महिलांची बैठक लावण्यावरून वाद, कांदळीतील कलाकेंद्रात गाेळीबाराचा थरार; नेमकं काय घडलं?
आळेफाटा : राज्यात गुन्हेगारीच्या घटना दिवसेंदिवस वाढत असून, अशातच आता पुणे-नाशिक महामार्गालगत पिंपळवंडीजवळील कांदळी (ता. जुन्नर) ग्रामपंचायत हद्दीत असलेल्या तुळजाभवानी कलाकेंद्रात शनिवारी पहाटेच्या सुमारास गोळीबाराची थरारक घटना घडली आहे. महिलांची बैठक (कला सादर करण्याची वेळ/बैठक) लावण्यावरून झालेल्या तीव्र वादातून चाकण येथील एका तरुणाने थेट गोळीबार केला. या घटनेत ओतूर येथील एक तरुण गंभीर जखमी झाला आहे.
मिळालेल्या माहितीनुसार, कलाकेंद्रात महिलांची बैठक लावण्यावरून चाकण येथील तरुण आणि इतर उपस्थितांमध्ये वाद झाला. हा वाद विकोपाला गेल्याने संतापलेल्या चाकण येथील तरुणाने पिस्तूल काढून गोळीबार केला. यामध्ये फिरोज कादिर शेख (वय ३१, रा. ओतूर) हा तरुण गोळी लागल्याने गंभीर जखमी झाला.
आळेफाटा येथे उपचार सुरू
घटना घडल्यानंतर कलाकेंद्रात घबराट निर्माण हाेऊन पळापळ झाली. जखमी फिरोज शेख याला तातडीने आळेफाटा येथील खाजगी रुग्णालयात उपचारासाठी दाखल करण्यात आले असून, त्याच्यावर उपचार सुरू आहेत.
संशयित आरोपींचा शोध सुरू
घटनेची माहिती मिळताच नारायणगाव पोलीस ठाण्याचे वरिष्ठ अधिकारी व कर्मचारी तातडीने घटनास्थळी दाखल झाले. पोलिसांनी कलाकेंद्र परिसराची पाहणी करून तपासाची चक्रे वेगाने फिरवली आहेत. याप्रकरणी संशयित आरोपींचा शोध सुरू असून, पुढील तपास नारायणगाव पोलीस करत आहेत.
पुण्यातील वाघोलीत व्यावसायिकावर गोळीबार
जमीन खरेदी विक्री करणाऱ्या व्यवसायिकावर दुचाकीवरून येऊन गोळीबार करत तिघांनी त्यांच्याकडील ११ लाख रुपये किंमतीचे २२ तोळे वजनाचे सोन्याचे दागिणे लुटल्याची धक्कादायक घटना समोर आली आहे. व्यावसायिक त्यांच्या कारमध्ये होता तरीही चोरट्यांनी त्यांच्या खिडकीजवळ येऊन गोळी झाडली. गोळीबारात काच फुटून त्यांना लागली. गोळीबारात व्यवसायिक संतोष ज्ञानोबा गावडे (वय ५०, रा. गावडेवाडी, शिरसवाडी, ता. शिरुर) हे जखमी झाले आहेत. त्यांच्या तोंडाला गोळी लागली आहे. त्यांच्यावर सध्या खासगी रुग्णालयात उपचार सुरू आहेत. याप्रकरणी संतोष यांचे चुलत बंधू दत्तात्रय गावडे (वय ५०) यांनी लोणीकंद पोलिसांत तक्रार दिली आहे. त्यानुसार पोलिसांनी तिघा अनोळखी चोरट्यांविरुद्ध आर्म ॲक्टनुसार खूनाच्या प्रयत्नाचा गुन्हा दाखल केला आहे. ही घटना बुधवारी (दि.5) रात्री साडे आठ वाजताच्या सुमारास गावडेवाडी शिरसवाडी येथील पंडीत गावडे यांच्या बंगल्यासमोर घडली आहे.
.png "Videos"){kind=small}
