बहुजन शक्ती सेनाचे अध्यक्ष बाळासाहेब रणदिवे यांची हत्या; पुण्यातील घटनेने खळबळ

एकाच संघटनेत काम करत असताना अंतर्गत वाद तसेच व्हॉट्सअपला बदनामी केल्याच्या रागातून बहुजन शक्ती सेनाचे अध्यक्ष तसेच सामाजिक कार्यकर्ते बाळासाहेब रणदिवे यांचा खून करण्यात आल्याची धक्कादायक घटना घडली. त्यांच्यावर स्टीलच्या तीक्ष्ण शस्त्राने वार करुन खून केला आहे.

पुणे : एकाच संघटनेत काम करत असताना अंतर्गत वाद तसेच व्हॉट्सअपला बदनामी केल्याच्या रागातून बहुजन शक्ती सेनाचे अध्यक्ष तसेच सामाजिक कार्यकर्ते बाळासाहेब रणदिवे यांचा खून करण्यात आल्याची धक्कादायक घटना घडली. त्यांच्यावर स्टीलच्या तीक्ष्ण शस्त्राने वार करुन खून केला आहे. मार्केटयार्ड परिसरात मध्यरात्री ही घटना घडली. पोलिसांनी चौघांना ताब्यात घेतले आहे.

दिनेश उर्फ बाळासाहेब सुरेश रणदिवे (वय. 28,रा. साईनगर गल्ली, अप्पर डेपो बिबवेवाडी कोंढवा रोड) असे तरुणाचे नाव आहे. याप्रकरणी, मार्केटयार्ड पोलिसांनी राहुल खुडे, सचिन खुडे (राहणार दोघे डायस प्लॉट गुलटेकडी), हनुमंत काबळे (रा. येवलेवाडी), सुरजसिंग दुधाणी या चौघांना ताब्यात घेतले आहे. याबाबत विकास लक्ष्मण सातारकर (वय. 50, रा. पिंपरी-चिंचवड) यांनी मार्केटयार्ड पोलिसांत तक्रार दिली आहे. हा प्रकार मार्केटयार्ड येथील येवले चहाच्या समोर एका शेडमध्ये बुधवारी रात्री नऊच्या सुमारास घडला आहे.

पोलिसांच्या माहितीनुसार, रणदिवे व राहुल खुडे एकमेकांच्या ओळखीचे असून, ते एका संघटनेचे काम करतात. त्यांच्यात मतभेत होते. दरम्यान तीन दिवसापुर्वी राहुल खुडे याच्यावर मार्केटयार्ड पोलिसांत महिलेने दिलेल्या तक्रारीवरून विनयभंगाचा गुन्हा दाखल झाला होता. त्यामुळे बाळासाहेब याच्यावर राहुल खुडे चिडून होता. बुधवारी रात्री नऊच्या सुमारास तक्रारदार विकास, बाळासाहेब, महेश सकट, उमेश मोहिते, निलेश थोरात आणि केतन क्षीरसागर असे मित्र मिळून मार्केटयार्ड येथील एका हॉटेलच्या समोरील शेडमध्ये चहा पित बोलत होते. त्यावेळी राहुल हा तेथे आला. बाळासाहेब हे फोनवर बोलत होते. राहुलने बाळ्या इकडे ये असे म्हणून मान पकडून बाळासाहेब यांना ओढत घेऊन गेला.

राहुल याचा लहान भाऊ सचिन हा तेथे हत्यार घेऊन आला. त्याने बाळासाहेब यांच्या डोक्यात वार केला. त्याचवेळी आरोपी दुधानीने देखील बाळासाहेब यांच्यावर वार केले. जिवंत सोडू नका त्याला खल्लास करा असे म्हणताच इतर आरोपींनी बाळासाहेब यांच्यावर वार केले. दरम्यान, माहिती मिळताच मार्केटयार्ड पोलिस घटनास्थळी दाखल झाले. बाळासाहेब यांना उपचारासाठी ससून रुग्णालयात दाखल केले. मात्र गुरुवारी सकाळी त्यांचा उपचारादरमयान मृत्यू झाल्याचे डॉक्टरांनी सांगितले. सुरूवातीला याबाबत खूनाचा प्रयत्न केल्याचा गुन्हा दाखल करण्यात आला होता. परंतू बाळासाहेब यांच्या मृत्यूनंतर खूनाचे कलम वाढविण्यात आले आहे.