गणेश विसर्जन मिरवणुकीत पोलिसांना अरेरावी, भाजप तालुकाध्यक्षासह 14 जणांवर गुन्हा; नेमकं काय घडलं?
डिगोळ येथे शंभू महादेव गणेश मंडळाच्या विसर्जन मिरवणुकीसाठी पोलिस व होमगार्डचा बंदोबस्त तैनात करण्यात आला होता. रात्री सुमारे १०.२२ वाजता मिरवणुकीत मोठ्या आवाजात डीजे सुरू असल्याची तसेच विसर्जनाची कार्यवाही वेळेत पूर्ण न करता विनाकारण विलंब होत असल्याची माहिती बंदोबस्तावरील होमगार्डने वरिष्ठ पोलिस अधिकाऱ्यांना दिली. त्यानंतर परिविक्षाधीन पोलीस उपअधीक्षक तथा प्रभारी अधिकारी अक्षय जाधव हे पोलीस ठाण्याच्या कर्मचाऱ्यांसह घटनास्थळी दाखल झाले. रात्री सुमारे १०.३५ वाजता पोलिसांनी मंडळाच्या पदाधिकाऱ्यांसह मिरवणुकीतील नागरिकांना डीजे बंद करून विसर्जनाची कार्यवाही तातडीने पूर्ण करण्याच्या सूचना दिल्या. मात्र, या सूचनांकडे दुर्लक्ष करून डीजे सुरू ठेवण्यात आल्याचे आणि पोलिसांशी हुज्जत घालण्यात आल्याचे फिर्यादीत नमूद आहे. यावेळी पोलिस व होमगार्ड यांच्याशी वाद घालून शासकीय कर्तव्यात अडथळा निर्माण केल्याचा आरोप करण्यात आला आहे.
फिर्यादीत माधव भाउसाहेब बिरादार, रामेश्वर विनोद डिगोळे (अध्यक्ष), मंगेश मारोती दासरे (उपाध्यक्ष), सुदर्शन दिनकर डिगोळ, गोविंद मधुकर दासरे, संदीप मारोती टाकळगावे, किरण रविंद्र बिरादार, नवाज बाबुराव मुजेवार, शुभम नानासाहेब बिरादार, सुधाकर शिंगरुपे, बाळू महादू लोंढे, सतीश राजाराम कलमे, सचिन माधव वडजे आणि अमोल ज्ञानोबा शेळके (सर्व रा. डिगोळ, ता. शिरूर अनंतपाळ) यांची नावे आहेत. फिर्यादी पोलीस अंमलदार विनय उबाळे यांच्यासह बंदोबस्तावरील पोलिस व होमगार्ड यांच्याशी धक्काबुक्की व हुज्जत, अश्लील शिवीगाळ, घोषणाबाजी आणि जमावाला चिथावणी देत निर्धारित वेळेनंतरही मिरवणूक सुरू ठेवल्याचा आरोप आहे. या प्रकरणी पोलीस अंमलदार विनय उबाळे यांच्या फिर्यादीवरून 14 जणांविरुद्ध गुन्हा दाखल करण्यात आला आहे. पुढील तपास शिरूर अनंतपाळ पोलीस करीत आहेत.
.png "Videos"){kind=small}
