पत्नीला मित्रासोबत पाहिले अन् पतीलाच बसला चोप, पुण्यातील घटना; नेमकं काय घडलं?

पत्नीला तिच्या मित्रासोबत दुचाकीवरून फिरताना पाहिल्यानंतर पतीने याबाबत विचारणा केली. तेव्हा मात्र, पतीला तिघांनी लाथाबुक्क्यांनी आणि काठीने मारहाण केल्याची घटना घडली आहे.

पुणे : राज्यासह देशभरात गुन्हेगारी वाढली असून, दररोज खून, खुनाचा प्रयत्न, मारहाण यासारख्या घटना घडत आहेत. अशातच आता एक मोठी बातमी समोर आली आहे. पत्नीला तिच्या मित्रासोबत दुचाकीवरून फिरताना पाहिल्यानंतर पतीने याबाबत विचारणा केली. तेव्हा मात्र, पतीला तिघांनी लाथाबुक्क्यांनी आणि काठीने मारहाण केल्याची घटना घडली आहे. मारहाणीनंतर त्याच्या खिशातील १८ हजार रुपयांची रोकड काढून घेतली. लोहगाव परिसरात हा प्रकार घडला आहे.  याप्रकरणी गणेश अशोक रेड्डी (वय ३५), राजूराव धोत्रे (वय ४६) व रेखा (वय ३५, सर्व रा. बोपोडी) यांच्यावर लोहगाव पोलिस ठाण्यात गुन्हा दाखल करण्यात आला आहे. याबाबत महिलेच्‍या पतीने तक्रार दिली आहे.

पोलिसांच्या माहितीनुसार, तक्रारदार हे भाडे सोडण्यासाठी खडकीहून एअरपोर्टकडे जात होते. त्यावेळी फॉरेस्ट पार्क रोडवरील व्हॉनेटिव्ह सोसायटीजवळ त्यांना पत्नी तिच्या एका मित्रासोबत बुलेटवरून फिरताना दिसली. तक्रारदारांनी याबाबत विचारणा केल्यानंतर तिघांनी संगनमत करून त्यांना हाताने, लाथाबुक्क्यांनी आणि रस्त्यावरील काठीने मारहाण केली. गणेश रेड्डी याने त्यांच्या पॅन्टच्या खिशातील १८ हजार रुपये काढून घेतल्याचे तक्रारीत म्हंटले आहे. या सर्व प्रकारानंतर लोहगाव पोलिस ठाण्यात गुन्‍हा दाखल करण्यात आला आहे.

हे सुद्धा वाचा : पुरंदरच्या ग्रामसेवकांची पंचायत समितीत रंगली आखाड पार्टी, घरकुलांच्या कामाकडे दुर्लक्ष; सीईओंच्या आदेशाला केराची टोपली

पुण्यातील वाघोलीत व्यावसायिकावर गोळीबार

जमीन खरेदी विक्री करणाऱ्या व्यवसायिकावर दुचाकीवरून येऊन गोळीबार करत तिघांनी त्यांच्याकडील ११ लाख रुपये किंमतीचे २२ तोळे वजनाचे सोन्याचे दागिणे लुटल्याची धक्कादायक घटना समोर आली आहे. व्यावसायिक त्यांच्या कारमध्ये होता तरीही चोरट्यांनी त्यांच्या खिडकीजवळ येऊन गोळी झाडली. गोळीबारात काच फुटून त्यांना लागली. गोळीबारात व्यवसायिक संतोष ज्ञानोबा गावडे (वय ५०, रा. गावडेवाडी, शिरसवाडी, ता. शिरुर) हे जखमी झाले आहेत. त्यांच्या तोंडाला गोळी लागली आहे. त्यांच्यावर सध्या खासगी रुग्णालयात उपचार सुरू आहेत. याप्रकरणी संतोष यांचे चुलत बंधू दत्तात्रय गावडे (वय ५०) यांनी लोणीकंद पोलिसांत तक्रार दिली आहे. त्यानुसार पोलिसांनी तिघा अनोळखी चोरट्यांविरुद्ध आर्म ॲक्टनुसार खूनाच्या प्रयत्नाचा गुन्हा दाखल केला आहे. ही घटना बुधवारी (दि.5) रात्री साडे आठ वाजताच्या सुमारास गावडेवाडी शिरसवाडी येथील पंडीत गावडे यांच्या बंगल्यासमोर घडली आहे.