हडपसरमधील ‘त्या’ चिमुकलीचा दुर्दैवी मृत्यू; परिसरात हळहळ व्यक्त

पुण्यातून एक मोठी बातमी समोर आली आहे. हडपसरमधील वैभव टॉकीजजवळ भरधाव ट्रकची दुचाकीला धडक बसून झालेल्या अपघातात दुचाकीवरील सहप्रवासी ९ वर्षीय मुलीचा मृत्यू झाला आहे.

पुणे : पुण्यातून एक मोठी बातमी समोर आली आहे. हडपसरमधील वैभव टॉकीजजवळ भरधाव ट्रकची दुचाकीला धडक बसून झालेल्या अपघातात दुचाकीवरील सहप्रवासी ९ वर्षीय मुलीचा मृत्यू झाला आहे. मुलीच्या डोक्यावरून ट्रकचे चाक गेल्याने तिचा जागीच मृत्यू झाला. यात मृत मुलीची आई जखमी झाली आहे.

निशा प्रल्हादकुमार शर्मा (वय ९) असे मृत्यू झालेल्या मुलीचे नाव आहे. याप्रकरणी संध्याकुमारी शर्मा (वय ३०, रा. फुरसुंगी) यांनी तक्रार दिली आहे. त्यावरून ट्रकचालकावर हडपसर पोलिसांत गुन्हा दाखल झाला आहे. हा अपघात रात्री साडेनऊच्या सुमारास झाला.

पोलिसांच्या माहितीनुसार, अपघातग्रस्त ट्रकचा चालक वाहतुकीच्या नियमांकडे दुर्लक्ष करून भरधाव चालला होता. तर तक्रारदार त्यांच्या मुलीसह दुचाकीवरून गाडीतळाच्या दिशेला चालल्या होत्या. त्यावेळी ट्रक चालकाने त्यांना धडक दिली. यात त्या दोघी रस्त्यावर पडल्या. दोघीही गंभीर जखमी झाल्या. त्यांना उपचारासाठी जवळच्या रुग्णालयात नेले. मात्र, तेथे मुलीचा मृत्यू झाला.

दरम्यान, अपघातानंतर ट्रकचालक तेथे न थांबता पसार झाला. त्याला हडपसर पोलिसांनी अटक केली आहे. दरम्यान, हडपसर गाडीतळ परिसरात शाळांचे प्रमाण अधिक आहे. मुलांना शाळेत सोडणे आणि शाळेतून घेऊन जाणे, यासाठी अनेक पालक मोपेड गाड्यांचा वापर करतात. त्यात मुलांना मोपेडला पुढे उभे करण्याचे प्रमाण अधिक आहे. पालकांनी मुलांना ने-आण करताना, त्यांच्या सुरक्षेची पुरेशी काळजी घ्यावी, असे आवाहन सहायक निरीक्षक हसीना शिकलगार यांनी केले आहे.

हे सुद्धा वाचा : पुणे पोलीस आयुक्त थेट उतरले रस्त्यावर; नागरिकांना दिलं मोठं आश्वासन

दीर- भावजयचा मृत्यू

पुण्यातील जेल रोडवरील एका रुग्णालयासमोर गेल्या काही दिवसाखाली भरधाव कारने दिलेल्या धडकेत दीर भावजयीचा मृत्यू झाल्याची घटना घडली आहे. लोहगाव परिसरातील जेल रस्त्यावरील संजय पार्क येथे हा अपघात गुरूवारी सकाळी झाला. याप्रकरणी चालकावर गुन्हा दाखल करण्यात आला आहे. आशीर्वाद गोवेकर (वय ५२), रेश्मा गोवेकर (वय ४७) असे अपघातात मृत्युमुखी पडलेल्या दाम्पत्याचे नाव आहे. याप्रकरणी कारचालक अचलकुमार (वय ४३) याच्यावर गुन्हा दाखल करण्यात आला. याबाबत प्रसाद गोवेकर (वय ५४, रा. शिव पार्वती मंगल कार्यालयाजवळ, गोकुळनगर, कात्रज-कोंढवा रस्ता) यांनी विमानतळ पोलीस ठाण्यात तक्रार दिली आहे.

महिला पोलिसाला कारने उडवले

राज्यात अपघाताचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली ड्रंक अँड ड्राईव्हच्या कारवाईनिमित्त नाकाबंदी करून कारवाई करत असताना एका भरधाव आलिशान कारने कर्तव्य बजावणाऱ्या वाहतूक विभागातील महिला कर्मचाऱ्याला उडविल्याची धक्कादायक घटना घडली. यात महिला कर्मचारी गंभीररित्या जखमी झाल्या असून, त्यांच्यावर खासगी रुग्णालयात उपचार सुरू आहेत. दरम्यान, आलिशान कारमध्ये चौघेजन असल्याचे माहिती समोर आली. महिला अंमलदार दीपमाला राजू नायर (वय ३५) असे गंभीर जखमी झालेल्या महिला कर्मचाऱ्याचे नाव आहे. याप्रकरणी बंडगार्डन पोलीस ठाण्यात अज्ञात चालकाविरोधात गुन्हा दाखल करण्यात आला आहे.