Indian Army Success Story : ॲमेझॉनमधील ४६ लाखांचे पॅकेज सोडले अन् धरली सैन्याची वाट; ८ व्या प्रयत्नात मिळवले भारतीय सैन्यात यश

Shardendu Tiwari Indian Army :  ॲमेझॉनच्या ४६ लाखांच्या पॅकेजची नोकरी सोडत शारदेंदु तिवारी यांनी ८ व्या प्रयत्नात भारतीय सैन्यात अधिकारी म्हणून यश मिळवले.

Shardendu Tiwari Indian Army : मल्टिनॅशनल कंपन्यामध्ये लाखोंचे सॅलरी पॅकेज, एरोस्पेस क्षेत्रात करिअर आणि कॉर्पोरेट लाईफमधील सर्व सुखसोयी…बहुतांश तरुणांसाठी यश म्हणजे हेच असते. पण जेव्हा मनात देशसेवेचा ध्यास आणि अंगावर ऑलिव्ह ग्रीन वर्दी चढवण्याचे वेड असते, तेव्हा ४६ लाखांचे वार्षिक पॅकेजही खूप तुटपुंजे वाटू लागते. लखनौमधील निलमथा येथील रहिवासी असलेल्या २७ वर्षीय शारदेंदु तिवारी यांनी याच जिद्दीचे उत्तम उदाहरण सादर केले आहे.

ॲमेझॉन या दिग्गज टेक कंपनीत क्लाउड इंजिनिअर पदावर काम करत असलेल्या शारदेंदु तिवारी यांच्याकडे एका बाजूला ‘एअरबस’ कंपनीत नोकरीची शानदार ऑफर होती आणि दुसऱ्या बाजूला एसएसबी व निवडीमध्ये लागोपाठ ७ वेळा अपयश आले होते. असे असतानाही त्यांचा आत्मविश्वास डगमगला नाही. ८ व्या प्रयत्नात यशाचा झेंडा फडकवत त्यांनी ऑफिसर्स ट्रेनिंग अकादमी (OTA), गया येथून भारतीय सैन्यात अधिकारी म्हणून कमिशन मिळवले. त्यामुळे आज आपण जाणून घेणार आहोत  कॉर्पोरेटच्या झगमगाटामागे फौजी शिस्त निवडणाऱ्या शारदेंदु तिवारी यांची ही प्रेरणादायी कथा..

४६ लाखांचे पॅकेजही वाटू लागले फिके

शारदेंदु तिवारी हे ॲमेझॉनमध्ये क्लाउड इंजिनिअर म्हणून कार्यरत होते. तिथे त्यांचे वार्षिक पॅकेज सुमारे ४६ लाख रुपये होते. याशिवाय त्यांना ग्लोबल एरोस्पेस कंपनी ‘एअरबस’कडूनही एक उत्तम जॉब ऑफर मिळाली होती. साधारणपणे लोक अशा संधींना त्यांच्या करिअरचे सर्वोच्च शिखर मानतात. पण शारदेंदु यांच्यासाठी हे अंतिम ध्येय नव्हते. आर्मी लाईफमधील जो थरार, साहसी अनुभव आणि आत्मसमाधान असते, त्याची तुलना जगातील कोणत्याही कॉर्पोरेट पॅकेजशी होऊ शकत नाही, असे त्यांचे मानणे आहे. शारदेंदु तिवारी यांचे कुटुंब मूळचे यूपीच्या सुलतानपूर जिल्ह्यातील पिपरगाव येथील आहे.

त्यांचे वडील मानद कॅप्टन राजकुमार तिवारी यांनी आर्मी सर्व्हिस कॉर्प्स (ASC) मध्ये सलग ३६ वर्षे देशाची सेवा केली आहे. लहानपणापासून घरात फौजी वातावरण, पदके आणि वडिलांची वर्दी पाहत मोठे झालेल्या शारदेंदु यांच्या मनात देशभक्तीची ज्योत खूप खोलवर रुजली होती. त्यांनी आपल्या वडिलांचा हा वारसा पुढे चालवण्याचा पक्का निश्चय केला होता.

DY Patil Education Society मध्ये ‘या’ पदांसाठी नोकरीची संधी; ११ सप्टेंबर २०२६ पर्यंत करा अर्ज

७ वेळा तोडले स्वप्न, ८ व्या प्रयत्नात मारली बाजी

शारदेंदु तिवारी यांनी केंद्रीय विद्यालय, चंडीमंदिर येथून शालेय शिक्षण पूर्ण केले आणि पंजाब इंजिनिअरिंग कॉलेज (PEC), चंदिगढ येथून बी.ई. आणि एम.टेकची पदवी संपादन केली. अभ्यासात नेहमीच हुशार असलेल्या शारदेंदु यांना सैन्यात जाण्यासाठी अत्यंत कठीण परीक्षांना सामोरे जावे लागले. ते एकदा-दोनदा नव्हे, तर सलग ७ वेळा अपयशी ठरले. पण त्यांनी याला पराभव मानले नाही, उलट प्रत्येक अपयशातून आपल्या त्रुटी सुधारल्या आणि शेवटी ८ व्या प्रयत्नात त्यांनी बाजी मारली.

तांत्रिक प्रवेशाद्वारे बनले तंत्रज्ञान आणि देशसेवेचा पूल

शारदेंदु तिवारी यांनी भारतीय सैन्यात ‘टेक्निकल एंट्री रूट’च्या माध्यमातून प्रवेश मिळवला आहे. ही सैन्याची अशी एक विशेष शाखा आहे जिथे युद्धाच्या आधुनिक तंत्रांसाठी, सायबर सुरक्षेसाठी आणि हाय-टेक्नोलॉजी शस्त्रे हाताळण्यासाठी इंजिनिअर्सची गरज असते. याचा अर्थ असा की, शारदेंदु आता त्यांच्या कॉम्प्युटर सायन्सच्या पदवीचा संपूर्ण उपयोग भारतीय सैन्याची सायबर आणि डिजिटल सुरक्षा मजबूत करण्यासाठी करणार आहेत.

Dr. Sarvepalli Radhakrishnan Education: डॉ. सर्वपल्ली राधाकृष्णन यांचे शिक्षण किती झाले होते? जाणून घ्या एका क्लिकवर

ओटीए गया येथे बनले ‘सिनियर अंडर ऑफिसर’

प्रशिक्षणाच्या मैदानातही शारदेंदु तिवारी यांची कामगिरी अत्यंत उत्कृष्ट राहिली. ऑफिसर्स ट्रेनिंग अकादमी, गया येथे त्यांच्या नेतृत्वगुणांची दखल घेऊन त्यांना ‘सिनियर अंडर ऑफिसर’ म्हणून निवडण्यात आले. कॅडेट्सना मिळणारे हे सर्वात मोठे आणि मानाचे पद मानले जाते. बास्केटबॉल आणि टेबल टेनिसचे चाहते असलेले शारदेंदु सांगतात की, सैन्यात फील्ड सर्व्हिस दरम्यान मिळणारा थरार डेस्क जॉबमध्ये कधीही मिळू शकत नाही.