Pune Crime : पुण्यात पोलिस चौकीत शिपायाला धक्काबुक्की; नेमकं काय घडलं?

मंगळवार पेठेतील गाडीतळ चौकीत गोंधळ घालून पोलिस शिपायाला धक्काबुक्की केल्याचा प्रकार समोर आला आहे. याप्रकरणी एकाविरुद्ध फरासखाना पोलिसांनी गुन्हा दाखल केला आहे.

पुणे : मंगळवार पेठेतील गाडीतळ चौकीत गोंधळ घालून पोलिस शिपायाला धक्काबुक्की केल्याचा प्रकार समोर आला आहे. याप्रकरणी एकाविरुद्ध फरासखाना पोलिसांनी गुन्हा दाखल केला आहे. याप्रकरणी संतोष विठ्ठल खंकाळ (वय ५३, रा. लोकसेवा तरुण मंडळाजवळ, मंगळवार पेठ) याच्यावर सरकारी कामात अडथळा आणणे, तसेच धक्काबुक्की केल्याप्रकरणी गुन्हा दाखल करण्यात आला आहे. याबाबत पोलिस शिपाई प्रशांत तुर्डे यांनी फरासखाना पोलिसांत तक्रार दिली आहे.

 

पोलिसांच्या माहितीनुसार, मंगळवार पेठेत वाद सुरू असल्याची माहिती मिळाल्याने गाडीतळ पोलिस चौकीतील कर्मचाऱ्यांनी आरोपीला १४ मार्च रोजी दुपारी बोलावून घेतले होते. ’तू मला बोलावून घेतले. तू साधा पोलिस शिपाई आहे. तुला तपासाचा अधिकार नाही’, अशी अरेरावी करून आरोपीने पोलिस शिपाई तुर्डे यांच्याशी वाद घातला.

तुर्डे यांना धक्काबुक्की करण्यात आली. तर, चैाकीच्या आवारात गोंधळ घातला. ‘तुझ्याविरुद्ध माझ्याकडे खूप तक्रारी आल्या आहेत. तू मुलाला खोट्या गुन्ह्यात अडकवतो. तुझी तक्रार पोलिस आयुक्तांकडे करून नोकरी घालवतो’, अशी धमकी दिल्याचे तक्रारीत म्हंटले आहे. अधिक तपास उपनिरीक्षक प्रणिल चौगले करत आहेत.

हे सुद्धा वाचा : शिवसेना शहरप्रमुख नाना भानगिरे यांच्यावर गुन्हा दाखल; नेमकं प्रकरण काय?

वर्गात घुसून विद्यार्थ्यावर कोयत्याने हल्ला

पुणे जिल्ह्यातील ओतूर परिसरातून एक अत्यंत धक्कादायक आणि खळबळजनक घटना समोर आली आहे. येथील गाडगे महाराज परीक्षा केंद्रावर दहावीची परीक्षा सुरू असताना एका १७ वर्षीय अल्पवयीन मुलाने १६ वर्षीय विद्यार्थ्यावर कोयत्याने हल्ला केला आहे. या जीवघेण्या हल्ल्यात विद्यार्थी जखमी झाला असून, त्याने प्रसंगावधान राखून वार हातावर झेलल्यामुळे त्याचा जीव थोडक्यात वाचला आहे. या घटनेमुळे शैक्षणिक वर्तुळात मोठी खळबळ उडाली असून पालकांमध्ये भीतीचे वातावरण पसरले आहे. मिळालेल्या माहितीनुसार, सोमवार रोजी दहावीचा इतिहास विषयाचा पेपर होता. ओतूर येथील चैतन्य विद्यालयातील विद्यार्थी गाडगे महाराज परिसरातील परीक्षा केंद्रावर पेपर देण्यासाठी वेळेत पोहोचला होता. सर्व विद्यार्थी आपापल्या बाकावर बसून परीक्षेची तयारी करत असतानाच, अचानक एक १७ वर्षीय अनोळखी मुलगा वर्गात शिरला. कोणाला काही समजण्याच्या आतच त्याने आपल्या दप्तरातून धारदार कोयता बाहेर काढला आणि संबंधित विद्यार्थ्याच्या दिशेने जोराने वार केला. अचानक झालेल्या या हल्ल्यामुळे वर्गात एकच गोंधळ उडाला. ओतूर पोलीस स्टेशनचे सहाय्यक पोलीस निरीक्षक लहू थाटे यांनी घटनेची गांभीर्याने दखल घेत तपास सुरू केला आहे.