महाळुंगेमध्ये मध्यरात्री एटीएम फोडले, लाखोंची रोकड लंपास; औद्योगिक पट्ट्यात खळबळ

चाकण औद्योगिक क्षेत्रातील महाळुंगे परिसरात मध्यरात्री एटीएम फोडून रोकड लंपास केल्याची धक्कादायक घटना उघडकीस आली आहे.

चाकण : चाकण औद्योगिक क्षेत्रातील महाळुंगे परिसरात मध्यरात्री एटीएम फोडून रोकड लंपास केल्याची धक्कादायक घटना उघडकीस आली आहे. गुरुवार (दि. २ एप्रिल २०२६) रोजी अज्ञात चोरट्यांनी ‘इंडिया १’ (India 1) बँकेचे एटीएम मशीन फोडून सुमारे १ ते १.५० लाख रुपयांची रोकड चोरून नेली आहे. या घटनेमुळे औद्योगिक पट्ट्यात खळबळ उडाली असून, सुरक्षेच्या प्रश्नावर पुन्हा एकदा प्रश्नचिन्ह निर्माण झाले आहे.

 

मिळालेल्या माहितीनुसार, महाळुंगे येथील वर्दळीच्या ठिकाणी असलेल्या एटीएम सेंटरवर चोरट्यांनी मध्यरात्रीच्या सुमारास हल्ला चढवला. सर्वप्रथम त्यांनी एटीएम केंद्राच्या दरवाजाचे लॉक तोडून आत प्रवेश केला. त्यानंतर गॅस कटरसारख्या हत्यारांचा वापर करून मशीन फोडण्यात आले. मशीनमधील कॅश बॉक्स उचकटून त्यातील रोकड चोरट्यांनी लंपास केली. पहाटेच्या सुमारास स्थानिक नागरिकांच्या निदर्शनास एटीएम सेंटरचे शटर उचकटलेले व मशीन फोडलेल्या अवस्थेत दिसून आल्याने ही घटना उघडकीस आली.

नागरिकांनी तातडीने पोलिसांना माहिती दिली. घटनेची माहिती मिळताच दक्षिण महाळुंगे पोलिसांनी घटनास्थळी धाव घेत पंचनामा केला. तसेच परिसरातील सीसीटीव्ही कॅमेऱ्यांचे फुटेज ताब्यात घेण्यात आले असून, त्याच्या आधारे चोरट्यांचा माग काढण्याचे काम सुरू आहे. प्राथमिक तपासात ही चोरी सराईत टोळीने केल्याची शक्यता व्यक्त केली जात आहे.

दरम्यान, चाकण-महाळुंगे औद्योगिक पट्ट्यात मोठ्या प्रमाणावर एटीएम केंद्रे असून अनेक ठिकाणी सुरक्षारक्षक नसल्याचे वास्तव समोर आले आहे. या पार्श्वभूमीवर या घटनेमुळे एटीएम सुरक्षेचा मुद्दा पुन्हा एकदा ऐरणीवर आला आहे. स्थानिक नागरिकांमध्ये भीतीचे वातावरण निर्माण झाले असून पोलिसांनी गस्त वाढवण्याची मागणी होत आहे. याप्रकरणी दक्षिण महाळुंगे पोलीस अधिक तपास करत आहेत.

हे सुद्धा वाचा : मशिनरी व्यावसायिकाचा निर्घृण खून, निर्वस्त्र अवस्थेत आढळला मृतदेह; डोक्यावर वाराच्या खुणा

एटीएममध्ये मदतीच्या बहाण्याने फसवणूक

पुण्यातून एक घटना समोर आली आहे. एटीएममध्ये पैसे काढण्यास गेलेल्या ज्येष्ठाला भामट्यांनी मदत करण्याच्या बहाण्याने त्यांचे कार्ड घेऊन गोपनीय पिन क्रमांक पाहून त्यांच्याच खात्यातून पैसे काढल्याची घटना घडली आहे. वानवडी परिसरात ही घटना घढली असून, पोलिसांनी एका आरोपीला अटक केली आहे. याप्रकरणी आयाज कासम शेख (वय ४०, रा. लोहगाव) याला अटक करण्यात आली आहे. या प्रकरणी भारतीय न्याय संहिता कलमे ३१६ (२) आणि ३१८(४) अंतर्गत गुन्हा दाखल करण्यात आला असून, पुढील तपास सुरू आहे. दरम्यान, एटीएममध्ये व्यवहार करताना अनोळखी व्यक्तींची मदत घेऊ नये आणि पिन गोपनीय ठेवावा, असे आवाहन पोलिसांनी केले आहे.