
नांदेड पोलिसांची मोठी कारवाई; जिल्ह्यातील 12 सराईत गुन्हेगार तडीपार, अनेक गंभीर गुन्हे दाखल
भाग्यनगर पोलीस ठाण्याच्या अंतर्गत पाच जणांच्या टोळीला सहा महिन्यांसाठी तडीपार करण्यात आले आहे. यामध्ये शिला भदरगे (वय ४२, बेलानगर), इंदुबाई बाराटे (वय ३५, संतोषनगर), आमन कांबळे (वय २०, पालीनगर), रेखा पुरी (वय ३५, विजयनगर) आणि सुनीता सोनकांबळे (वय ४०, साईगिरीनगर) यांचा समावेश आहे. या टोळीतील सदस्य नागरिकांना फोन करून कामाचे आमिष दाखवत बोलावून घेत असत. त्यानंतर मारहाण करून अंगावरील कपडे काढून व्हिडिओ शूटिंग करणे, तो व्हिडिओ व्हायरल करण्याची तसेच खोट्या गुन्ह्यात अडकवण्याची धमकी देत होते.
भाग्यनगर पोलीस ठाण्याच्या अंतर्गत आणखी पाच जणांना एक वर्षासाठी तडीपार करण्यात आले आहे. अर्जुन पुरुषोत्तम मोरे (वय २८, मरघाट), सोहेल अ. सत्तार (वय १९, जवाहरनगर), दीपकुमार वीरकुमार कौरी (वय २०, बळीरामपूर), आशा हरिचंद्र तेलंग (वय ५५, शाहनगर) आणि शेख नईम शेख मैनोद्दीन (वय २१, कैलासनगर) अशी त्यांची नावे आहेत. या टोळीने बंद घरांचे कुलूप आणि कडीकोंडा तोडून घरात प्रवेश करीत सोन्या-चांदीचे दागिने तसेच रोख रक्कम चोरी करण्याचे सत्र सुरू केले होते. या टोळीविरुद्ध घरफोडीचे पाच गंभीर गुन्हे दाखल असून, परिसरात दहशत निर्माण झाली होती.
गोवंश तस्करी करणाऱ्या दोघांवरही कारवाई
धर्माबाद पोलीस ठाण्याच्या अंतर्गत अजीम गौसोद्दीन कुरेशी (वय ४०, करखेली) आणि दत्ता किशन शिलगिरे (वय ३८, करखेली) या दोघांना सहा महिन्यांसाठी तडीपार करण्यात आले आहे. गोवंश जातीच्या जनावरांची कत्तल करण्याच्या उद्देशाने त्यांना वाहनात निर्दयपणे कोंबून अवैध वाहतूक केल्याचे या टोळीवर आरोप आहेत. महाराष्ट्र पशुसंवर्धन कायदा आणि प्राण्यांचा छळ प्रतिबंधक अधिनियमांतर्गत त्यांच्याविरुद्ध तीन गुन्हे दाखल आहेत. सार्वजनिक शांतता आणि सुव्यवस्थेला बाधा आणणाऱ्या तसेच वारंवार गंभीर गुन्हे करणाऱ्या सराईत गुन्हेगारांविरुद्ध कठोर प्रतिबंधात्मक कारवाई सुरूच राहणार आहे.
Q1. नांदेड जिल्ह्यात किती सराईत गुन्हेगारांना तडीपार करण्यात आले?
जिल्ह्यातील तीन गुन्हेगारी टोळ्यांमधील एकूण १२ सराईत गुन्हेगारांना तडीपार करण्यात आले आहे.
Q2. कोणत्या पोलीस ठाण्यांच्या हद्दीतील टोळ्यांवर कारवाई करण्यात आली?
भाग्यनगर आणि धर्माबाद पोलीस ठाण्यांच्या हद्दीतील गुन्हेगारी टोळ्यांवर तडीपारीची कारवाई करण्यात आली.
Q3. भाग्यनगरमधील टोळीतील किती जणांना तडीपार करण्यात आले?
भाग्यनगर पोलीस ठाण्याच्या हद्दीतील पाच जणांना सहा महिन्यांसाठी तडीपार करण्यात आले आहे.