मानसिक छळामुळे तरुणाने संपवले जीवन, पुण्यातील घटनेनं खळबळ; दोघींविरुद्ध गुन्हा दाखल

पत्नीच्या आणि मेहुणीच्या सततच्या मानसिक त्रासाला कंटाळून एका तरुणाने राहत्या घरात गळफास घेऊन आत्महत्या केल्याची धक्कादायक घटना गोखलेनगर भागातील जनवाडी परिसरात घडली आहे.

• मानसिक छळामुळे तरुणाने संपवले जीवन
• पुण्यातील घटनेनं खळबळ
• दोघींविरुद्ध गुन्हा दाखल

पुणे : पत्नीच्या आणि मेहुणीच्या सततच्या मानसिक त्रासाला कंटाळून एका तरुणाने राहत्या घरात गळफास घेऊन आत्महत्या केल्याची धक्कादायक घटना गोखलेनगर भागातील जनवाडी परिसरात घडली आहे. या प्रकरणी तरुणाला आत्महत्येस प्रवृत्त केल्याच्या आरोपावरून पत्नीसह मेहुणीविरुद्ध चतु:शृंगी पोलीस ठाण्यात गुन्हा दाखल करण्यात आला आहे. प्रेम अनिल जाधव (वय ३०, रा. पाच पांडव सोसायटी, जनवाडी जनता वसाहत) असे आत्महत्या केलेल्या तरुणाचे नाव आहे.

 

या प्रकरणी त्याची पत्नी रेवती रमेश गजमल ऊर्फ रेवती प्रेम जाधव (वय २५) आणि मेहुणी रितिका रमेश गजमल (वय ३०, रा. धर्मनगर, अरुण कदम चौक, जनवाडी) यांच्याविरुद्ध गुन्हा दाखल करण्यात आला आहे. याबाबत प्रेम याची आई लक्ष्मी जाधव (रा. पाच पांडव सोसायटी, जनता वसाहत, जनवाडी) यांनी चतु:शृंगी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, प्रेम हा बेरोजगार होता. त्याच्यावर कर्जाचा डोंगर होता. त्यातूनच तो आधीच मानसिक तणावात होता. त्यात पत्नी आणि मेहुणी त्याला सतत मानसिक त्रास देत होत्या. किरकोळ कारणावरून त्याच्याशी वाद घातला जात होता, तसेच अपमानास्पद वागणूक दिली जात होती, असा आरोप फिर्यादीत करण्यात आला आहे. पत्नी आणि मेहुणीच्या त्रासामुळे मुलगा प्रेम याने ४ नोव्हेंबर रोजी राहत्या घरात गळफास घेऊन आत्महत्या केली, असे फिर्यादीत म्हटले आहे. घटना समजताच कुटुंबीयांनी धाव घेतली, मात्र तोपर्यंत उशीर झाला होता. या घटनेमुळे जनवाडी परिसरात हळहळ व्यक्त केली जात आहे. दरम्यान, फिर्यादीवरून पोलिसांनी दोन्ही महिलांविरुद्ध आत्महत्येस प्रवृत्त केल्याचा गुन्हा दाखल केला आहे. नेमका त्रास कशा प्रकारचा होता, कर्जाचे कारण काय होते, याबाबत पोलीस अधिक तपास करत आहेत. सहायक पोलीस निरीक्षक स्नेहल पाटील या प्रकरणाचा तपास करत आहेत.

हे सुद्धा वाचा : संगमवाडीतील पाण्याच्या टाकीचे काम दोन महिन्यात पूर्ण करा, अन्यथा…; मनसेचा प्रशासनाला इशारा