खराडी गावठाणातून तरुणाचे अपहरण; कारमध्ये जबरदस्तीने नेले अन्...
पुणे : राज्यासह देशभरात गुन्हेगारी वाढली आहे. दररोज वेगवेगळ्या भागात खून, खुनाचा प्रयत्न, मारहाण, लुटमार यासारख्या घटना घडत आहेत. वाढत्या गुन्हेगारीमुळे नागरिकांमध्ये दहशत निर्माण होत आहे. अशातच आता खराडी गावठाणातून तरुणाला कारमध्ये जबरदस्तीने घालून त्याचे अपहरण करण्यात आल्याचा प्रकार समोर आला आहे. जिवे मारण्याची धमकी देत बेल्ट आणि काठीने मारहाण करून त्याला जखमी केल्याप्रकरणी दहा जणांवर गुन्हा दाखल झाला आहे.
याप्रकरणी शुभम नामदेव खवळे (वय २०), साई नामदेव खवळे (वय १८, दोघे रा. हडपसर), १७ वर्षांचा विधीसंघर्षित बालक व त्यांचे सात मित्र, यांच्यावर खराडी पोलिस ठाण्यात गुन्हा दाखल करण्यात आला आहे. याबाबत श्लोक प्रमोद मोरे (वय १९, रा. खराडी गावठाण, मूळ रा. राजेवाडी, ता. आटपाडी, जि. सांगली) यांनी तक्रार दिली आहे. दिनांक २८ सप्टेंबर रोजी सायंकाळी साडेसात वाजता खराडी गावठाणातील बुद्धविहारासमोर ही घटना घडली आहे.
पोलिसांच्या माहितीनुसार, आरोपी पांढऱ्या रंगाच्या स्विफ्ट कारमधून आले. त्यांनी संगनमत करून मोरे यांना जबरदस्तीने कारमध्ये घातले. जिवे मारण्याच्या उद्देशाने त्यांचे अपहरण केल्याचा आरोप फिर्यादीत आहे. त्यानंतर शिवीगाळ करून त्यांना ठार मारण्याची भाषा केली. कमरेच्या बेल्टने आणि काठीने मारहाण करून मोरे यांना जखमी करण्यात आले. दिनांक २९ सप्टेंबर रोजी सकाळी या प्रकरणाची नोंद झाली. आरोपींसोबतच्या सात मित्रांची पूर्ण नावे अहवालात देण्यात आलेली नाहीत.
.png "Videos"){kind=small}
