पुण्यातील कोंढव्यात भीषण अपघात; भरधाव कारने 13 वर्षाच्या मुलाला चिरडले

भरधाव कारच्या धडकेत १३ वर्षीय मुलाचा मृत्यू झाल्याची घटना घडली आहे. कोंढवा भागात रविवारी सायंकाळी हा अपघात घडला आहे. पोलिसांनी कार चालकाला अटक केली आहे.

पुणे : राज्यात अपघाताचे प्रमाण वाढले आहे. राज्यातील वेगवेगळ्या भागातून अपघाताच्या घटना उघडकीस येत असतात. अशातचं आता पुण्यातून एक मोठी बातमी समोर आली आहे. भरधाव कारच्या धडकेत १३ वर्षीय मुलाचा मृत्यू झाल्याची घटना घडली आहे. कोंढवा भागात रविवारी सायंकाळी हा अपघात घडला आहे. पोलिसांनी कार चालकाला अटक केली आहे. निवृत्ती बाजीराव किसवे (वय १३, रा. कोंढवा) असे मृत्यू झालेल्या मुलाचे नाव आहे. याप्रकरणी चालक जैद नसीर शेख (वय २३, रा. भाग्योदयनगर, कोंढवा) याला अटक करण्यात आली आहे.

पोलिसांच्या माहितीनुसार, निवृत्ती रविवारी सायंकाळी सहाच्या सुमारास कोंढव्यातील भोलेनाथ चौकातून निघाला होता. तेव्हा भरधाव कारने निवृत्तीला धडक दिली. अपघातात निवृत्ती गंभीर जखमी झाला. अपघातानंतर घटनास्थळी जमलेल्या नागरिकांनी चालक जैद याला पकडून पोलिसांच्या ताब्यात दिले. गंभीर जखमी झालेल्या निवृत्तीला तातडीने खासगी रुग्णालयात दाखल केले. पण, उपचारांदरम्यान त्याचा मृत्यू झाला. जैद याच्याविरुद्ध गुन्हा दाखल करून त्याला अटक करण्यात आल्याची माहिती कोंढवा पोलीस ठाण्याचे वरिष्ठ निरीक्षक विनय पाटणकर यांनी दिली.

भरधाव ट्रॅव्हल्सची कारला धडक

पुणे-बंगळुरु आशियाई महामार्गावर बंद पडलेली इरटीगा कार टोव्हींग क्रेनला टोचन करून शोरूमला घेऊन जात असताना पाठीमागून भरधाव वेगाने आलेल्या ट्रॅव्हल्सने एट्रिगा कारला जोरदार धडक दिली. या अपघातात तीन जण जखमी झाले आहेत. मलकापूर (ता. कराड) गावच्या हद्दीत डी मार्टसमोर रविवारी रात्री १.३० वाजण्याच्या सुमारास हा अपघात झाला आहे. याबाबत सचिन गणपत रवले (वय ४०, रा. मालचौंडी ता. जावळी) यांनी कराड शहर पोलीस ठाण्यात तक्रार दाखल केली आहे. त्यानुसार ट्रॅव्हल्स चालक संतोष केशव माने (रा. सांगली) याच्याविरोधात गुन्हा दाखल करण्यात आला आहे.