माळशेज घाटात एसटी बस आणि आयशर टेम्पोचा भीषण अपघात; जखमींचा आकाडाही आला समोर
ओतूर/ मनोहर हिंगणे : राज्यात अपघाताच्या घटना वाढल्या असून, अशातच आता अहिल्यानगर-कल्याण महामार्गावरील अत्यंत निसर्गरम्य मात्र तेवढ्याच धोकादायक मानल्या जाणाऱ्या माळशेज घाटात, शुक्रवारी (ता. २५) सकाळी ११ वाजण्याच्या सुमारास एसटी बस आणि आयशर टेम्पो यांच्यात समोरासमोर जोरदार धडक झाली. या भीषण अपघातात चार जण जखमी झाले असून, त्यांना तातडीने उपचारासाठी जवळच्या रुग्णालयात दाखल करण्यात आले आहे. या अपघातामुळे घाटातील वाहतूक काही काळ पूर्णपणे विस्कळीत झाली होती.
मिळालेल्या सविस्तर माहितीनुसार, अहिल्यानगर-कल्याण महामार्गावरून राज्य परिवहन मंडळाची (एसटी) बस नेहमीप्रमाणे आपल्या मार्गाने प्रवास करत होती. सकाळी ११ च्या सुमारास ही बस माळशेज घाटातील तीव्र वळणाच्या टप्प्यात आली असता, समोरून वेगाने येणाऱ्या आयशर टेम्पो आणि एसटी बसची थेट समोरासमोर धडक झाली. धडक इतकी जोरदार होती की, दोन्ही वाहनांच्या पुढील भागाचे मोठे नुकसान झाले. घाटातील रस्ता अत्यंत अरुंद असणे आणि ऐन वळणावर वाहनांचा अंदाज न येणे, यामुळे हा अपघात घडल्याचा प्राथमिक अंदाज व्यक्त केला जात आहे. मात्र, चालकाचे वाहनावरील नियंत्रण सुटले की तांत्रिक बिघाडामुळे अपघात झाला, याचे नेमके कारण अद्याप स्पष्ट झालेले नाही. पोलीस आणि महामार्ग प्रशासन या प्रकरणी अधिक तपास करत आहेत.
अपघात घडताच मोठा आवाज झाल्याने परिसरातील नागरिक आणि इतर वाहनचालकांनी घटनास्थळी धाव घेतली. धडकेनंतर बसमधील प्रवाशांमध्ये प्रचंड भीतीचे आणि गोंधळाचे वातावरण निर्माण झाले होते. या दुर्घटनेत एसटी बस आणि टेम्पोमधील मिळून एकूण चार प्रवासी जखमी झाले. स्थानिक नागरिक आणि इतर प्रवाशांच्या मदतीने जखमींना तातडीने वाहनातून बाहेर काढण्यात आले.
घटनेची माहिती मिळताच पोलीस दल, रुग्णवाहिका आणि आपत्कालीन यंत्रणेच्या पथकाने तात्काळ घटनास्थळी हजेरी लावली. जखमींना तातडीने प्रथमोपचार देऊन नजीकच्या रुग्णालयात उपचारासाठी हलवण्यात आले आहे. सध्या जखमींवर वैद्यकीय उपचार सुरू असून, त्यांची प्रकृती स्थिर असल्याचे सांगण्यात येत आहे. जखमींची नावे आणि त्यांची ओळख पटवण्याचे काम प्रशासनाकडून सुरू आहे.
माळशेज घाटातील रस्ता अरुंद असल्याने अपघातानंतर महामार्गाच्या दोन्ही बाजूंना वाहनांच्या लांबच लांब रांगा लागल्या होत्या. अपघातग्रस्त वाहने रस्त्याच्या मध्यभागी अडकल्यामुळे वाहतूक पूर्णपणे ठप्प झाली होती. पोलीस आणि संबंधित यंत्रणांनी घटनास्थळी पोहचून क्रेनच्या साहाय्याने अपघातग्रस्त एसटी बस आणि आयशर टेम्पो रस्त्याच्या बाजूला घेण्याचे काम युद्धपातळीवर सुरू केले. तासाभराच्या अथक प्रयत्नांनंतर रस्ता मोकळा करण्यात आला असून वाहतूक हळूहळू पूर्ववत केली जात आहे.
हे सुद्धा वाचा : पोलिस कर्मचाऱ्याची गोळ्या झाडून आत्महत्या; निगडीतील बस डेपोमध्ये आढळला मृतदेह
माळशेज घाटातील तीव्र वळणे, अरुंद रस्ता आणि सतत होणारी वाहनांची वर्दळ लक्षात घेता या मार्गावर अपघातांचे प्रमाण वाढताना दिसत आहे. त्यामुळे या महामार्गावरून प्रवास करणाऱ्या सर्व वाहनचालकांनी अत्यंत वेगावर नियंत्रण ठेवावे, घाटात ओव्हरटेकिंग करणे टाळावे आणि पूर्ण सावधगिरीने वाहने चालवावीत, असे आवाहन पोलीस आणि महामार्ग वाहतूक शाखेकडून करण्यात आले आहे. तसेच प्रवाशांनी सध्याच्या वाहतूक परिस्थितीचा अंदाज घेऊनच आपल्या प्रवासाचे नियोजन करावे, असा सल्लाही देण्यात आला आहे.
.png "Videos"){kind=small}
