मंगळवार, 11 ऑगस्ट 2026
संग्रहित फोटो
पुणे : पुण्यातील मुंढवा भागात रिक्षा चालक तरुणाला चार ते पाच जणांच्या टोळक्याने भरवस्तीत बेदम मारहाण केल्याचा एक व्हिडीओ मोठ्या प्रमाणात व्हायरल झाला आहे. धक्कादायक म्हणजे, मुंढवा पोलिसांच्या अंसेवदनशीलतेचा नमुना मात्र, यावरून दिसून आला असून, याप्रकरणात पोलिसांनी अदखलपात्र गुन्ह्याची नोंद केली असल्याची माहिती समोर आली आहे. त्यामुळे पुणे पोलिस किती संवेदनशील आहेत, हेही यावरून स्पष्ट दिसत आहे.
याप्रकरणी पवन शिवाजी उबाळे (वय २७, रा. घोरपडी) असे मारहाण झालेल्या रिक्षाचालक तरुणाचे नाव आहे. याप्रकरणी मुंढवा पोलिस ठाण्यात अदखलपात्र गुन्हा नोंद करण्यात आला आहे. मिळालेल्या माहितीनुसार, मारहाणीचा प्रकार ७ ऑगस्ट रोजी दुपारी घोरपडी येथील बालाजीनगर येथे घडला आहे.
पवन उबाळे हे रिक्षा चालक आहे. स्वप्नील वाघमारे या तरुणासोबत त्याचे जुने वाद होते. या वादातूनच दुपारी उबाळेला स्वप्नीलने बालाजीनगर येथे भरवस्तीत अडविले. त्याला स्वप्नील व इतर तीन व्यक्तींनी अश्लील भाषेत शिवीगाळ करत बेदम मारहाण केली. लाकूड तसेच बेल्टच्या पट्याने आणि हाताने मारहाण केली. चौघे मिळून त्याला मारहाण करत असताना या परिसरातील नागरिक मोठ्या संख्येने जमा झाले होते. मात्र, त्याला कोणीही वाचविले नाही. नागरिक देखील तरुणांच्या या मारहाणीमुळे भयभित झाले होते. भरवस्तीत अन् दुपारी ही मारहाण झाल्यानंतर परिसरात भितीचे वातावरण पसरले होते.
दरम्यान, या मारहाणीचा एक अडीच मिनिटांचा व्हिडीओ व्हायरल झाला असून, त्यातील मारहाण पाहिल्यानंतर प्रत्येक नागरिकामध्ये चिड निर्माण होत आहे. असे असताना मात्र, असंवेदनशील मुंढवा पोलिसांनी याप्रकरणात केवळ अदखलपात्र गुन्हा नोंद करून हे प्रकरण मिटविले असल्याचे दिसून येत आहे.
