५०० रुपयांच्या वादातून राडा! पती- पत्नीला बेदम मारहाण; नेमकं काय घडलं?

केवळ ५०० रुपयांच्या वादातून दोन तरुणांनी एका महिलेच्या पतीला मारहाण केली आहे. पतीची सुटका करण्यासाठी मध्यस्थी करणाऱ्या पत्नीलाही बांबूच्या काठीने मारहाण करून जखमी करण्यात आल्याची धक्कादायक घटना समोर आली आहे.

• शेत जमिनीच्या व्यवहारावरून 500 रुपयांवरून वाद
•  पतीला मारहाण, पत्नीवरही बांबूच्या काठीने हल्ला
• दावणीवाडा पोलिसांत गुन्हा दाखल

गोंदिया : राज्यासह देशभरात गुन्हेगारी वाढली आहे. दररोज वेगवेगळ्या भागात खून, खुनाचा प्रयत्न, मारहाण यासारख्या घटना घडत आहेत. वाढत्या गुन्हेगारीमुळे नागरिकांमध्ये दहशत निर्माण होत आहे. अशातच आता  केवळ ५०० रुपयांच्या वादातून दोन तरुणांनी एका महिलेच्या पतीला मारहाण केली आहे. पतीची सुटका करण्यासाठी मध्यस्थी करणाऱ्या पत्नीलाही बांबूच्या काठीने मारहाण करून जखमी करण्यात आल्याची धक्कादायक घटना समोर आली आहे. ही घटना दावणीवाडा पोलिस ठाण्याच्या हद्दीतील करुटोला येथे घडली आहे. या घटनेमुळे मोठी खळबळ उडाली आहे.

 

नीतेश बावनकर (वय ३५, रा. मजीतपूर) आणि शुभम पाटले (वय २४) अशी आरोपींची नावे आहेत. हे दोघेही घटनेच्या वेळी दारूच्या नशेत होते. शेतातील जमिनीच्या व्यवहारावरून ५०० रुपयांच्या कारणावरून त्यांचा एका महिलेच्या पतीसोबत वाद झाला. सुरुवातीला किरकोळ वाटणारा हा वाद काही वेळातच विकोपाला गेला. या वादातून दोघांनी पतीला मुक्क्यांनी मारहाण केली. पतीला मारहाण होत असल्याचे पाहून परिसरातील लोकांनी मध्यस्थी करण्याचा प्रयत्न केला. मात्र, नशेत असलेल्या आरोपींनी कोणाचेच ऐकले नाही. त्यानंतर आरोपींनी त्यांचा घरासमोरील रस्त्यापर्यंत पाठलाग करून पुन्हा वाद घातला व महिलेला शिवीगाळ केली. यावेळी महिलेने मध्यस्थी करण्याचा प्रयत्न केला असता, शुभमने अंगणात पडलेल्या बांबूच्या काठीने तिच्यावर हल्ला केला. यात महिला जखमी झाली. तिच्या हाताला आणि पाठीला दुखापत झाली आहे. एवढ्यावरच न थांबता आरोपींनी तिला जीवे मारण्याची धमकी दिली. त्यामुळे संपूर्ण कुटुंब भीतीच्या छायेखाली आले आहे.

घटनेनंतर जखमी महिलेने दावणीवाडा पोलीस ठाण्यात धाव घेत तक्रार दाखल केली. महिलेच्या तक्रारीवरून दावणीवाडा पोलिसांनी दोन्ही आरोपींविरुद्ध मारहाण, शिवीगाळ आणि जीवे मारण्याची धमकी दिल्याप्रकरणी गुन्हा दाखल केला आहे .या प्रकरणाचा पुढील तपास पोलीस उपनिरीक्षक अजता किहे करीत आहेत. केवळ ५०० रुपयांसाठी पती-पत्नीला मारहाण झाल्याने करुटोला परिसरात संताप व्यक्त होत आहे. दारूच्या नशेत केलेल्या या कृत्यामुळे गावात तणावाचे वातावरण निर्माण झाले आहे. आरोपींवर कठोर कारवाई करण्याची मागणी गावकऱ्यांकडून होत आहे.

हे सुद्धा वाचा : शिरूर नगरपरिषदेतील सत्तासंघर्ष पेटला! शरद पवार गट आक्रमक; प्रकाश धारीवाल यांना अप्रत्यक्ष शह देण्याची खेळी?