sundar pichai
Sundar Pichai education qualification : सुंदर पिचाई हे आज जगातील सर्वात मोठ्या टेक कंपन्यांपैकी एक असलेल्या ‘गुगल’ आणि तिची मूळ कंपनी ‘अल्फाबेट इंक.’ (Alphabet Inc.) चे सीईओ आहेत. त्यांच्या या यशाची कहाणी अत्यंत खास आहे. ते कोणत्याही मोठ्या व्यावसायिक कुटुंबातून आलेले नाहीत, तर एका साध्या कुटुंबाशी संबंध ठेवतात आणि त्याच वातावरणात लहानाचे मोठे झाले आहेत. तामिळनाडूच्या एका सामान्य कुटुंबात जन्मलेला मुलगा जगातील सर्वात मोठ्या टेक कंपनीचा सीईओ कसा बनला, याचा हा प्रवास जाणून घेऊया.
सुंदर पिचाई यांचा जन्म १० जून १९७२ रोजी तामिळनाडूच्या मदुराई येथे झाला. त्यांचे पूर्ण नाव पिचाई सुंदरराजन असे आहे. त्यांच्या बालपणाचा मोठा काळ चेन्नईमध्ये गेला, येथे ते आपले आई-वडील आणि लहान भावासोबत दोन खोल्यांच्या अपार्टमेंटमध्ये राहायचे. त्यांच्या वडील इलेक्ट्रिकल इंजिनिअर होते आणि आई स्टेनोग्राफर म्हणून काम करत होती. घरात संसाधने मर्यादित होती, परंतु शिक्षणाला नेहमीच सर्वोच्च प्राधान्य दिले गेले.
पिचाई यांनी चेन्नईच्या जवाहर विद्यालय सीनियर सेकेंडरी स्कूल आणि नंतर आयआयटी मद्रास कॅम्पसमध्ये असलेल्या ‘वाना वाणी स्कूल’मध्ये शिक्षण घेतले. त्यांना गणित आणि विज्ञानाची विशेष आवड होती. शिक्षक त्यांना शांत स्वभावाचे, लक्ष देऊन अभ्यास करणारे आणि समस्या सोडवण्यात पटाईत विद्यार्थी मानत असत.
शालेय शिक्षण पूर्ण केल्यानंतर त्यांनी ‘इंडियन इन्स्टिट्यूट ऑफ टेक्नॉलॉजी, खरगपूर’ (IIT Kharagpur) मध्ये प्रवेश घेतला. येथे त्यांनी मेटलर्जिकल इंजिनिअरिंगमध्ये बी.टेकचे शिक्षण घेतले आणि १९९३ मध्ये पदवी मिळवली. विशेष म्हणजे, शैक्षणिक क्षेत्रातील उत्कृष्ट कामगिरीबद्दल त्यांना सन्मानितही करण्यात आले होते. आयआयटीमधील या काळाने त्यांच्या तांत्रिक ज्ञानाला एक मजबूत पाया मिळवून दिला.
यानंतर उच्च शिक्षणासाठी सुंदर पिचाई अमेरिकेला गेले आणि त्यांनी ‘स्टॅनफोर्ड युनिव्हर्सिटी’ मधून मटेरियल्स सायन्स अँड इंजिनिअरिंगमध्ये एम.एस (MS) केले. सुंदर पिचाई यांना अमेरिकेत पाठवण्यासाठी त्यांच्या वडिलांनी स्वतःच्या वार्षिक पगारापेक्षाही जास्त पैसे खर्च करून फ्लाईटचे तिकीट खरेदी केले होते. त्यामुळे त्यांच्या आयुष्यातील हा एक अत्यंत महत्त्वाचा टप्पा ठरला.
UPSC Mains 2026 परीक्षेचे वेळापत्रक जाहीर; परीक्षेला जाताना ‘या’ गोष्टींची घ्या विशेष काळजी!
येथे त्यांना आधुनिक संशोधन, नवीन तंत्रज्ञान आणि जागतिक टेक इंडस्ट्रीचे वातावरण जवळून अनुभवण्याची संधी मिळाली. जरी त्या कालावधीत परदेशात शिकणे त्यांच्या कुटुंबासाठी आर्थिकदृष्ट्या आव्हानात्मक होते, तरीही त्यांच्या आई-वडिलांनी त्यांना पूर्ण साथ दिली.
तांत्रिक शिक्षण पूर्ण केल्यानंतर त्यांनी पेनसिल्व्हेनिया विद्यापीठाच्या ‘व्हार्टन स्कूल’ मधून एमबीए केले. तिथे त्यांना ‘पामर स्कॉलर’ आणि ‘सीबेल स्कॉलर’ यांसारखे प्रतिष्ठित मान सन्मान मिळाले. या शिक्षणामुळे ते केवळ एक इंजिनिअरच राहिले नाहीत, तर एक उत्तम व्यवस्थापक आणि धोरणात्मक विचार करणारे (Strategist) लीडर बनले.
या सर्व प्रवासानंतर, सुंदर पिचाई २००४ मध्ये गुगल कंपनीत रुजू झाले. त्यांनी गुगल टूलबार, क्रोम ब्राउझर आणि अनेक महत्त्वाच्या उत्पादनांवर काम केले. त्यांची नेतृत्व क्षमता पाहता ऑगस्ट २०१५ मध्ये त्यांना गुगलचे मुख्य कार्यकारी अधिकारी (CEO) बनवण्यात आले. डिसेंबर २०१९ मध्ये ते ‘अल्फाबेट इंक.’ चे सुद्धा सीईओ झाले. आज त्यांची गणना जगातील सर्वात प्रभावशाली टेक लीडर्समध्ये केली जाते.
.png "Videos"){kind=small}
