पाटस-दौंड रोडवर दोन दुचाकींचा भीषण अपघात; २५ वर्षीय तरुणाचा जागीच मृत्यू
पाटस : राज्यात अपघाताच्या घटनांमध्ये मोठी वाढ झाली असून, दररोज अनेकांना अपघातामध्ये जीव गमवावा लागत आहे. अशातच आता एक मोठी बातमी समोर आली आहे. पाटस-दौंड अष्टविनायक रस्त्यावर दोन दुचाकींची समोरासमोर जोरदार धडक होऊन भीषण अपघात झाला आहे. या अपघातात पाटस येथील २५ वर्षीय तरुणाचा जागीच मृत्यू झाला असून, दुसरा दुचाकीस्वार गंभीर जखमी झाला आहे. ही माहिती पाटस पोलीस चौकीचे सहाय्यक पोलीस निरीक्षक सुधीर कदम यांनी दिली.
शुभम मिनानाथ शितोळे (वय २५ रा. पाटस, देशमुखवस्ती, ता. दौंड, जि. पुणे) असे या मृत्यू झालेल्या तरुणाचे नाव असून, गजानन आत्माराम इंगळे (, रा. पारंबी, ता. मुक्ताईनगर, जि. जळगाव) हा दुचाकी चालक गंभीर स्वरूपात जखमी झाला असून त्याचावर दौंड येथील खासगी रुग्णालयात उपचार सुरू आहेत. ही घटना शुक्रवार, दिनांक ११ रोजी रात्री १०.१५ वाजण्याच्या सुमारास पाटस-दौंड रोडवरील जुन्या इरिगेशन कॉलनीजवळील धोकादायक वळणावर घडली आहे.
पोलिसांनी दिलेल्या माहितीनुसार आरोपी दुचाकी गजानन आत्माराम इंगळे हा होंडा कंपनीची शाईन मोटारसायकल (क्र. MH-30-AS-1914) वरून भरधाव वेगात पाटसच्या दिशेने येत होता. जुन्या दौंड-पाटस रोडच्या वळणावर अचानक वळल्याने त्याचे नियंत्रण सुटले. त्याचवेळी पाटस बाजूकडून दौंड बाजूकडे जाणारे शुभम शितोळे हा बजाज कंपनीची प्लॅटिना मोटारसायकल (क्र. MH-42-V-5695 ) वरून येत होता. आरोपीच्या मोटारसायकलने शुभमच्या गाडीला जोराची ठोकर दिली. या धडकेत शुभमच्या डोक्याला गंभीर मार लागून मोठा रक्तस्त्राव झाला. त्याला तातडीने पाटस येथील खासगी रुग्णालयात उपचारासाठी नेण्यात आले असता, डॉक्टरांनी तपासून उपचारापूर्वीच त्याचा मृत्यू झाल्याचे घोषित केले.
दरम्यान, अपघातात गंभीर जखमी झालेल्या आरोपी गजानन इंगळे याच्यावर दौंड येथील खासगी रुग्णालयात उपचार सुरू आहेत. या अपघातात दोन्ही दुचाकींचे मोठे नुकसान झाले आहे. या प्रकरणी मृत शुभम याचे चुलते नितीन शितोळे यांनी यवत पोलीस ठाण्यात फिर्याद दिल्याने गजानन इंगळे यांच्या विरोधात गुन्हा दाखल करण्यात आला असून, पुढील तपास सहाय्यक फौजदार आर. जे. जाधव हे करीत आहेत.
.png "Videos"){kind=small}
