बापानेच केला पोटच्या अल्पवयीन मुलीवर अत्याचार; पुणे जिल्ह्यातील संतापजनक प्रकार

पोटच्या १५ वर्षीय अल्पवयीन मुलीवर लैंगिक अत्याचार करणाऱ्या नराधम बापाला चाकण पोलिसांनी बेड्या ठोकल्या आहेत. राजेंद्र सुभाष राठोड (वय ३९ वर्षे) सध्या राहणार दावडमळा कोहिनुर बिल्डिंग, असे या नराधम बापाचे नाव आहे.

• बापानेच केला पोटच्या अल्पवयीन मुलीवर अत्याचार
• पुणे जिल्ह्यातील संतापजनक प्रकार
• आरोपीला पोलिसांनी ठोकल्या बेड्या

चाकण : राज्यासह देशभरात अत्याचाराच्या घटनांमध्ये मोठी वाढ झाली आहे. वाढत्या अत्याचाराच्या घटनांमुळे महिलांच्या सुरक्षेच्या प्रश्न ऐरणीवर आला आहे. अशातच आता पुणे जिल्ह्यातून एक संतापजनक घटना समोर आली आहे. बाप-लेकीच्या पवित्र नात्याला काळिमा फासणारी एक अत्यंत घृणास्पद घटना चाकणमधील दावडमळा परिसरात घडली आहे. पोटच्या १५ वर्षीय अल्पवयीन मुलीवर लैंगिक अत्याचार करणाऱ्या नराधम बापाला चाकण पोलिसांनी बेड्या ठोकल्या आहेत. राजेंद्र सुभाष राठोड (वय ३९ वर्षे) सध्या राहणार दावडमळा कोहिनुर बिल्डिंग, असे या नराधम बापाचे नाव आहे.

 

मिळालेल्या माहितीनुसार, सोमवारी दुपारी ही घटना घडली आहे. आरोपी राजेंद्र राठोड हा व्यवसायाने ड्रायव्हर असून तो दावडमळा येथील कोहिनूर बिल्डिंगमध्ये कुटुंबासह राहतो. घटनेच्या वेळी पीडित मुलीची आई घरात नसल्याची संधी साधून, आरोपीने आपल्याच अल्पवयीन मुलीवर बळजबरीने अत्याचार केला. या धक्कादायक प्रसंगानंतर पीडित मुलीने घाबरून न जाता थेट पोलिस ठाणे गाठले आणि आपल्या नराधम बापाविरुद्ध तक्रार दिली आहे. चाकण उत्तर पोलिस स्टेशन येथे याप्रकरणी पोक्सोअंतर्गत गुन्हा दाखल केला आहे.

तपासाची चक्रे वेगाने फिरली

तक्रारीनंतर पोलिस हवालदार प्रितम ढमढेरे, योगेश्वर कोळेकर, पोलिस शिपाई महेश कोळी यांनी तपास यंत्रणा वेगाने फिरवत आरोपीला नाशिक फाटा येथून अटक केली आहे. अटक केलेल्या आरोपीचे नाव राजेंद्र सुभाष राठोड (वय ३९ वर्षे) असे आहे. सहाय्यक पोलिस निरीक्षक राजेंद्र पवार आणि सहाय्यक पोलिस उपनिरीक्षक संगीता कदम हे या प्रकरणाचा पुढील तपास करत आहेत.

हे सुद्धा वाचा : यंदाच्या आषाढी वारीच्या नियोजनात मोठा बदल; ‘या’ तारखेला निघणार माऊलींची पालखी

शाळेतून हॉटेलवर नेत अल्पवयीन मुलीच लैंगिक शोषण

नागपूर येथून एक धक्कादायक घटना समोर आली आहे. इंस्टाग्रामवर मैत्री करून एका तरुणाने इयत्ता आठवीत शिक्षण घेणाऱ्या विद्यार्थिनीवर लैंगिक अत्याचार केल्याचे समोर आले आहे. तरुणाने अल्पवयीन मुलीला शाळेतून पळवून हॉटेलवर नेत तिच्यासोबत शरीरसंबंध ठेवले. या प्रकरणात विशेष म्हणजे आरोपी मुलाने दुसऱ्या मुलीच्या ओळखपत्रावरून हॉटेलमध्ये प्रवेश घेतला. हे प्रकरण नागपूर शहरातील आहे. घडलेली घटना नागपूरच्या सदर पोलीस ठाण्याच्या हद्दीत घडली आहे. या घटनेतील आरोपी तरुणाचे नाव करण असे आहे. तरुणाने पीडितेला ज्या हॉटेलवर नेलं होत त्या हॉटेलचं नाव सिल्व्हर सुट्स हॉटेल असे आहे.