मोबाइलच्या वादातून तरुणाची दगडाने ठेचून हत्या, दारूच्या नशेत हल्ला; यवतमाळमधील घटनेनं खळबळ

दारूच्या नशेत मोबाईलच्या कारणावरून झालेल्या वादाचे पर्यवसान थेट खुनात झाल्याची धक्कादायक घटना यवतमाळ शहरात घडली आहे. एका ३८ वर्षीय मजुराचा दगडाने ठेचून खून करण्यात आल्याची घटना मंगळवारी (दि.२२) सकाळी उघडकीस आली आहे.

• मोबाइलच्या वादातून तरुणाची दगडाने ठेचून हत्या
•  दारूच्या नशेत केला हल्ला
• यवतमाळमधील घटनेनं खळबळ

यवतमाळ :  दारूच्या नशेत मोबाईलच्या कारणावरून झालेल्या वादाचे पर्यवसान थेट खुनात झाल्याची धक्कादायक घटना यवतमाळ शहरात घडली आहे. एका ३८ वर्षीय मजुराचा दगडाने ठेचून खून करण्यात आल्याची घटना मंगळवारी (दि.२२) सकाळी उघडकीस आली आहे. शेख मुश्ताक शेख मस्तान (वय ३८ रा. अशोक नगर यवतमाळ) असे मृताचे नाव आहे. या प्रकरणी फिर्यादी अशपाक शेख मुस्ताक शेख (वय १९, रा. अशोकनगर, यवतमाळ) यांच्या तक्रारीवरून यवतमाळ शहर पोलिसांनी सोनू अली शराफत अली (वय २५, रा. अशोकनगर) आणि शेख समीर शेख असलम (वय २३, रा. अलकबीरनगर) या दोघांविरुद्ध गुन्हा दाखल करत दोघांना अटक करण्यात आली आहे.

 

मृतक मुस्ताक शेख मस्तान शेख रोजमजुरीचे काम करीत होता. सोमवारी सकाळी सुमारे ९ वाजता तो नेहमीप्रमाणे कामासाठी घराबाहेर पडला. मात्र रात्री उशिरापर्यंत घरी परतला नाही. त्यामुळे कुटुंबीयांनी रात्री ११ वाजेपर्यंत त्याची प्रतीक्षा केली. दरम्यान, मुस्ताक शेख हे छोटा बायपास रोडवरील गॅरेजच्या पाठीमागे मृतावस्थेत पडल्याची माहिती मंगळवारच्या सकाळी कुटुंबीयांना मिळाली. घटनास्थळी पोहोचल्यानंतर त्याच्या चेहऱ्यावर दगडाने मारहाण केल्याच्या जखमा दिसून आल्या. तसेच मृतदेहाजवळ रक्ताने माखलेला मोठा दगड आढळून आला. मंगळवारी सकाळी या घटनेची माहिती मिळताच उपविभागीय पोलिस अधिकारी अमोल कोळी, पोलिस निरीक्षक सुरडकर, सहाय्यक पोलिस निरीक्षक बिरादार आणि पोलिस उपनिरीक्षक सुजाता मनवर हे घटनास्थळी दाखल झाले.

एसडीपीओ कोळी यांनी घटनास्थळाची पाहणी केली. यावेळी फॉरेंसिक पथकाने घटनास्थळावरुन पाहणी केली. यावेळी मृतकाच्या चेहऱ्यावर दगडाने गंभीर मारहाण केल्याच्या खुणा होत्या. तर घटनास्थळी रक्ताने माखलेला मोठा दगड पोलिसांनी ताब्यात घेतला. शहर पोलिसांनी घटनास्थळाचा पंचनामा करून आरोपींविरुध्द खूनाचा गुन्हा दाखल केला आहे.

हे सुद्धा वाचा : गणेश विसर्जन मिरवणुकीत पोलिसांना अरेरावी, भाजप तालुकाध्यक्षासह 14 जणांवर गुन्हा; नेमकं काय घडलं?

मोबाइलच्या कारणावरून झाली होती शाब्दिक चकमक

मृतकाचा मुलगा फिर्यादी अशपाक शेख याने शहर ठाण्यात दाखल केलेल्या जबानीनुसार, घटनेच्या रात्री सोनू अली आणि शेख समीर हे दोघे पाटीपुरा परिसरात फिरताना मृतकाच्या परिचितांना दिसले होते. याचदरम्यान मुश्ताक शेख आणि या दोन्ही आरोपींमध्ये दारूच्या नशेत मोबाइलच्या कारणावरून शाब्दिक चकमक झाली होती. त्यानंतर दोघांनी संगनमत करून दगडाने हल्ला करून मुश्ताक शेख याचा खून केल्याचे तक्रारी नमुद केले.