संगमवाडीतील पाण्याच्या टाकीचे काम दोन महिन्यात पूर्ण करा, अन्यथा…; मनसेचा प्रशासनाला इशारा 

संगमवाडी परिसरातील नागरिकांना गेल्या महिनाभरापासून पिण्याच्या पाण्याच्या समस्येला सामोरे जावे लागत आहे. परिसरात निर्माण झालेल्या पाणीटंचाईमुळे नागरिकांची मोठी गैरसोय होत आहे.

• संगमवाडीत महिनाभरापासून पाणीटंचाई
• पाण्याच्या टाकीचे काम दोन महिन्यांत पूर्ण करण्याची मागणी
• मनसेकडून आंदोलनाचा इशारा

पुणे : संगमवाडी परिसरातील नागरिकांना गेल्या महिनाभरापासून पिण्याच्या पाण्याच्या समस्येला सामोरे जावे लागत आहे. परिसरात निर्माण झालेल्या पाणीटंचाईमुळे नागरिकांची मोठी गैरसोय होत असून, नियमित आणि स्वच्छ पाणीपुरवठा करण्याची मागणी जोर धरू लागली आहे. या पार्श्वभूमीवर संगमवाडी येथील प्रलंबित पाण्याच्या टाकीचे बांधकाम तातडीने पूर्ण करावे आणि नागरिकांना पुरेसा पाणीपुरवठा करावा, अशी मागणी महाराष्ट्र नवनिर्माण सेनेच्या वतीने पुणे महापालिका प्रशासनाकडे करण्यात आली आहे.

 

यासंदर्भात मनसेचे पुणे शहर उपाध्यक्ष सुहास भगवानराव निम्हण यांनी पुणे महापालिका आयुक्तांना निवेदन दिले आहे. संगमवाडी परिसरातील पाणीपुरवठ्याची समस्या दिवसेंदिवस गंभीर होत असून, नागरिकांना दैनंदिन गरजांसाठी पाण्याची व्यवस्था करताना अनेक अडचणींचा सामना करावा लागत असल्याचे निवेदनात नमूद करण्यात आले आहे. पिण्याच्या पाण्यासारख्या मूलभूत सुविधेअभावी नागरिकांचे हाल होत असल्याने प्रशासनाने या प्रश्नाकडे तातडीने लक्ष देण्याची गरज असल्याचे मनसेने म्हटले आहे.

संगमवाडी परिसरातील पाण्याच्या टाकीचे बांधकाम अद्याप पूर्ण झालेले नाही. प्रशासन आणि लोकप्रतिनिधी यांच्या कामकाजातील दिरंगाईमुळे हे काम रखडल्याचा आरोपही मनसेच्या वतीने करण्यात आला आहे. या प्रकल्पाचे काम वेळेत पूर्ण झाले असते, तर नागरिकांना पाणीटंचाईचा सामना करावा लागला नसता, अशी भूमिका निवेदनातून मांडण्यात आली आहे. महापालिका प्रशासनाने संबंधित कामाचा तातडीने आढावा घेऊन प्रलंबित बांधकाम येत्या दोन महिन्यांत पूर्ण करावे. तसेच परिसरातील नागरिकांना नियमित, पुरेसा आणि स्वच्छ पाणीपुरवठा सुरू करावा, अशी मागणी करण्यात आली आहे.

हे सुद्धा वाचा : दिवाळीत महाराष्ट्रात फटाक्यांमुळे अग्नितांडव! पिंपरी-चिंचवडमध्ये २५ फ्लॅटसह ५० ठिकाणी आग

दरम्यान, वारंवार मागणी करूनही प्रशासनाने पाणीप्रश्न सोडविण्यासाठी ठोस पावले उचलली नाहीत, तर महाराष्ट्र नवनिर्माण सेनेच्या वतीने नागरिकांना सोबत घेऊन आंदोलन करण्यात येईल, असा इशाराही सुहास निम्हण यांनी निवेदनाद्वारे दिला आहे. त्यामुळे आता महापालिका प्रशासन या मागणीची कितपत दखल घेते आणि संगमवाडीकरांचा पाणीप्रश्न कधी मार्गी लावते, याकडे नागरिकांचे लक्ष लागले आहे.