‘एकमेकांकडे पाहिलं’ अन् वाद पेटला, डिलिव्हरी बॉयच्या डोक्यात कोयत्याने वार; उत्तमनगरमधील घटनेनं खळबळ

दारूच्या नशेत एकमेकांकडे पाहण्यावरून झालेल्या किरकोळ वादाचे पर्यवसान थेट हल्ल्यात झाले. दोघांनी मिळून डिलिव्हरी बॉय तरुणाला शिवीगाळ करत मारहाण केली आणि त्याच्या डोक्यात कोयत्याने वार करून जीवे मारण्याचा प्रयत्न केला आहे.

• ‘एकमेकांकडे पाहिलं’ अन् वाद पेटला
• डिलिव्हरी बॉयच्या डोक्यात कोयत्याने वार
• उत्तमनगरमधील घटनेनं खळबळ

पुणे : दारूच्या नशेत एकमेकांकडे पाहण्यावरून झालेल्या किरकोळ वादाचे पर्यवसान थेट हल्ल्यात झाले. दोघांनी मिळून डिलिव्हरी बॉय तरुणाला शिवीगाळ करत मारहाण केली आणि त्याच्या डोक्यात कोयत्याने वार करून जीवे मारण्याचा प्रयत्न केला आहे. ही घटना रविवारी (४ ऑक्टोबर) रात्री उत्तमनगर परिसरात घडली आहे. याप्रकरणी उत्तमनगर पोलिसांनी एका तरुणाला अटक केली असून, त्याच्या अल्पवयीन साथीदाराविरुद्धही गुन्हा दाखल करण्यात आला आहे.

 

आदित्य गुलाब कांबळे (वय २३, रा. कोंढवे धावडे) असे जखमी डिलिव्हरी बॉयचे नाव आहे. या प्रकरणी सागर प्रदीप कोठारी (वय २२, रा. इस्कॉन मंदिराजवळ, उत्तमनगर) याला पोलिसांनी अटक केली आहे. कोठारी याच्यासोबत असलेल्या अल्पवयीन साथीदारावर खुनाचा प्रयत्न केल्याप्रकरणी गुन्हा दाखल करण्यात आला आहे. याबाबत आदित्य कांबळे यांनी उत्तमनगर पोलिस ठाण्यात तक्रार दिली आहे.

नेमकं काय घडलं?

पोलिसांनी दिलेल्या माहितीनुसार, आदित्य कांबळे हा डिलिव्हरी बॉय म्हणून काम करतो. रविवारी रात्री दहाच्या सुमारास तो आपल्या मित्रासोबत उत्तमनगर येथील श्री भवानी माता मंदिर चौकात थांबला होता. त्यावेळी सागर कोठारी आणि त्याचा अल्पवयीन मित्र दारूच्या नशेत तेथे आले. यावेळी एकमेकांकडे पाहण्यावरून आदित्य आणि आरोपींमध्ये वाद झाला. वाद वाढल्यानंतर आरोपींनी आदित्यला शिवीगाळ करत मारहाण करण्यास सुरुवात केली. याचदरम्यान सागर कोठारी याने आदित्यच्या डोक्यात कोयत्याने वार केला. या हल्ल्यात आदित्य गंभीर जखमी झाला.

हे सुद्धा वाचा : रक्ताच्या नात्याला काळिमा! प्रॉपर्टीच्या वादातून 83 वर्षीय आजोबांकडून नातवाची हत्या

घटनेची माहिती मिळताच उत्तमनगर पोलिसांनी घटनास्थळी धाव घेतली. हल्ल्यानंतर पसार झालेल्या सागर कोठारी याला पोलिसांनी ताब्यात घेत अटक केली. जखमी आदित्यवर रुग्णालयात उपचार करण्यात आले. खुनाचा प्रयत्न केल्याप्रकरणी सागर कोठारी याला अटक करण्यात आल्याची माहिती वरिष्ठ पोलिस निरीक्षक राघवेंद्रसिंह क्षीरसागर यांनी दिली. या प्रकरणाचा पुढील तपास उपनिरीक्षक अक्षय पाटील करत आहेत.