दिवसाढवळ्या व्यापाऱ्यावर वार, स्वारगेटमधील सॅलसबरी पार्कजवळ लुटीचा प्रयत्न; नेमकं काय घडलं?

पुणे शहरात गणेशोत्सवाची धामधुम सुरु असताना एका व्यापार्‍यावर भरदिवसा कोयत्याने वार करुन त्यांच्याकडील रोकड लुटण्याचा प्रयत्न केल्याची धक्कादायक घटना घडली आहे. या घटनेत व्यापारी गंभीररीत्या जखमी झाले आहेत.

• दिवसाढवळ्या व्यापाऱ्यावर वार
• स्वारगेटमधील सॅलसबरी पार्कजवळ लुटीचा प्रयत्न
• नेमकं काय घडलं?

पुणे :  राज्यासह देशभरात गुन्हेगारी वाढली असून, वाढत्या गुन्हेगारीच्या घटनांमुळे नागरिकांमध्ये दहशत निर्माण होत आहे. अशातच आता पुणे शहरात गणेशोत्सवाची धामधुम सुरु असताना एका व्यापार्‍यावर भरदिवसा कोयत्याने वार करुन त्यांच्याकडील रोकड लुटण्याचा प्रयत्न केल्याची धक्कादायक घटना घडली आहे. या घटनेत व्यापारी गंभीररीत्या जखमी झाले असून त्यांना खाजगी रुग्णालयात उपचारासाठी दाखल करण्यात आले आहे. याप्रकरणी स्वारगेट पोलीस ठाण्यात गुन्हा नोंदवण्यात आला आहे.

 

राजेश दशरथलाल ओसवाल (वय ५८ रा. अलका पॅराडाईज, संभवनाथ जैन मंदिराजवळ सलीसबरी पार्क) असे जखमी झालेल्या व्यापार्‍याचे नाव आहे. पोलिसांनी दिलेल्या माहितीनुसार, राजेश ओसवाल हे बुधवारी (दि.२३) दुपारी पावणेतीनच्या सुमारास घरातून ४ लाख रुपये बॅगेत घेउन दुकानात चालले होते. सॅलिसबरी पार्क जवळील जैन मंदिराजवळून जात असताना दुचाकीस्वार तिघा चोरट्यांनी त्यांना अडवून बॅगेतील रोकड हिसकावून नेण्याचा प्रयत्न केला. त्यावेळी राजेश यांनी चोरट्यांना विरोध केला असता, चोरट्यांनी त्यांच्या पाठीवर, बरगडीवर कोयत्याने वार करून गंभीररित्या जखमी केले.

दरम्यान, आरडाओरड झाल्यामुळे लोक जमा होऊ लागल्याचे दिसताच दुचाकीस्वार चोरटे पसार झाले. याबाबत नागरिकांनी पोलिसांना माहिती दिली. उपचारासाठी राजेश यांना अ‍ॅडव्हान्टिस्ट हॉस्पिटलमध्ये दाखल करण्यात आले असून, त्यांची प्रकृती स्थिर असल्याची माहिती डॉक्टरांनी दिली आहे.

हे सुद्धा वाचा : मोबाइलच्या वादातून तरुणाची दगडाने ठेचून हत्या, दारूच्या नशेत हल्ला; यवतमाळमधील घटनेनं खळबळ

रेकी केल्यानंतर हल्ला; हल्लेखोरांचा शोध सुरू

घटनास्थळी स्वारगेट पोलिसांसह गुन्हे शाखेने धाव घेतली. आजूबाजूच्या सीसीटीव्ही फुटेजनुसार दुचाकीस्वार चोरट्यांचा माग काढला जात असल्याची माहिती पोलिसांनी दिली. दरम्यान, संबंधित व्यापारी राजेश ओसवाल यांची चोरट्यांनी रेकी केली असल्याचा पोलिसांचा संशय आहे. हल्लेखारांच्या शोधासाठी गुन्हे शाखेसह स्वारगेट पोलिसांची पथके रवाना झाली आहेत.