्ष लागून राहिले आहे.